Anaconda—Ta Lagando Algun Secreto Los?

Di un Redactor di Spierta!

M I NO sa di bo, pero colebra grandi ta fasiná mi den un manera cu poco otro bestia por fasiná mi. I si nos ta papia di colebra grandi, nos ta papia di anaconda, miembronan dje famia di bestia Boidae. Pero ta straño cu apesar di nan enorme tamaño, hende tabata sa masha tiki di nan comportacion, esta, te cu poco tempu pasá.

Na 1992, biólogo Jesús A. Rivas i investigadónan dje Sociedad di Conserbacion di Bestia den Naturalesa (WCS), cu base na New York, a cuminsá studia e gigantenan aki pa promé bes den nan habitat natural. * Ora mi a lesa cu e estudio aki di seis aña largu den mondi, cu a tuma lugá den un region di moeras di Venezuela, a revelá algun echo nobo, mi a puntra mi mes ta kico nan lo a descubrí. Awe lo mi purba haña sa.

Nomber i Sorto di Anaconda

Un atardi cu bon solo, mi a sali di mi oficina na Brooklyn i a coge caminda pa e sede di WCS, situá den e parke di bestia Bronx Zoo di New York City. Ya caba mi a haci suficiente investigacion pa ta na haltura di algun echo tocante anaconda.

Sorprendentemente, e nomber anaconda kisas a originá leu for di su cas na Sur América. Tin hende ta bisa cu e ta bini dje palabranan tamil anai, cu ta nificá “olefante,” i kolra, cu ta nificá “asesino.” Otro hende ta pensa cu e ta bin dje palabra singala henakandayā (hena, ta nificá “weerlicht,” i kanda, ta nificá “stam”). Probablemente ta comerciantenan portugues a trece e palabra singala—usá originalmente pa piton na Sri Lanka—na Sur América for di Asia.

Anto papiando di nomber robes, asta e nomber oficial di anaconda  , Eunectes murinus, no ta exactamente corecto. Eunectes ta nificá “bon landadó,” i esei e ta. Pero murinus ta para pa “color di raton.” Pa un colebra cu un cueru color berde di olijfi, e nomber aki “ realmente no ta parce apropiado,” un buki di referencia a remarcá.

Mester mencioná un cos mas tocante e nomber i categorianan científico di anaconda. Literatura tocante anaconda generalmente ta bisa cu tin dos sorto di anaconda. Unu ta esun riba cua e artículo aki ta basá: e anaconda berde, of boa di awa, cu ta move principalmente den e moerasnan di Amazona i Orinoco i den e parti nort di Sur América. E otro sorto ta e anaconda geel mas chikitu (E. notaeus), un habitante di Paraguay, parti zuid di Brazil i den nort di Argentina.

Encuentro cu un Experto

Ata mi akí na Bronx Zoo. E parke aki di bestia den naturalesa cu ta abarcá 107 hectar yen di palu, ta cas di mas cu 4.000 bestia, incluso mas o ménos un dozein di anaconda. Na entrada dje parke di bestia mi ta topa William Holmstrom di WCS su Departamento di Herpetologia (estudio di reptil). Sr. Holmstrom, un new yorkeño di 51 aña, bistí na paña di kaki, cu bril, mustashi i cu gusta smile, ta e manager dje departamento di coleccioná reptil. E tambe a participá den e estudio di anaconda den mondi na Venezuela. Segun e, awor científiconan ta reconocé existencia di un di tres sorto di anaconda (E. deschauenseei), cu ta biba den nortoost di Brazil i na costa di Guyana Frances. * Awe tardi sr. Holmstrom lo ta mi guia experto.

No ta tarda pa mi ripará cu mi guia stima colebra mescos cu otro hende stima poedel of prikichi. E ta conta mi cu for di tempu cu e tabata mucha, cas di su mayornan tabata yen di salamander, sapu i bestianan por estilo. “Mi tata a gusta nan. Mi mama a tolerá nan.” No tin nodi bisa cu sr. Holmstrom a tira pa su tata.

Tamaño Impresionante i Diferencianan Drástico

Den e cas di 100 aña bieu caminda e reptilnan ta, nos dos ta stop dilanti di un kouchi cu tin un anaconda. Maske mi ta mira un bestia cu mi a anticipá pa mira, tog mi no por dominá mi asombro. Su tamaño enorme i proporcionnan extraordinario ta straña mi. Su cabes cu un nanishi plat ta mas grandi cu man di un homber, i e cabes ta keda enano compará cu e curpa grandi pegá na dje. Mi guia ta bisa mi cu e reptil impresionante aki ta un hembra di 5 meter cu ta pisa rond di 80 kilo. Maske su curpa ta casi mes diki cu un palu di telefon, mi ta haña sa cu e ta djis un colebra di “liga menor” na comparacion cu esun cu tin e récord mundial riba su nomber: un anaconda hembra gorditu cu nan a coge na 1960 cu, segun cálculo, a pisa casi 227 kilo!

