E Manera Cu Nos Famia A Bolbe Uni

Segun e relato di Lars i Judith Westergaard

NAN cas ta parce manera un lugá normal pa cualkier famia felis na Dinamarca. E ta un cas cómodo cu un dushi hardin, situá den un pueblito trankil. Den cas, tin un potret grandi na muraya cu ta mustra e famia su yunan sano i sonriente.

E tata, Lars, ta un anciano den un congregacion di Testigonan di Jehova. Su esposa Judith, ta un pionero (un evangelisadó di tempu compelto). Apesar cu nan ta un pareha felis, esei no tabata semper asina. Lars cu Judith a pasa dor di problema i amargura cu a resultá den divorcio i cu a habri nan famia for di otro. Sin embargo, awor nan famia ta uní atrobe. Di con? Nan mes ta splica kico a pasa.

Lars cu Judith no ta wori pa conta kico a bai malu cu nan matrimonio i con nan a bolbe uni. Nan ta pensa cu nan experencia lo por yuda otronan.

Cos A Cuminsá Asina Bon

Lars: Nos matrimonio tabata puru felicidad ora nos a cuminsá, na april 1973. Mundu henter a parce yen di promesa. Nos no tabata conocé Bijbel ni Testigonan di Jehova, pero nos tabata convencí cu nos lo por haci mundu un lugá hopi mas mihó pa biba aden si tur hende traha suficiente duru pa logra esei. Pues nos a enbolbé nos mes den hopi actividad político. Nos felicidad a aumentá segun nos famia a crece cu tres yu homber sano i bibitu: Martin, Thomas i Jonas.

Judith: Mi tabatin un puesto ehecutivo den un departamento di servicio civil. Na mésun tempu, mi tabata enbolbí den actividadnan político i di sindicato. Gradualmente nan a duna mi puestonan importante.

Lars: Di mi banda, mi trabou tabata den un sindicato grandi, i mi a subi na un puesto importante. Nos careranan tabata bayendo top, i no tabatin niun nubia den shelu.

Nan Ta Distanciá for di Otro

Lars: Pero nos tabata asina absorbá den nos cada un su actividadnan cu nos tabata pasa cada bes ménos tempu cu otro. Nos tabata traha pa e mésun partido político pero den ramonan separá. Otro hende tabata cuida nos tres yunan, sea hende privá of institucionnan di cuido den dia. Nos bida di famia a bira desorganisá, ya cu nos tur dos tabata preocupá cu nos mes asuntunan. Si sosodé cu nos tur dos ta na cas, hopi bes pleitamentu pisá tabata start. Anto mi a cuminsá usa alcohol como un sorto di trankilisante.

Judith: Claro cu ainda nos tabata stima otro i stima e muchanan, pero nunca nos no a cultivá nos amor manera mester ta; a parce cu el a fria. Nos relacion a bira masha desagradabel i como resultado e muchanan a sufri.

 Lars: Den un intento desesperá pa drecha nos bida di famia, mi a dicidí di kita for di trabou. Na 1985 nos a muda for di stad pa e pueblito caminda nos ta biba awor. Cos a drecha pa un poco tempu, pero ami cu mi casá a sigui concentrá riba nos interesnan distinto. Finalmente, na februari 1989, nos matrimonio di 16 aña a terminá den divorcio. Nos famia a kibra.

Judith: Tabata teribel pa mira nos mes famia kibrá for di otro i con e muchanan a sufri. Nos tabata asina amargá cu nos no por a yega na un acuerdo pa compartí tutela dje muchanan, pues ami a haña tutela riba nan tur tres.

Lars: Ami cu Judith a purba algun cos sin pia ni cabes pa mantené nos famia cu tabata habriendo for di otro huntu. Nos a asta resa na Dios p’e yuda nos. Pero nos tabata sa asina tiki tocante Dios.

Judith: Nos oracionnan a laga nos cu e sintimentu cu Dios no a scucha. Nos ta gradicidu cu despues nos a mira cu Dios ta scucha oracion.

Lars: Nos no tabata sa mes cu ta nos mes mester a haci esfuerso i cambionan. Pues divorcio a bira e tristu realidad.

Un Cambio Inesperá pa Lars

Lars: Ora mi tabata biba mi so, cos a cambia bai den un direccion completamente inesperá pa mi. Un dia mi a aceptá dos revista for di Testigonan di Jehova. Promé cu e tempu ei, mi tabata rechasá Testigonan automáticamente. Pero ora mi a pasa dor dje revistanan ei, mi a mira cu Testigonan eigenlijk ta kere den tantu Dios como Jesucristo. Esei tabata un sorpresa grandi. Mi no tabata sa mes cu nan tabata cristian.

