Protehá Bo Mes i Bo Sernan Kerí

INTERNET por ta un medio útil. Pero, mescos cu mayoria medio, por haci mal uso di dje. I ciberporno, esta, pornografia via Internet, ta un ehempel di tal maluso.

Ya cu mayornan sa cuantu poder loke bo mira por tin, nan mester haci tur loke nan por pa Web site ofensivo di Internet ta inaccesibel pa mucha. E foyeto Teen Safety on the Information Highway (Siguridad di Tiener Riba Internet) ta duna informacion útil riba e tema ei. E ta declará: “Awor tin servicionan cu ta duna bo un evaluacion di Web site relacioná cu su contenido, i tambe tin programanan di computer cu ta screen Web site i cu ta capacitá mayornan pa blokea e tipo di Web site cu nan ta considerá inapropiado. E programanan aki ta traha den diferente manera. Tin ta blokea Web site di cua ta conocí cu nan ta contené material ofensivo. Tin ta stroba usadó di duna cierto tipo di informacion manera nan nomber i adres. Otro programanan ta tene bo yunan for di ‘chat room’ of ta restringí nan abilidad di manda of lesa E-mail. Por lo general e mayor por adaptá e programanan aki pa blokea solamente e tipo di Web site cu e como mayor ta considerá ofensivo.”—Mira tambe e cuadro “Con pa Protehá Mucha for di Pornografia.”

Sin embargo, nos tin cu admití cu tin un límite na loke mayornan por haci pa screen Web site indeseabel cu nan yunan por mira. Nan no por vigilá nan yunan cada minuut. I un mucha of hóben cu na cas no ta hañ’é den contacto cu pornografia, kisas por tin acceso ilimitá na pornografia riba computer na scol of na cas di un compañero di scol. P’esei, ademas di haci loke nan por pa blokea nan yunan su acceso na pornografia, mayornan tin cu yuda e yunan desaroyá un concenshi sensitivo cu lo impulsá nan pa rechasá pornografia sin ta nan como mayor tin cu bisa nan.

Lo ta un eror pa concluí cu adultonan ta mihó ekipá cu mucha pa wak pornografia. Manera nos a mira den e artículo anterior, pornografia no ta bon pa niun hende!

Pero, laga nos suponé cu ya bo tin un tempu ta wak pornografia. Bo ta realisá cu loke bo ta haciendo no ta agradá Dios, i bo kier kibra cu e custumber. Esei ta posibel? Sí, por. Hende ta kibra cu mal custumber tur dia. Si di berdad bo kier libra for di pornografia, bo por hacié.

Si Bo Kier Libra

E promé stap ta stop di wak pornografia, mesora! Mas bo warda, mas duru ta bira pa stop. Sin embargo, pa stop por ta mas fácil pa  bisa cu pa haci. Bijbel ta indicá realísticamente cu temporalmente picá por ta dushi. (Hebreonan 11:25) Pero picá por hiba na morto tambe. (Romanonan 6:23) Na promé instante, kisas bo ta haña bo ta saca tur sorto di excuus pa bo wak pornografia un biaha mas so. No scucha bo mes! I no entregá n’e tentacion pa sigui wak!

Manera nos a mencioná anteriormente den e seri aki, wakmentu di pornografia por afectá bo calidad di bida seriamente. Analisá onestamente con e custumber aki ta afectando bo relacion cu bo famia i amigunan. Bo ta un esposo i tata? Tin chens cu bo casá i yunan a ripará cierto cambionan den bo comportacion. Desde cu bo a cuminsá wak pornografia, kisas bo a bira ta iritá mas tantu, cu mal beis, yen di secreto of reservá—podisé sin cu bo mes sa. Kisas tin biaha bo ta rous miembronan di famia sin motibu. Si ta material pornográfico bo ta wak, bo comportacion ta reda bo. Amigu i miembronan di famia a ripará cu tin algu robes. Pero simplemente nan no sa ta kico, ainda!

Si cada bes pornografia ta atraé bo, no purba lucha contra dje bo so. Busca yudansa. Tuma un amigu experenciá den confiansa. Ta berdad cu bo mester di curashi pa admití cu bo tin un problema cu pornografia, pero un amigu maduro probablemente lo admirá bo pasobra bo a tuma e iniciativa pa pone un paro na esei.

Un deseo fuerte pa agradá Dios sigur ta e motibu mas poderoso pa lucha contra pornografia. Ora nos tene nos mes na un bida di birtud, nos ta haci Dios su curason contentu. (Proverbionan 27:11) Ora nos ta sigui den un curso robes, nos ta laga Dios sintié “ofendí den su curason.” (Génesis 6:6) Si bo ta un cristian, sin duda bo ta interesá den loke Dios ta sinti. Tambe bo mester ta interesá den e manera cu bo ta usa bo mente i curason, ya cu bo a dedicá nan na Dios i mester tene nan limpi pa su sirbishi. (Ezekiel 44:23) Bijbel ta urgi cristiannan pa limpia nan mes di “tur contaminacion di carni i di spiritu, perfeccionando santidad den temor di Dios.” (2 Corintionan 7:1) Sí, un temor saludabel di desagradá Dios, cu ta mira tur cos, por motivá bo pa kibra cu pornografia.

Pero, suponé cu miéntras bo ta luchando pa libra for di dje, bo ta habri accidentalmente un Web site cu ta contené pornografia. Bandoná e Web site mesora! Si ta necesario, cera e programa di Internet! Si bo sinti bo tentá pa bai bek, acudí na Dios den oracion intenso, rogand’e p’e yuda bo resistí tentacion. Bijbel ta bisa: ‘Den tur cos laga bo peticionnan bira conocí  na Dios.’ Si mal pensamentunan ta tormentá bo, haci oracion te ora bo haña alivio. Anto ‘e pas di Dios cu ta surpasá tur pensamentu lo warda bo curason i bo facultad mental.’ (Filipensenan 4:6, 7) Claro cu lo bo tin cu remplasá mal pensamentu cu pensamentunan cu ta ‘berdadero, di consideracion serio, hustu, decente, amabel i di bon reputacion.’—Filipensenan 4:8.

Kisas lo bo ripará cu ta útil pa siña cierto textonan bíblico for di cabes i tambe meditá riba nan. Textonan manera lo siguiente.

“O stimadónan di Jehova, odia loke ta malu.”—Salmo 97:10.

“Mi ta dominá mi curpa i ta hib’é manera un esclabo, pa, despues cu mi a predicá na otronan, mi mes no bira desaprobá di algun manera.”—1 Corintionan 9:27.

“P’esei, mata boso miembronan di curpa cu ta riba tera pa loke ta fornicacion, impuresa, apetit sexual.”—Colosensenan 3:5.

“Pa cada un di boso sa con pa haña posesion di su mes wea den santificacion i onor, no den apetit sexual cudicioso.”—1 Tesalonicensenan 4:4, 5.

“Tur cu sigui wak un muher afin di tene pasion p’e ya a cometé adulterio cuné caba den su curason.”—Mateo 5:28.

 “Esposonan mester ta stimando nan esposa mescos cu nan mes curpa. Esun cu ta stima su esposa ta stima su mes.”—Efesionan 5:28.

Tin hopi motibu pa evitá pornografia. E por afectá bo calidad di bida seriamente, troce bo huicio, daña bo relacion cu otro hende i, mas importante, ruiná bo relacion cu Dios. Si bo no tin e custumber di wak pornografia, no cuminsá. Si bo tin e custumber, stop mesora! Sea ta den buki, revista of via Internet, pornografia no ta pa cristian. Evit’é a todo costo!

