For di Nos Lectornan

Droga Danki pa publicá e seri di artículo “Droga Ta Tumando Control di Mundu?” (8 di november 1999) Antes mi a usa droga, cocaina, marihuana i hashish. Tambe mi tabata bebe di mas i huma mas cu 40 sigaria pa dia. Tabata masha difícil pa kibra cu e hábitonan aki, pero Dios a duna mi forsa. Tin nuebe aña cu mi a stop, i mi ta gradicidu cu mi por a sali for dje lodo dje mundu aki sin a pega cu un malesa serio of cai cerá. Dor cu mi conocé e daño físico, emocional i económico cu uso di droga ta causa, mi ta spera cu artículonan manera esakinan lo toca curason di hóbennan.

G. M., Italia

Mi a usa e seri den un opstel na scol, i mi a haña e punto mas haltu cu tin i mi maestro a felicitá mi. Semper mi ta gusta lesa Spierta!, foral artículonan cu ta trata cu asuntunan di actualidad. E ta yuda mi mira cosnan di bida den un manera realístico.

I. M., Italia

Sociabel E artículo “Hóbennan Sa Puntra . . . Con Mi Por Ta Mas Sociabel?” (8 di december 1999) a conmové mi mashá. Mi tin 16 aña i mi tin dificultad pa comunicá cu otro hende, foral na reunionnan cristian. Danki cu boso a pensa riba hóbennan manera ami cu tin e problema aki. Lo mi purba pone na práctica e bon conseho cu boso a duna den e artículo aki.

I. A., Francia

Diabétis Como parti di mi curso despues di graduacion, mi a ser asigná pa dirigí un seminario riba diabétis mellitus. E splicacion simpel i franco publicá den e artículo “Bo Yu Muher Tin Diabétis!” (8 di october 1999) tabata masha útil. E relato di Sonya Herd a pone mi realisá con importante ta pa un pashent haña informacion cla.

T. K., Brazil

Celibato Mi no ta di acuerdo cu e artículo den “Observando Mundu” titulá “Celibato—Pakico?” (8 di october 1999) Boso ta bisa cu Iglesia su argumento “no tin ningun base bíblico.” En bista di loke Mateo 19:10-12 i 1 Corintionan 7:8, 26 i 27 ta bisa, ami ta concluí cu tin un base pa celibato.

M. T., Merca

Ta berdad cu Bijbel ta recomendá solteria como un curso deseabel pa algun hende. Sin embargo, Bijbel no ta rekerí pa ministernan cristian ta celibato. Apostel Pedro i otro hombernan responsabel den e congregacion cristian di promé tabata hombernan casá. (1 Corintionan 9:5; 1 Timoteo 3:2) P’esei, celibato obligatorio no tin base den e Scritura.—RED.

Timides Masha danki pa e artículo “Hóbennan Sa Puntra . . . Di Con Mi No Por Ta Mas Sociabel?” (8 di november 1999) Esaki tabata alimento n’e debido tempu. Henter mi bida mi a sufri di timides. Mi tin 17 aña i mi ta haña cu ta difícil pa cera conocí cu hende nobo i asociá cu esnan nobo na reunionnan cristian. Debí na esaki, mi a perde hopi oportunidad pa expandé mi amistadnan i disfrutá di asociacion cu e rumannan. Boso artículo a yuda mi realisá cu timides ta algu comun i cu mi por super’é.

B. H., Merca