E Punto di Bista Bíblico

Ken Ta un Minister?

E ANOCHI bispu di Jesus su morto sacrificial, su amigunan mas cerá tabata den un discusion cayente. Segun Lucas 22:24, “a lanta un pleitu fuerte entre nan riba cua di nan a parce di ta mas importante.” Esaki no tabata promé biaha cu un discusion asina a lanta entre e apostelnan di Jesus. Na por lo ménos dos ocasion anterior, Jesus tabatin cu corigí nan manera di pensa.

Esta tristu cu riba e anochi crucial aki, Jesus a hañ’é ta recordá nan atrobe loke realmente un minister cristian mester ta. E di: “Laga esun cu ta mayor den boso bira manera esun menor, i esun cu ta actua como principal, como esun cu ta sirbi.”—Lucas 22:26.

No mester sorprendé nos cu e apostelnan tabatin un idea robes tocante e importancia di posicion i prominencia. Promé cu Jesus, ta escriba i fariseonan a duna nan e ehempel principal den asuntu di liderato religioso. I en bes di duna e pueblo guia i instruccion spiritual, e ministernan falsu aki a aprobá tradicion i reglanan estricto cu a “cera e reino di shelu dilanti hende.” Nan tabata hende egoista, cu a gusta puesto i buscamentu di prominencia, cu a haci nan obranan “pa hende mira.”—Mateo 23:4, 5, 13.

Un Tipo Nobo di Minister

Sin embargo, Jesus a introducí un concepto nobo di ministerio spiritual na su disipelnan. El a siña nan: “No laga hende yama boso Rabi, pasobra un so ta boso maestro, miéntras cu boso tur ta ruman. Ademas, no yama ningun hende boso tata riba tera, pasobra un so ta boso Tata, Esun celestial. . . . Pero esun mayor den boso mester ta boso sirbidó [of, minister].” (Mateo 23:8-11) E disipelnan di Jesus no mester a imitá e lidernan religioso di nan tempu. Si nan kier tabata berdadero minister, nan mester a imitá Jesus. Ki clase di ehempel el a laga?

Hopi bes Bijbel ta usa e palabra griego di·á·ko·nos pa “minister.” The Encyclopedia of Religion ta splica cu e palabra aki ta representá “no e puesto sino e relacion di sirbi entre e minister i esun cu e ta sirbi: sigui e ehempel di Cristo . . . ta e esencia dje comprendimentu cristian di ministerio.”

 Na armonia cu e definicion corecto dje palabra “minister,” Jesus a gasta su mes pa yuda otronan. El a splica cu pacenshi: “E Yu di hende a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:28) Jesus den un forma inegoista a usa su tempu, energia i abilidad pa yuda otro hende físicamente i spiritualmente. Di con? Pasobra el a sinti duele dje multitudnan abusá den sentido spiritual, cu a basha bin cerca dje. E kier a yuda. Amor generoso ta loke a motivá su ministerio, i e tabata kier pa su disipelnan desplegá e mésun actitud di duna.—Mateo 9:36.

Atrabes di su curso di bida, Jesus a pone e patronchi pa futuro ministernan. El a bisa: “E cosecha ta grandi, pero e trahadónan ta poco. P’esei, roga e Doño dje cosecha pa manda trahadó na su cosecha.” (Mateo 9:37, 38) