Pornografia Ta Subi Internet

ROND MUNDU, MIYONES DI HENDE TA USA INTERNET tur dia. Hopi ta subi Internet pa haci negoshi, pa wak kico ta pasando den mundu, pa chek weer, pa siña tocante diferente pais, pa haña informacion di biahe of pa comunicá cu famia i amigunan den vários parti di mundu. Pero tin hende—adultonan casá i soltero i tambe un cantidad sorprendente di mucha—ta subi Internet pa completamente un otro motibu: PA WAK PORNOGRAFIA.

 PORNOGRAFIA RIBA COMPUTER, yamá tambe ciberporno, ta asina popular cu el a bira un negoshi multimiyonario. The Wall Street Journal a comentá: ‘Busca un Web site cu tin ganashi i, probablemente su negoshi i contenido ta definitivamente pornográfico.’

E Journal a splica con bin hende ta acudí na Internet pa pornografia: “Clientenan por wak cosnan picante sin tin cu sluip drenta librerianan di reputacion dudoso of sin ni sikiera bai den e kamber patras dje videoteca den bario. Clientenan por analisá informacion sushi den e privacidad di cas, of di oficina.”

Pornografia i Mucha

Lamentablemente, gran parti dje auditorio di ciberporno ta mucha. Hóbennan cu pa ley no tin mag di cumpra literatura pornográfico ni huur video pornográfico por haña acceso na esakinan den nan mes cas djis dor di klik un par di biaha cu nan ‘mouse.’ Tin opcionnan pa scoge na granèl.

Hopi mucha ta bai cierto sitionan riba Internet regularmente sin cu nan mayornan sa. De echo, The Detroit News ta declará cu “mas cu dos di cada cincu mucha a aboná riba un web site of otro servicio di Internet maske casi 85 porciento di mayor tin regla cu nan no mag haci esei.”

Aunke mayoria mucha—i adulto tambe—ta soru cuidadosamente pa sconde e echo cu nan ta wak pornografia, no ta tur hende ta haña cu esei mester ta un secreto. Tin ta considerá e práctica ei un forma di recreo inofensivo. Otronan ta admití cu pornografia no ta bon pa mucha, pero ta razoná cu loke adultonan ta haci den privá ta nan asuntu.

Den algun pais e controversia riba pornografia a bira henter un bataya político. Na un banda dje argumento, hende cu ta boga pa libertad di expresion ta lucha na fabor di pornografia, i na otro banda, esnan cu ta boga pa balornan di famia ta haci esfuerso pa influenciá autoridadnan pa prohibí pornografia.

Spierta! no ta tuma parti pa ningun hende den cuestionnan político. E propósito dje seri aki ta pa informá nos lectornan dje peliger di wak pornografia, sugerí maneranan cu nan por protehá nan mes i nan sernan kerí i duna sugerencianan basá riba Bijbel pa ken cu a cai den e trampa di pornografia i kier libra su mes di dje.