E Atraccion di Santería

DJE CORESPONSAL DI SPIERTA! NA MÉXICO

SANTERÍA pa hopi aña ta un religion prominente na Cuba. Sin embargo, e forma di adoracion aki a ser introducí poco-poco na otro paisnan. Por ehempel, un dje mercadonan principal den Ciudad di México tin tiendanan cu ta specialisá den artículonan di santería, manera crus, bela, amuleto i fetichi. Mayoria dje tiendanan aki ta conocí como botánica, i por haña nan den tur stad grandi di América. Na New York City, nan ta haci hopi propaganda pa botánica den buki di telefon, i nan tin mas mencion den e páginanan geel cu cualkier otro tienda religioso.

Hopi hende ta ser atraé dor dje misticismo i aura exótico di santería. Bo por haña elementonan di santería den algun música i literatura latino popular. Santería ta birando mas seglar i cultural cu religioso, i el a plama via música i eventonan cultural afro-caribense.

Orígen den Antiguo Africa

Santería tin rasgo i tradicionnan básico di un antiguo religion africano practicá den e tribu yoruba na Nigeria. Ora a hiba e pueblo yoruba catibu n’e islanan di Caribe entre añanan 1770 pa 1840, nan a bai cu nan religion. Una bes den e Mundu Nobo, a forsa e africanonan catibu aki pa aceptá catolicismo, pero nan a nenga di entregá nan tradicionnan completamente. P’esei nan a crea un forma di adoracion nobo cu a consistí di elementonan tumá for di ámbos religion. Tal union di prácticanan religioso ta ser yamá sincretismo.

Den un intento pa adorá segun nan creencianan antiguo, e catibunan a duna santunan católico un di dos identidad, cada un a corespondé cu un dios africano cu cierto característicanan i poder. Asina, dios i diosanan africano, yamá orisha, a haña nomber i aparencia di santunan católico. Sin embargo e rito, custumber i creencianan, a keda mescos cu esnan practicá na Africa. Un sacerdote di santería na Cuba ta splica: “Sincretismo ta permití nos adorá e dios católico riba altar, pero loke nos ta mira ta e dios africano su tras.”

Religionnan manera vudu, obeah i macumba tambe  ta consistí di elementonan for di liturgia, sacramento i artículonan sagrado católico romano combiná cu prácticanan spiritista di Africa. Como cu for di principio Iglesia Católico na Latinoamérica a prohibí religionnan africano, mester a practicá santería den secreto pa hopi tempu. Cu tempu Iglesia Católico a bin tolerá e sincretismo aki entre e catibunan.

Característicanan di Santería

Kico ta e característicanan dje adoracion religioso aki? Santero, manera nan ta yama practicadó di santería awor, ta adorá un ser supremo i un grupo di dios, esta orisha, cu ta forma e diosnan oficial di yoruba. E sacerdotenan di santería ta interpretá e boluntad dje orisha mediante divinacion. Ta ser bisá cu tin biaha orisha ta poseé di adoradónan pa por expresá nan conseho. Siguidónan por apelá na orisha mediante oracion, música, comportacion corecto i ofrenda. Altar ta hunga un papel importante den e adoracion; santeronan ta pone nan den nan cas i ta pone flor, rom, bolo i sigá riba nan pa tene e diosnan contentu i servicial.

Den un artículo di New York Times, Lizette Alvarez a splica tocante e filosofia di santería: “E religion ta enfatisá e bida actual en bes di e bida despues di morto, i ta enfocá riba forsanan natural. Cada dios ta representá un aspecto di naturalesa, manera bos, i un rasgo humano, manera poder.” Sacerdotenan di santería ta yuda hende solucioná nan problemanan diario dor di consultá e orisha. Esakinan no ta sacerdotenan católico, i nan ta tene nan ritonan normal di santería den cas privá i no den tempel.