Rond di mésun tempu, mi a bai biba cerca un muher cu mi a topa. A resultá cu ántes e tabata Testigo di Jehova. Ora mi a cuminsá haci pregunta, el a mustra mi den Bijbel cu Jehova ta e nomber di Dios. Pues “Testigonan di Jehova” ta nificá “Testigonan di Dios”!

E muher a haci areglo pa mi asistí na un discurso público na un Salon di Asamblea di Testigonan di Jehova. Loke mi a mira ei a ègt stimulá mi interes. Mi a bishitá e Salon di Reino local pa siña mas, i nan a cuminsá un studio di Bijbel cu mi. No a tarda pa mi realisá cu e manera cu mi tabata biba tabata malu, pues mi a sali for di cas di mi amiga i a bai biba mi so den mi pueblo natal. Despues di a vacilá un poco, mi a tuma contacto cu Testigonan di Jehova ei i a sigui cu mi studio di Bijbel.

Tog, ainda mi tabatin algun duda. Di berdad Testigonan di Jehova tabata e pueblo di Dios? Kico di tur e cosnan cu mi a siña na mucha? Ya cu mi a lanta como un adventista di shete dia, mi a tuma contacto awor cu un pastor adventista. El a bai di acuerdo pa studia cu mi tur diarason, miéntras cu Testigonan di Jehova tabata studia cu mi tur dialuna. Loke mi tabata kier tabata un contesta cla for di tur dos grupo riba cuater asuntu specífico: e bolbementu di Cristo, e resureccion, e doctrina di Trinidad i e manera cu e congregacion mester ta organisá. A tuma mi un par di luna so pa mi kita tur duda. Den cada un dje cuater áreanan—i den tur otro cos—solamente e creencianan di Testigonan di Jehova tabata completamente basá riba Bijbel. A consecuencia di esei, mi a cuminsá participá felismente den tur actividad di  congregacion i den poco tempu mi a dedicá mi na Jehova. Na mei 1990, mi a bautisá.

Kico di Judith?

Judith: Na culminacion di nos crísis matrimonial, mi a cuminsá bai misa atrobe. Ora mi a tende cu Lars tabata birando Testigo di Jehova, mi no a keda niun tiki contentu. Nos yu mas chikitu, Jonas di 10 aña, tin biaha a bishitá su tata, pero mi a prohibí Lars di bai na cualkier reunion di Testigonan di Jehova cu Jonas. Lars a apelá n’e autoridadnan, pero nan a tuma parti pa mi.

Mi a topa un otro homber. Tambe, mi a bira mas enbolbí den política i tur sorto di obra pa comunidad. Pues si n’e tempu ei un hende lo a papia di un posibel union atrobe di nos famia, esei lo a parce imposibel.

Mi a bai cerca e pastor dje parokia local en busca di informacion contra Testigonan di Jehova, pero el a admití mesora cu e no sa nada di Testigonan di Jehova i cu e no tabatin literatura tocante nan. Tur loke e por a bisa ta cu mihó mi keda leu for di nan. Claro cu esei no a haci nada pa cambia mi punto di bista negativo di Testigonan di Jehova. Pero despues mi a haña mi forsá ta topa nan den un manera cu nunca mi no a spera.

Mi ruman homber cu ta biba na Suecia a bira Testigo di Jehova, i el a invitá mi na su casamentu na un Salon di Reino! E experencia ei a cambia mi punto di bista dje Testigonan drásticamente. Pa mi sorpresa nan no tabata saai manera semper mi a imaginá mi. Nan tabata bondadoso i felis, i asta a demostrá un bon sentido di humor.

Miéntras tantu, mi ex-casá Lars, a cambia completamente. El a bira mas responsabel, a dedicá tempu na su yunan, tabata bondadoso i a controlá su abla, i no a bebe di mas manera ántes. Su personalidad a bira asina atractivo! Awor e tabata precis e tipo di homber cu semper mi tabata kier p’e ta. Tabata un pensamentu asina frustrante cu mi no tabata casá cuné mas i cu kisas un dia un otro muher lo casa cuné!

Anto mi a planea un “atake” sutil. Un biaha cu Jonas tabata kedando cerca su tata, mi a haci areglo pa bai wak Jonas cu Lars huntu cu mi dos ruman muhernan bou dje pretexto cu e dos tantanan mester haña un chens di mira nan subrino. Nos a topa na un coney island. Miéntras e tantanan tabata atendé Jonas, ami cu Lars a bai sinta riba un banki.

Pa mi sorpresa, asina cu mi a cuminsá papia di nos futuro, Lars a saca un buki for di su sacu. E título dje buki tabata Logrando felicidad den bida di famía. * El a duna mi e buki i a sugerí mi pa lesa e capítulonan tocante e papel dje esposo i dje esposa den un famia. El a recomendá mi foral pa busca e textonan di Bijbel.

