Lo Bo No Kier Perde Esaki!

PERDE kico? E Congreso di Distrito di Testigonan di Jehova “Hacidónan dje Palabra di Dios”! E seri aki di congreso, cu a cuminsá na mei na Merca, lo ser tené den cientos di stad rond mundu durante vários luna binidero. Na mayoria sitio e programa lo cuminsá diabierne mainta 9:30 cu un programa musical.

Despues di habri cu e animacion pa presta atencion na loke e Palabra di Dios ta bisa, e programa di mainta lo sigui cu e discursonan “Bira Radiante pa Motibu dje Bondad di Jehova” i “Sigui Firme Como si Fuera Mirando Esun Cu Ta Invisibel.” Anto e programa di mainta lo concluí cu e discurso clave dje congreso, “Alabá Jehova—E Hacidor di Cosnan Maraviyoso.”

E promé discurso dje sesion di atardi, “No Entregá den Haci Loke Ta Excelente,” lo ser siguí pa un simposio di tres parti riba e tema con pa scoge un casá, edificá un famia spiritualmente fuerte i siña yunan stima Jehova. E discurso final p’e dia, “Keda Pareu cu Jehova Su Organisacion,” lo repasá con a comprendé Dios su propósitonan progresivamente den tempu moderno.

E programa di diasabra mainta tin un di dos simposio di tres parti titulá, “Ministernan dje Palabra di Dios.” Esaki lo duna sugerencianan en cuanto con pa efectuá nos trabou di haci disipel. Anto caba lo tin e discurso caluroso “No Duna Dios Ningun Motibu pa Bergwensa.” Despues di esei lo tin un discurso tocante bautismo, i lo tin oportunidad pa esnan cu ta cualificá bautisá.

Parti atardi un simposio di tres parti lo resaltá e tema “Traha Duru pa Cultivá Spiritualidad,” den cua lo percurá sugerencianan práctico en cuanto con pa desaroyá spiritualidad. E sesion lo concluí cu e discurso iluminador “Canando den e Lus Progresivo dje Palabra di Dios.” Lo e considerá Isaías capítulo 25 i 26 i lo splica con nos por comprendé e buki fasinante aki di Bijbel mihó.

Diadomingo mainta lo tin tambe un último simposio di tres parti titulá “Sofonías Su Profecia Significativo pa Esnan Cu Ta Haci e Boluntad di Dios.” Lo e splica con e profecia ei den pasado a aplicá n’e nacion di Huda i con e ta aplicá awor den nos tempu, foral n’e religionnan dje mundu aki. Despues lo bo disfrutá di un drama den pleno trahe i esenario antiguo titulá “Ehempelnan Spiertador pa Nos Tempu,” cu lo considerá e inmoralidad di hombernan israelita djis promé cu Israel a drenta e Tera Primintí. Un rasgo dje sesion final dje congreso riba diadomingo atardi lo ta e discurso público, “Pakico Presta Atencion na Dios Su Obranan Maraviyoso.”

Traha plan awor pa asistí na tur tres dia. Pa haña e sitio mas cerca di bo cas, tuma contacto cu e Salon di Reino local di Testigonan di Jehova of skirbi e publicadónan dje revista aki. Den e edicion di 15 di februari di nos revista compañero, E Toren di Vigilancia, tin un lista di tur sitio di congreso na Aruba, Curaçao, Hulanda, Merca i Cánada.