Foral hende cu tin mester di sosten emocional i económico ta ser atraé na santería, pasobra e ta ofrecé un sentido di comunidad, di ta parti di un famia grandi. Esnan cu mas ta ser atraé ta hende pober i imigrantenan cu ta muda pa paisnan caminda ta practicá santería. Siguidónan ta pertenecé na un comunidad specífico, caminda un santero homber of muher ta sirbi como padrino of madrina, consehero i sacerdote pa e comunidad. Sacerdotenan ta introducí miembronan nobo den un ceremonia cu ta incluí música, bailamentu i sacrificio di bestia. Tambe nan ta sacrificá bestia pa celebrá nacementu, matrimonio i morto. Entre  e bestianan cu nan ta usa tin galiña, cabritu, palomba, tortelduif i turtuga.

E Música di Santería

Música ta hunga un papel importante como un rasgo regular di adoracion den santería. Nan ta usa música durante bembé, esta, ceremonianan caminda ta bati tambú pa inbocá e diosnan. Nan ta toca ritmonan specífico pa yama un cierto dios. E zonido ta asina duru cu te leu bo ta tende e ritmo insistente di tambú.

Pa siglonan caba, gruponan religioso na West Africa ta usa instrumentonan di percusion, manera tambú i xilofon, of marimba. Esei tabata nan nificacion principal ora catibunan a bin América cu nan. Na Brazil, nan ta traha cueru pa tambúnan sagrado cu cueru di bestia sacrificá cu rito, i nan tin custumber di bautisá instrumentonan nobo, preferiblemente cu awa “bendita” di Iglesia Católico. Otro tambúnan ta representá un cierto dios, manera den e cultura afro-caribense di Haiti.

No ta straño pa haña riba mercado disconan compacto cu música sagrado di santería cu ta bisa esei abiertamente. Tambú ta e instrumento principal dje ritmo, i tin algun piesa cu tin títulonan cu en realidad ta nomber di diosnan di santería of dje custumbernan dje religion. Atrabes di tempu, e ritmonan aki a infiltrá den algun música latino. Tambe nan a hinca cierto expresionnan di santería den algun piesa musical.

Loke Bijbel Ta Bisa

Santería ta estrechamente conectá cu spiritismo, un forma di adoracion cu Bijbel ta condená. (Levítico 19:31) E Palabra di Dios ta mencioná e “práctica di spiritismo” entre “e obranan di carni” cu ta stroba un hende di heredá e Reino di Dios. (Galationan 5:19-21) Tambe e Scritura ta manda esnan cu ta deseá Dios su aprobacion pa “hui di idolatria” i “adorá e Tata cu spiritu i cu berdad.”—1 Corintionan 10:14; Juan 4:23, 24.

Cristiannan mester ta alerto p’e echo cu música i prácticanan di santería ta hañando un caracter mas seglar. Vários forma di diberticion i algun aspecto dje cultura latinoamericano ta conectá cu elementonan di santería. Esakinan ta birando mas popular i tur caminda hende ta mira nan como inofensivo. No obstante, cristiannan ta haci bon di evitá cualkier cos cu ta den conflicto directo cu principio bíblico, sin importá con popular e ta of con inofensivo e ta parce.—2 Corintionan 6:14-18.

[Kuadro/Plachi na página 25]

EXPRESIONNAN USÁ DEN SANTERÍA

Babalú-aye: Dios di sanacion adorá como “San” Lázaro.

Changó: Dios di candela, bos i weerlicht i tambe patrono di artileria, adorá como “Santa” Bárbara den e fe católico.

Ifa Corpus: Sistema di ley expresá den 256 símbolo cu ta representá tradicion di santería.

Ikole orun: E “shelu” caminda tur hende ta bai ora nan muri. Sin embargo, mal hende ta biba den fiernu riba tera i ta sufri den ikole orun.

Obatalá: Un dios cu a crea bida humano i conciencia for di substancia di tera.

Ochún: Diosa di riu, amor, matrimonio, placa, goso i abundancia, cu ta fungi tambe como Virgen de la Caridad, santu patrona di Cuba.

Oggún: Dios patrono di minero i obrero, adorá como “San” Pedro.

Oloddumare: E ser supremo, cu a crea universo.

Orumila: Un dios cu ta dicidí un persona su destino.

Yemayá of Xemayá: Diosa di laman i di fertilidad, cu ta ser identificá cu Bírgen Maria, of Virgen de Regla na Cuba.

[Plachi na página 24]

Artículonan di santería di show den un botánica