Anto, ora ami cu Lars a lanta for dje banki, mi kier a tene su man, pero bondadosamente el a nenga esei. Lars no tabatin niun intencion di forma un relacion nobo cu mi sin sa promé kico tabata mi punto di bista di su religion nobo. Esei a ofendé mi un poco, pero despues mi a realisá cu su actitud tabata basta razonabel i lo ta pa mi mes probecho si un dia e bolbe bira mi casá.

Tur esaki a haci mi mas curioso cu nunca tocante Testigonan di Jehova. E siguiente dia, mi a tuma contacto cu un señora cu mi tabata sa ta Testigo, i nos a haci areglo pa e cu su casá duna mi e informacion cu mi tabata kier tocante nan religion. Nan tabatin contesta bíblico pa tur e hopi preguntanan cu mi a haci. Mi por a mira cu loke Testigonan di Jehova ta siña ta fundá firmemente riba Bijbel. Tur cos cu nos a discutí, mi mester a reconocé cu esei tabata berdad.

Durante e periodo ei mi a kita mi nomber for  di Iglesia Evangélico Luterano i a stop cu mi actividadnan político. Mi a asta stop di huma. Esei tabata e paso mas duru cu tur. Mi studio di Bijbel a cuminsá na augustus 1990, i na april 1991, mi a bautisá como un Testigo di Jehova.

Nan di Dos Casamentu

Judith: Awor nos tur dos tabata Testigo bautisá. Aunke nos cada un a bai nos caminda distinto, nos tur dos a investigá Bijbel. Danki na Bijbel su siñansanan excelente, nos tabata distinto di loke nos tabata promé. Ainda nos tabata stima otro, kisas den un manera asta mas profundo cu promé. Pues, ata nos dos awor, liber pa casa atrobe, i esei ta loke nos a haci. Nos a haci nos votonan pa di dos biaha, pero e biaha aki den e Salon di Reino di Testigonan di Jehova.

Lars: Lo increibel a sosodé: nos famia tabata uní atrobe! Esta un felicidad i goso nos a sinti awor!

Judith: Nos yunan, hopi famia i hopi amigu nobo i bieu a asistí n’e casamentu. Tabata un experencia maraviyoso. Entre e invitadonan tabatin algun cu a conocé nos tempu nos tabata casá e promé biaha; nan tabata contentu di mira nos huntu atrobe i sorprendí di mira e berdadero goso entre Testigonan di Jehova.

E Muchanan

Lars: Despues di nos bautismo nos tabatin e goso di mira dos di nos yunan tuma e decision di dedicá nan bida na Jehova.

Judith: Jonas a apreciá e berdad di Bijbel for di tempu cu el a cera conocí cuné na mucha ora e tabata bishitá su tata. E tabatin 10 aña so ora el a bisa mi cu e kier bai biba cerca su tata pasobra, manera el a splica: “Tata ta sigui Bijbel.” Jonas a bautisá ora e tabatin 14 aña. El a caba su scol, i awor e ta un minister di tempu completo.

Lars: Nos yu mayó, Martin, awor tin 27 aña. E cambionan cu el a mira nos haci a dun’é hopi cos pa pensa ariba. El a sali for di cas i a bai biba den un otro parti dje pais. Dos aña pasá el a cuminsá studia Bijbel cu e congregacion local di Testigonan di Jehova. Despues di cincu luna so, e tabata cla pa bautisá. E tin bon plan pa su bida den futuro como cristian.

Nos yu meimei, Thomas, actualmente no ta un Testigo di Jehova. Claro cu nos ta stim’é ketu bai i nos tin un bon relacion cuné. E ta contentu cu e cambio cu a tuma lugá den nos famia. I nos tur ta eens cu ta danki na e principionan cu nos como mayor a siña for di Bijbel, nos famia a bolbe bira un atrobe. Ki un bendicion e ta pa nos cu awor nos por reuní nos famia huntu cu frecuencia bou di un solo dak, cu tur e tres muchanan i tur dos mayor huntu!

Nos Bida Awe

Lars: Nos no ta bisa cu nos a bira perfecto. Pero nos a siña algu, esta cu amor i respet mutuo ta factornan clave den un matrimonio exitoso. Awor nos matrimonio ta basá riba un fundeshi completamente diferente compará cu e promé biaha. Awor nos tur dos a aceptá un autoridad mas haltu cu nos mes, pasobra nos tur dos ta reconocé cu nos ta biba pa Jehova. Ami cu Judith ta sinti cu nos ta berdaderamente uní i ta mira futuro cu confiansa.

Judith: Mi ta kere cu nos ta un prueba bibu cu Jehova ta e mihó consehero di matrimonio i di famia cu tin.

[Nota]

[Plachi na página 20]

Lars cu Judith e promé biaha cu nan a casa, na 1973

[Plachi na página 21]

Tres mucha homber a perde nan famia uní i a bolbe hañ’é

[Plachi na página 23]

Lars cu Judith awe, uní atrobe dor di a sigui principionan bíblico