DST—Un Idea Promé cu Su Tempu?

Di con hopi hende tin cu cambia ora di nan oloshi dos biaha pa aña? Pa algun hende ta ègt un molester ora nan tin cu manda e oloshi dilanti of patras. I ki ora ta mand’é dilanti of bek e? Na ingles tin un dicho cu ta recordá hende cu den primavera ta manda oloshi dilanti i den otoño ta bek e (“spring forward and fall back”). Con nan a bini cu DST (na ingles, ‘daylight saving time,’ cu ta nificá ora pa spar lus di dia)? Ken a cuminsá cuné?

Encyclopædia Britannica ta bisa cu Benjamin Franklin ta e promé cu a sugerí e idea di spar lus di dia na aña 1784. Mas cu un siglo despues, un homber ingles cu yama William Willett a haci campaña activo p’e idea aki. Sin embargo, Willett a muri promé cu parlamento a aprobá un ley tocante esei.

Segun e escritor británico Tony Francis, Willett, un maestro den construccion di Chislehurst, Kent, a bin riba e idea cu lo ta masha útil pa manipulá tempu, un biaha cu e tabata core su cabai mainta trempan den zomer na Petts Wood. Durante su recorido el a ripará cu hopi cas tabatin nan bentananan cerá. ‘Esta un desperdicio di lus di dia!’ lo e mester a pensa. El a cuminsá haci campaña pa pasa un ley den parlamento británico pa ahustá oloshi. Dor di djis manda oloshi 80 minuut dilanti, den cuater biaha di 20 minuut cada un, durante e lunanan di primavera cu zomer i despues bek e den otoño, lo a permití hende tin mas lus di dia parti anochi.

Francis ta informá cu Willett a skirbi den un di su pamfletanan: “Lus ta un dje regalonan mas grandi cu e Creador a duna hende. Tanten cu nos tin lus di dia rond di nos, alegria ta reina, ansiedad ta ménos pisá i curashi ta ser stimulá pa hiba e lucha di bida.”

Rey Edward VII no a warda pa parlamento pasa e ley. El a declará Sandringham, su mansion real di 7.900 hectar, un zona di ‘daylight saving.’ Despues el a aplicá mésun cambio n’e propiedadnan real na Windsor i Balmoral.

Kico finalmente a persuadí e políticonan pa entregá i aceptá DST? Nan kier a spar combustibel durante Promé Guera Mundial dor di reducí e necesidad di lus artificial! Poco despues, otro paisnan a tuma e idea over pa motibunan similar. Durante Segundo Guera Mundial, Inglatera a asta adoptá dòbel ora di zomer. Esaki a permití nan tin un diferencia di dos ora den zomer i un ora den winter.

Na Petts Wood tin un monumento pa William Willett, cu ta e potret na man drechi. E ta dedicá na “e luchadó incansabel pa ‘ora di zomer.’ ” E inscripcion bou dje oloshi di solo ta bisa: “Horas non numero nisi aestivas,” cu ta nificá: “Mi no ta conta ora, a ménos cu [nan ta] ora di zomer.”

[Plachi na página 31]

Cu gradicimentu na National Trust