Ningun anaconda machu por sikiera soña di yega e tamañonan impresionante ei. Maske hende cu ta studia reptil tabata sa cu anaconda machu ta mas chikitu cu hembra, e estudio den mondi a saca afó cu machunan ta asina hopi mas chikitu, cu nan ta parce versionnan miniatura dje hembranan. De echo, e estudio a mustra cu como promedio, e hembranan ta cincu biaha mas grandi cu e machunan. E diferencia drástico ei den tamaño entre e sexonan  por bruha hende, manera biólogo Jesús Rivas a descubrí. E tabatin un baby anaconda como mascota, pero semper e tabata puntra su mes di con e colebra chikitu tabata blo mord’é. Ta durante e estudio den mondi numa el a bin bij cu ta un machu adulto i iritá e tabata cariciá!

Ta Busca! Ta Paga Recompensa

Maske e curpa grandi di un anaconda ta su cualidad sobresaliente, su largura tambe ta mésun impresionante. Ta berdad cu anaconda no ta dje gigantesco ei manera Hollywood ta present’é—un película tabatin un anaconda di 12 meter largu—pero nan largura máximo di rond di 9 meter mes ta basta imponente pa mira.

Tin masha tiki anaconda dje tamaño ei. E hembranan di mas grandi cu nan a coge durante e estudio tabata pisa 90 kilo i midi mas o ménos 5 meter largu. De echo, ta asina difícil pa haña anaconda mas grandi, cu te ainda ningun hende no a cobra un recompensa di 1.000 dollar cu Sociedad Zoológico di New York (e predecesor di WCS) a ofrecé 90 aña pasá, pa cualkier colebra bibu di mas cu 9 meter largu. Segun sr. Holmstrom: “Nos ta haña dos of tres yamada pa aña di hende na Sur América cu ta claim e recompensa, pero ora nos pidi nan manda nos prueba di loke nan a coge pa asina nos tin un motibu válido pa bin abou bin chek, e evidencia nunca ta yega.” Anto by the way, awor e recompensa pa un colebra bibu di 9 meter ta 50.000 dollar!

Un Bista Djacerca

Mi ta sigui mi guia miéntras e ta dirigí mi n’e segundo piso dje cas di reptil cu ta sirbi como lugá pa brui i tene e reptilnan. E lugá ta cayente i húmedo. Pa duna mi un bon bista dje bestia cu mi ta interesá aden, sr. Holmstrom ta habri e porta di un kouchi cu tin un anaconda hembra pisá.

Awor tin un 2 meter asina—i nada otro—entre nos i e bestia. Anto, poco-poco e cabes dje anaconda ta hisa i ta move bin poco-poco den nos direccion. Awor a keda solamente un distancia di 1 meter entre e anaconda su cabes i di nos.

“Mihó nos kita,” sr. Holmstrom ta bisa trankil asina, “por ta e ta busca cuminda.” Ami a bai eens mesora. E ta cera e porta dje kouchi, i e cabes dje anaconda ta move bai patras te ora cu gradualmente e ta pon’é abou meimei di su curpa tur lorá.

Si bo logra ignorá e anaconda su bista cu ta parce malicioso, i bo wak su cabes cu strepi corá bon, lo bo mira cu e tin rasgonan remarcabel. Por ehempel, e anaconda su wowo i buracunan di nanishi, ta forma e puntonan mas haltu riba su cabes. Esaki ta permití e colebra keda cu henter su curpa bou di awa i laga su wowo i buracunan di nanishi so sali net riba superficie di awa, casi mescos cu caiman ta haci. Esei ta splica con bin e colebra ta acercá su víctima miéntras cu su curpa ta keda camuflá.

Curpa Cu Ta Hala Cera i Kakumbein Los

Anaconda no ta venenoso. E ta mata su víctima dor di lora su curpa hala cera duru rond di nan. E no ta plecha su víctima, mas bien cada biaha cu e víctima saca rosea, e colebra ta hala lora mas duru te ora e víctima impotente stek. E ta atacá casi tur cos—di patu te biná. Sin embargo, informenan confiabel di anaconda cu a come hende ta raro.

