Bida Ta Perdiendo Su Balor?

“Ta un mundu caminda bida no tin hopi balor. Bo por cumpra morto pa un par di shen libra [esterlina] i no tin scarcedad di hende pa duna e servicio.”—The Scotsman.

Na april 1999, tabatin un asalto cu a shok henter mundu. Dos adolesente a poderá violentamente di Columbine High School, na Littleton, Colorado, Merca, lagando 15 morto atras. Investigacion a mustra cu un dje atacadónan tabatin su página riba Internet caminda el a skirbi: “HENDE MORTO NO TA PUSTA BOCA!” Tur dos atacadó a muri den e tragedia.

ASESINATO ta universal, i cantidad incontabel di hende ta muri un morto violento tur dia. Na 1995, cu 75 asesinato pa cada 100.000 habitante, Sur Africa tabatin e cifranan mas haltu na mundu. Na Sur América tin un pais caminda bida ta hopi barata mes; na 1997 nan a mata mas cu 6.000 hende pa motibunan político. Mata hende riba contract ta un procedura normal. Un informe tocante e pais ei ta bisa: “Ta spantoso cu asesinato di mucha tambe a subi: Na 1996, nan a mata 4.322 mucha, un aumento di 40 porciento den dos aña so.” Sin embargo, asta mucha ta birando asesino, sea di otro mucha of di nan propio mayornan. Di berdad bida ta barata.

Di Con Tin e Cultura Cu Ta Enfocá Riba Morto?

Kico e echo i cifranan aki ta indicá? Cu tin un creciente falta di respet pa bida. Hende cu stima poder i ta hambrá pa placa, ta mata sin nan concenshi molestiá nan. Cabesantenan di droga ta manda mata famianan completo. Nan ta usa palabra nèchi pa manda mata nan víctimanan, expresionnan manera “lembe nan,” “veeg nan,” “eliminá” of “terminá” nan. Genocidio i purificacion étnico a subi e  cantidad di víctima i a haci e balor di bida humano mas barata. Como resultado, rond mundu matamentu a bira cos di tur dia den noticianan na television.

Agregá na esaki e violencia i mutilacion cu pantaya di television i cine ta glorificá, anto ta parce cu nos sociedad ta lorá den un cultura repugnante cu ta enfocá riba morto. Relacioná cu esaki Encyclopædia Britannica ta bisa: “Durante e último mitar di siglo 20, morto a bira un tema popular straño. Promé cu e tempu ei, kisas sorprendentemente, e tabata un tema cu speculacion científico serio, i na un grado menor, esnan filosófico, a evitá.” Segun Josep Fericgla, profesor di antropologia cultural di Catalonia, “morto a bira e último tabú eficas den nos sociedad, i p’esei, e ta un dje fuentenan mas importante awe di manipulacion ideológico.”

Kisas e rasgo mas sobresaliente dje cultura aki cu ta enfocá riba morto ta e creencia popular cu poder, supremacia, placa i placer, ta hopi mas importante cu bida humano i balornan moral.

Con e cultura aki enfocá riba morto ta plama? Kico mayornan por haci pa contrarestá e influencia negativo aki cu ta rondoná nan i cu ta afectá nan yunan? Esakinan ta algun dje preguntanan cu e siguiente artículonan lo contestá.

[Kuadro/Plachi na página 4]

Cuantu un Bida Ta Bal?

▪ “Esnan mas hóben den e gèngnan [na Mumbai, India] ta asina desesperá, cu nan lo aceptá un contract pa mata un hende pa 5.000 rupia [210 florin] so.”—Far Eastern Economic Review.

▪ “El A Mata un Hende Riba Caya Cu A Nengu’é un Sigaria.”—Titular den La Tercera, Santiago, Chile.

▪ “Ta costa rond di 13.000 florin pa cera un contract normal pa mata un hende na Rusia [na 1995] . . . Mata hende riba contract a aumentá drásticamente durante e explosion económico na Rusia despues di comunismo.”—Reuters, basá riba un informe den Moscow News.

▪ “Na Brooklyn nan a arestá un broker di real-estate . . . i a acus’é di a paga un tiener, parti di un pago di 1.500 dollar pa mata e homber su casá na estado i mama dje casá.”—The New York Times.

▪ ‘E prijs pa mata na Inglatera ta bahando. Prijs pa un asesinato riba contract a baha di 30.000 libra cincu aña pasá, pa e prijs mas razonabel di 5.000 pa 10.000 libra.’—The Guardian.

▪ ‘Gèngnan cruel di Balkan ta pió cu Mafia. Esakinan ta un tipo nobo di criminal, cu regla nobo i arma nobo. Nan tin explosivo i mitrayeur i no ta vacilá pa usa nan.’—The Guardian Weekly.