[Kuadro/Plachi na página 9]

Con pa Protehá Mucha for di Pornografia

E siguiente sugerencianan por yuda bo protehá bo yunan dje peligernan di pornografia riba Internet.

No permití bo yu subi Internet for di den su kamber. Pone tur computer conectá na Internet den un kamber caminda tur miembro di famia por drenta fácilmente.

Siña conocé e programanan di computer cu bo yu ta usa.

Chek wak si bo yu a crea su mes Web site sin cu bo sa. Pa haci esei, purba busca su nomber via e programanan di computer cu ta rondia henter Internet. Skirbi su nomber completo pa e no duna bo sitionan robes.

No permití bo yu haci areglo pa topa cara-cara cu un otro usadó di computer cu bo no conocé.​—⁠Mira e cuadro “Mas Cu Combersacion Bano.”

Nunca reaccioná riba mensahenan of artículonan di boletin cu ta provocativo, obseno, agresivo of menasante.

Spierta bo yunan tocante wakmentu di material inapropiado riba Internet. Siña nan actua como nan propio controladó ora bo no t’ei. Corda cu computernan na scol of na cas di un amigu podisé no ta prevení mucha di haña acceso na pornografia.

[Rekonosementu]

Informacion basá, en parti, riba e foyeto Child Safety on the Information Highway i un artículo den Los Angeles Times, 5 di juli 1999.

[Kuadro/Plachi na página 10]

Mas Cu Combersacion Bano

Hende mester tin masha cuidou ora di usa ‘chat room’ riba computer. Un chat room ta un sistema cu ta permití usadónan di Internet comunicá cu otro. Claro cu hopi hende ta comunicá cu amigunan íntimo via E-mail. Den e manera aki hende cu ta biba leu for di nan famia por mantené contacto regular cu nan. Pero tin un diferencia entre manda E-mail pa un persona cu bo conocé i combersá cu un hende cu bo no conocé. Lo bo pensa di bel un number di telefon pa loco anto cera amistad cu ken cu contestá e yamada? Claro cu no! Wel pakico desaroyá un relacion via Internet cu un hende completamente desconocí?

Un problema di comunicá cu un hende desconocí ta cu kisas e no ta loke e ta aparentá. Por ehempel, e por ta un pedofil cu ta spera di probechá di un mucha of un hóben cu no ta sospechá di nada.

Parry Aftab, un abogado cu ta specialisá den casonan relacioná cu Internet, a splica con fácil esaki por ta. El a comentá: “Muchanan normalmente ta drenta chat room. Pedofilnan ta tuma nota di esaki, nan ta sigui e combersacion den e chat room i ta wak cua ta e muchanan cu ta solitario. Kisas un mucha ta manda un mensahe manera: ‘Mi mayornan ta bai divorciá . . . Mi tin rabia riba mi mama, nunca e no ta cumpra e wega di computer cu mi kier.’ . . . E pedofil ta drenta den e combersacion i ta bisa: ‘Mi mayornan ta bai divorciá . . . Mi tin rabia riba mi mama . . . Nunca mi no tabatin mag di haña e wega cu mi kier, te dia cu tio Timmy a busk’é pa mi. . . . Tur loke bo tin cu haci ta bai n’e centro comercial i topa tio Timmy.’” En realidad “tio Timmy” ta e pedofil en busca di víctima.

Pues anto, mayornan tin cu mantené un relacion caluroso i cariñoso cu nan yunan. Mantené e liñanan di comunicacion habrí di manera cu e yunan no tin cu sinti e necesidad di acudí n’e lugánan robes pa sosten emocional.

Adultonan cu ta solitario of cu ta infelis den nan matrimonio no mester acudí na chat room di computer pa sosten emocional. Tin e peliger di acudí na hende desconocí. Algun adulto a bandoná nan casá pa un hende cu nan a “topa” via Internet. *

[Nota]

[Plachi na página 8]

Oracion por yuda un hende resistí tentacion