For di Nos Lectornan

Droga E seri “Droga Ta Tumando Control di Mundu?” (8 di november 1999) tabata bon investigá. Mi ta traha como un funcionario di reclassering den un área caminda tin hopi drogadicto hóben. E edicion aki lo yuda hopi sali for dje wega di droga.

J. T., Alemania

E relato di Pedro i su casá Ana, a animá mi mashá. Droga a ruiná mi bida seis aña largu. Dor di studia Bijbel i papia cu otro hende tocante loke mi ta siña, mi a haña e fortalesa spiritual pa sali for dje wega di droga.

D. J., Merca

Mi tin 15 aña ta duna les di salú na scol. E edicion aki di Spierta! tabata net na ora, ya cu actualmente nos ta tratando e tema di alcohol, droga i corementu di auto. Lo mi bai usa e informacion dje edicion aki sigur!

C. J., Merca

Bruheria Masha danki p’e artículo “Kico Tin Tras di Bruheria?” (8 di november 1999) Hopi hende tabata kere cu hacidónan di bruha ta mahos i bieu. Pero actualmente e movementu wicca ta atraendo hopi hende homber i muher hóben. Mi yu muher mes a cuminsá interesá den esaki. Sin embargo, el a pidi su mes abonament riba Spierta!, i e promé edicion cu a bini tabatin e artículo aki! El a yega na ora.

B. H., Merca

Mi tin 13 aña, i na scol mi a topa un mucha muher cu ta kere den bruheria. Un dia el a puntra mi kico mi ta pensa di esei. Mi a bis’é cu mi ta un Testigo di Jehova i cu mi no ta kere den usa poder oculto. E no a keda contentu i for dje dia ei, cada bes e tabata papia tocante e tema ei. Mi a haci oracion pidi Jehova yuda mi, i e yudansa a bini den forma dje artículo “E Punto di Bista Bíblico: Kico Tin Tras di Bruheria?” Mi a dun’é e artículo, i for di dia cu el a les’é, e no a sigui cuestioná mi opinion riba e tema.

K. E., Merca

Prueba Médico E relato di famia Major den e artículo “Nos A Siña Dependé Riba Dios den Adversidad” (8 di december 1999), a animá mi. Nos yu homber tabatin vários defecto serio di curason cu mester a operá. Dokternan a bisa nos: ‘Boso yu ta bai muri sin transfusion di sanger!’ E dokternan a asta separá ami cu mi casá for di otro pa aumentá e preshon riba nos pa consentí cu transfusion di sanger. Pero mescos cu famia Major, nos a haci oracion pidi forsa i curashi. Nos yu a sobrebibí e operacionnan i e ta bon-bon awor. El a expresá su deseo di bautisá como Testigo di Jehova.

B. C., Merca

Mi casá a ser hospitalisá, i dokternan di cu lo e por keda interná pa lunanan. Mi a cuminsá cansa di purba cuida tres yu i tambe bishitá mi casá tur dia. Mi rumannan cristian a resultá di ta baliosísimo den yuda mi cu e muchanan. Net ora mi a pensa cu mi no tabata por mas, mi casá a bin cas. Ora mi a lesa e artículo animador aki, mi no por a keda sin basha lágrimanan di sincero empatia i di tristesa pa tur loke e famia Major a pasa aden. Esta felis mi a keda di mira con nan a dependé riba Jehova!

J. A., Merca

Laser Robes? E artículo den “Observando Mundu” titulá “Dentista sin Dolor?” (8 di november 1999), a papia dje uso di “erbio, esta, YAG laser pa cirugia dental.” Esaki no mester tabata “neodimio: YAG”?

D. B., Cánada

Aunke Academia di Odontologia Laser ta describí e neodimio: YAG laser como “e rayo laser mas comunmente usá den odontologia,” un artículo den “The Journal of the American Dental Association” (augustus 1997, Volúmen 128, página 1080-7) ta mencioná e uso di erbio: YAG laser como esun describí den e revista “FDA Consumer.”—RED.