Ya cu colebra no por kou ni sker nan cuminda, e anaconda no tin ningun otro opcion sino di guli su víctima morto completo, asta si e  víctima ta basta mas grandi cu e colebra mes. De echo, si bo por a come cuminda manera anaconda ta haci, e ora ei lo bo por a lora bo lip rond di un coco i gulié manda abou fácil manera ta un pinda. Con anaconda ta haci esei?

“E ta cana cu su cabes riba e víctima,” segun sr. Holmstrom. E ta splica cu kakumbein di anaconda ta los pegá na su cabes. Promé cu e colebra pone su djente den e víctima curpa grandi, e kakumbein abou por baha mas abou i habri for di otro. Anto e anaconda ta pusha un banda di su kakumbein abou dilanti, hak su djentenan cu ta dobla bai patras den e víctima, i ta trek e banda ei dje kakumbein i e víctima bek den su boca. Caba, e ta ripití e mésun pasonan cu e otro mitar di su kakumbein abou. Te na cierto grado e kakumbein ariba por haci mescos. Haciendo e mésun movementunan aki bai dilanti, ta parce di berdad cu e bestia su kakumbein ta cana riba e víctima. Una bes el a guli e víctima, loke por dura vários ora, e colebra ta hap un par di biaha, i e vários partinan di su cabes flexibel ta cai bek na nan lugá.

Kico ta pone cu e anaconda no ta stek? Den bom di su boca e tin un tubu di aire cu e por rek saca afó. Miéntras e anaconda ta manda su cuminda paden, e ta pusha su tubu di aire pafó te parti dilanti di su boca. Dje manera ei, e tubu di aire parecido na un snorkel ta laga e anaconda hala rosea miéntras e ta come.

Ken Ta Ken?

Mi guia ta kita awor e tapa di un terario (baki di tera), i nos ta mira dos anaconda chikitu. Nan aparencia ta idéntico, i ta pone mi puntra con e investigadónan por a distinguí e cientos di anaconda salbahe cu nan a studia durante nan proyecto na Venezuela.

Sr. Holmstrom ta splica cu nan a purba solucioná e problema di identificacion dor di usa paper clip cayente pa marca nan. Nan tabata keinta e paper clipnan pa marca numbernan chikitu riba cabes dje anacondanan. E método a funcioná bon te ora e colebranan a cambia nan cueru, i nan numbernan a kita! Pero, e investigadónan a ripará cu cada anaconda ya caba tin su mes marca di identificacion. Cada colebra tin un patronchi di marca pretu riba e parti geel bou di su rabu, di cada colebra ta único mescos cu fingerprint ta pa hende. “Tur loke nos mester a haci ta traha un diagram dje patronchi cu tin riba un largura di cueru di 15 scama, i nos tabatin suficiente variacion pa distinguí e 800 colebranan cu nos a studia.”

Esun Mas Lihé, Esun den Mihó Condicion of Esun Mas Fuerte?

Ora nos ta concluyendo e entrevista den oficina di sr. Holmstrom, e ta mustra mi un potret cu el a saca na Venezuela di anacondanan machu tur lorá rond di otro. E ta un bista fasinante. E ta splica cu e bola aki di anaconda lorá rond di otro ta forma un asina yamá bola di reproduccion. (Wak e potret na página 26.) “Un caminda meimei dje bola aki tin un anaconda hembra. Un biaha nos a haña un hembra cu 13 machu lorá rond di dje, esei tabata un récord.”

Ta bringa e machunan ta bringa? Wel, e ta mas manera un pelea di lucha libre slow-motion. Cada luchadó machu ta purba pusha e otro afó i maniobrá su mes den un posicion pa par cu e hembra. E lucha por dura entre dos pa cuater siman. Ken ta gana? Esun mas lihé (e machu cu haña e hembra promé), esun den mihó condicion (e machu cu ta producí mas sperma) of esun mas fuerte (e machu cu ta logra pusha tur contrincante afó)? Investigadónan ta spera di haña un contesta pronto.

Na fin dje atardi, mi ta gradicí mi guia pa su tour fasinante. Na caminda pa mi oficina, mi ta refleccioná riba loke mi a siña. Ta berdad sí cu ainda mi no ta compartí e sintimentunan di biólogo Jesús Rivas, cu “anaconda ta pret,” pero mi ta admití cu anacondanan definitivamente a capta mi atencion. Segun cu investigadónan ta sigui studia anaconda den su habitat natural, lo ta interesante pa sa si e colebranan gigante aki lo ta incliná na laga mas di nan secretonan fasinante los.

[Nota]

[Plachi na página 24]

E estudio di anaconda den mondi di Venezuela

[Plachi na página 25]

William Holmstrom

[Plachi na página 26]

Un bola di reproduccion di anaconda