Con pa Yuda Hóbennan Scapa dje Cultura Enfocá Riba Morto

Kico ta responsabel pa e fasinacion cu e tópico di morto cu bo ta mira cerca hóbennan djawe? Henry Hyde, representante dje estado Illinois, Merca, a bisa: “Tin un bashí spiritual den e hóbennan aki, cu ta ser yená cu e cultura cu ta enfocá riba morto i violencia.”

UN LECTOR di Time a skirbi: “Ta mayornan floho, entretenimentu violento i un falta di base moral i spiritual ta responsabel pa e subcultura cu ta enfocá riba morto cu ta existí den nos hubentud djawe.”

Soledad ta un dje otro problemanan principal cu ta afligí adolesentenan. Tin ta biba den cas caminda tur dos mayor ta traha i no t’ei pa gran parti di dia; otronan tin un solo mayor. Segun un fuente, adolesentenan na Merca ta pasa 3 ora i mei tur dia nan so i compará cu hóbennan den añanan ’60, nan ta pasa 11 ora ménos huntu cu nan mayornan tur siman. De echo, tin hóbennan cu no tin ni sikiera e compania of apoyo emocional di nan mayornan.

Loke Mayornan Por Haci

En bista dje “bashí spiritual” cu hóbennan ta lucha cuné, con importante e papel di mayornan ta? Mayornan sabí ta comprendé cu na un banda, nan yunan tin mester di diberticion sano i na otro banda, nan tin mester di apoyo personal regular.  Motivá pa interes amoroso, mayornan por papia cu nan tocante nan preferencianan riba tereno di música, programa di television, video, buki, wega di video i películanan. Maske hóbennan por ta no ta expresá esei, hopi di nan ta anhelá e cariño i guia amoroso di nan mayornan. Nan tin mester di contesta franco ya cu nan ta biba den un mundu yen di insiguridad. Adultonan mester comprendé cu muchanan ta confrontá un mundu hopi mas complicá cu nan, tempu nan tabata hóben.

Mayornan cu kier protehá nan yunan lo combersá cu nan regularmente, ègt scucha nan i spierta nan pa e peligernan cu tin den cultura moderno. Ora mayornan pone límitenan firme i ta consistente i razonabel i tambe cariñoso cu nan yunan, normalmente nan lo tin bon resultado.—Mateo 5:37.

Mayornan cu ta Testigo di Jehova ta haci un esfuerso pa tene discusionnan regular cu nan yunan, usando Bijbel i publicacion i videonan basá riba Bijbel. * Nan ta usa ocasionnan asina no pa hala e yunan su orea, sino mas bien, pa considerá temanan cu ta spiritualmente edificante. Den e reunionnan aki di famia, nan ta scucha e problemanan of desafionan cu ta afectá cada un di nan yunan, di manera cu e hóbennan tin un oportunidad di ricibí atencion individual.

Hóbennan cu no ta haña ningun guia spiritual for di nan mayornan por saca fortalesa di Salmo 27:10, cu ta bisa: “Den caso cu mi mes tata i mi mes mama bandoná mi, asta Jehova mes lo ricibí mi.” Con Jehova, e Tata di tierno misericordia, ta yuda hóbennan? E congregacionnan di Testigonan di Jehova ta un refugio caminda hopi hóben a haña e cariño di otro hende i a resolvé nan dudanan. Josías, un yoncuman cu a descubrí cu esaki ta berdad, ta comentá: “Jehova su organisacion ta cumpli cu un papel vital. Ami tabata sinti cu bida no ta bale la pena. Mi tabata biba sin propósito, sin speransa. Ora mi a haña sa cu mi no ta so, esei a cambia mi bida completamente. Cerca e rumannan den congregacion, mi a haña e famia cu mi a perde. E ancianonan i e famianan den congregacion ta manera un anker den sentido emocional.”

 De echo, hopi hóben i adulto a mehorá nan salú mental i spiritual dor di asistí regularmente na e reunionnan di congregacion di Testigonan di Jehova. Antropólogo Patricia Fortuny a comentá riba e efecto positivo aki den su artículo Los Testigos de Jehová: una alternativa religiosa para enfrentar el fin del milenio: “Testigonan di Jehova ta ofrecé un sistema di ordu cla i explícito pa aplicá na bida diario, un código exacto cu ta sirbi como un guia pa nan forma di pensa i actua.” E “sistema di ordu” i e “código” na cua e ta referí aki ta basá riba Bijbel. P’esei, maske Testigonan di Jehova ta confrontá e mésun problema i preshonnan cu nan próhimo, nan ta ser fortalecé dor dje sabiduria único dje buki antiguo ei. Sí, e Testigonan ta haña refugio den doctrina i principionan bon cla hañá den Bijbel.

Ora “Lo No Tin Morto Mas”

E siñansa duná na e Salon di Reino di Testigonan di Jehova ta enfatisá bes tras bes Dios su promesa di un mundu nobo cu lo cuminsá pronto, caminda “husticia lo tin cu biba” i caminda “lo no tin ningun hende cu ta haci nan tembla.” (2 Pedro 3:13; Mikéas 4:4) Ademas, profeta Isaías ta skirbi cu n’e tempu ei Dios “realmente [lo] traga morto pa semper, i e Señor Soberano Jehova siguramente lo limpia e lágrimanan for di tur cara.” Morto a asotá e rasa humano a consecuencia dje picá dje promé homber, Adam, pero Dios ta primintí cu pronto “lo no tin morto mas.”—Isaías 25:8; Revelacion 21:3, 4; Romanonan 5:12.

Si bo ta un hóben cu ta busca yudansa, nos ta invitá bo pa haña speransa i un motibu pa biba, den e páginanan di Bijbel. Cu yudansa di Testigonan di Jehova, bo por tin e speransa cu e mihó tempu ta ainda nos dilanti den e mundu nobo cu Dios ta primintí.

[Nota]

[Plachi na página 9]

Mayornan mester tuma tempu pa ègt scucha nan yunan i comprendé nan problemanan

[Plachi na página 10]

“Testigonan di Jehova ta ofrecé un sistema di ordu cla i explícito pa aplicá na bida diario”