Evolucion Ta Logico?

AWE, hende cu ta promové e teoria di evolucion ta bisa cu e ta un echo. Sin embargo, con lógico ta e afirmacionnan cu nan ta haci asina hopi bes? Considerá lo siguiente.

Seda cu araña ta producí ta un dje materialnan mas fuerte cu hende conocé. Segun New Scientist, “cada fibra por rek bai 40 porciento di su largura i absorbá shen biaha mas tantu energia cu staal, sin cu e ta kibra.” Con araña ta traha e seda extraordinario aki? Segun splicacion di Encyclopædia Britannica, un líkido pegahoso, un proteina, ta pasa dor di tubunan superchikitu den curpa dje araña, i e líkido ta cambia bira un hilu sólido dor di un reorganisacion di su molekuulnan di proteina.

New Scientist ta concluí: “Araña a evolucioná técnicanan cu ta hopi mas ayá cu asta esnan dje kímico di mas ábil.” Ta posibel cu araña a evolucioná un técnica di fabricacion asina complicá cu ainda hende tin cu comprend’é?

Un artículo den The Wall Street Journal, skirbí pa Phillip E. Johnson, un profesor di ley di Universidad di California, ta remarcá cu no tin evidencia pa evolucion, pero cu su apoyadónan te ainda ta ridiculisá esnan cu ta cuestion’é. E artículo ta comentá: “Teoria di evolucion tin problema serio cu evidencia, pero esnan cu ta promov’é no kier un debate onesto cu kisas ta debilitá nan opinion mundial.”

Un otro ehempel cu ta demostrá e falta di lógica den e creencia di evolucion tin di haci cu mata. Científiconan cu tabata haci investigacion na Maroco a descubrí 150 fosil di archaeopteris, “e famia mas cerca cu nan a descubrí te asina leu di e promé matanan di simia, antepasado di mayoria dje palunan awe,” segun e korant The Daily Telegraph di Londen. E korant su redactor di ciencia ta declará cu e mata aki “a yuda forma e mundu moderno dor di inventá blachi cu taki.” “Inventá” ta “formulá algu dor di pensa.” Ta lógico pa kere cu un mata tin e abilidad di pensa i inventá?

Sálomon, un dje hombernan di mas sabí, a consehá nos pa ‘protehá nos abilidad di pensa,’ esta, pensa pa nos mes. Awe mas cu nunca, esei ta necesario.—Proverbionan 5:2.