Mundu Lo Uni?

DEN añanan recien, miyones di hende na Oost Europa i na otro partinan a sufri a consecuencia di gueranan cu a crea desunion. Tog, miéntras cu e conflictonan cruel aki tabata andando, miles di hende den e paisnan aki asotá pa guera a logra cultivá i mantené berdadero unidad entre nan mes. Considerá un par di ehempel.

Na 1991 un multitud internacional di casi 15.000 hende a reuní na Zagreb, Croacia. Esei a pone un polis cu tabata presente remarcá: “Lo ta bon pa mustra e medionan di comunicacion loke ta pasando aki den e stadion, precisamente aki, caminda nos ta mira serbio, croata, slovenio, montenegro i otronan, sintá banda di otro na pas.” Kico ta responsabel pa tal unidad extraordinario?

Na 1993 a tene un congreso internacional asta mas grandi, cu e tema “Siñansa Divino,” na Kiev, capital di Ucrania. Tabatin un asistencia máximo di casi 65.000 persona. E portada dje korant Evening Kiev a informá: “Testigonan di Jehova . . . ta uní no solamente via nan badge blou cu ‘Siñansa Divino’ skirbí riba dje, sino tambe mediante fe berdadero.”

Siñansa Divino—Un Forsa pa Unidad

Bo ta puntra bo mes con bini Testigonan di Jehova ta disfrutá di unidad miéntras cu tur rond di  nan tin desunion? Profesor polaco Wojciech Modzelewski ta identificá e motibu dor di bisa tocante e Testigonan: “E factor clave pa nan actitud pacífico ta e determinacion pa for di awor sigui e principionan revelá den Bijbel.” Sí, Testigonan ta uní mundialmente mediante siñansa divino dje Creador, Jehova Dios. Kico e siñansa ei ta?

Jesucristo a señalá na un principio importante cu ta causa union ora el a bisa en cuanto su siguidónan: “Nan no ta parti dje mundu, mescos cu ami no ta parti dje mundu.” Sí, e posicion di neutralidad cu Testigonan di Jehova na tur parti ta tuma, ta uni nan. Esaki ta na armonia cu e palabranan di Jesus ora el a pidi den oracion: “Mi ta haci peticion . . . pa nan tur por ta un, mescos cu abo, Tata, ta den union cu mi i ami ta den union cu bo, pa nan tambe por ta den union cu nos.”—Juan 17:16-21.

E posicion di neutralidad aki ta un forsa pa unidad, pasobra e ta impulsá Testigonan na tur parti di mundu pa cumpli cu loke profeta Isaías a mencioná tocante tur esnan cu Dios lo “instruí . . . tocante su camindanan.” Isaías a declará cu e personanan ei “lo tin cu bati nan spada na ploeg i nan lansa na skèr di corta mata.” E profeta a sigui bisa: “Nacion lo no hisa spada contra nacion, ni nan lo no siña di guera mas.”—Isaías 2:2-4.

E unidad i pas cu ta ser observá na congreso di Testigonan di Jehova na Oost Europa durante e último década ta ilustrá cu e profecia di Isaías ya caba ta cumpli na escala chikitu. Na Europa i na otro parti, den sentido figurativo e Testigonan a bati nan spada na ploeg i nan lansa na skèr di corta mata. Como resultado, awe nan ta disfrutá di pas i unidad den e mundu desuní aki. Nada straño anto cu un editorial di korant a yega di bisa: “Si henter mundu a biba segun e credo [bíblico] di Testigonan [di Jehova], odio i dramamentu di sanger lo a caba, i amor lo a reina”! Esei lo ta e caso un dia?

 Con Unidad Mundial Lo Bini

Pa trece unidad rond mundu, mester di mas cu solamente un grupo relativamente chikitu di hende cu bon intencion. Tambe tin mester di un gobiernu cu tin e poder pa limitá e influencia di esnan cu ta traha contra unidad i pas. De echo, Jesus a siña su siguidónan pa pidi den oracion pa precis un gobiernu asina: “Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:10) Sí, Jesus a indicá cu solamente un gobiernu di Dios, esta, “e reino di shelu,” por ofrecé e solucion p’e problemanan di mundu, entre nan e problema di desunion.—Mateo 4:17.

Jesucristo ta Rey dje Reino celestial aki. Bou di su mando hende riba tera lo experenciá un tempu di pas i unidad sin precedente. E unidad mundial aki lo no bini como resultado di reformanan económico cu hende haci. Solamente un gobiernu mundial den man dje “Prins di Pas” por haci un cos asina.—Isaías 9:6, 7.

E Prins di Pas lo no tolerá e inhusticianan actual, causá hopi bes dor di pobresa i abusu di poder. Bijbel ta primintí: “Dilanti dje tur rey di tera lo cai na suela; tur nacion, di nan parti, lo sirbié. Pasobra lo e libra esun pober cu ta sclama pa yudansa, tambe esun afligí i ken cu no tin yudante. For di opresion i for di violencia lo e rescatá nan alma . . . Lo yega di tin abundancia di grano riba tera; riba top dje cerunan lo tin sobreabundancia.”—Salmo 72:11, 12, 14, 16.

Bou di Cristo su gobernacion, desempleo tambe lo ta un cos di pasado. Profeta Isaías a declará: “Nan lo no traha cas i otro hende biba aden; nan lo no planta i otro hende come. Pasobra e dianan di mi pueblo lo ta mescos cu e dianan di un palu; i mi scogínan lo gosa completamente dje trabou di nan mes man.” (Isaías 65:22) Imaginá bo, tur hende riba tera lo por haci trabou útil i satisfaciente!

Berdadero Unidad—Na Ki Tempu?

Pero ki dia Cristo su gobernacion riba tera lo cuminsá? Como contesta riba e pregunta ei, Jesucristo a señalá na un tempu caracterisá pa guera, informe di guera, malesa, temblor i otro sucesonan. Sin embargo, el a señalá tambe na un aspecto positivo: un predicacion mundial dje bon nobo dje Reino di Dios. (Mateo 24:3-14; Lucas 21:11) Jesus a bisa cu e sucesonan aki lo culminá den un “tribulacion grandi” cu lo introducí un cambio completo di gobernacion pa tera. (Mateo 24:21) Lesa su discurso, registrá na Mateo capítulo 24 i Lucas capítulo 21. Compará e condicionnan cu el a profetisá cu loke bo ta mira den mundu. Bo por mira bon cla cu nos ta bibando awor na bispu di Dios su intervencion den gobernacion di hende. Su Reino, cu Jesucristo como Rey, lo tuma gobernacion over. Un mundu uní ta nos dilanti!

E pregunta ta keda: Kico abo mester haci pa mira e promesa aki bira realidad? Siendo cu Bijbel ta hunga un papel importante den e expectativanan di humanidad pa futuro, ta sabí pa haci un esfuerso pa siña conocé Bijbel mihó. P’esei, gustosamente Testigonan di Jehova por pasa na bo cas pa conducí un studio di Bijbel grátis cu bo. * Si bo aceptá e oferta aki, lo bo mira djis akí cu unidad mundial ta posibel i cu abo tambe por participá den dje!

[Nota]

 [Plachinan na página 8, 9]

Rond mundu, Testigonan di Jehova ta disfrutá di un unidad remarcabel

Kiev, Ucrania

Zagreb, Croacia

[Plachi na página 10]

Dios su propósito ta pa humanidad bira un famia mundial i uní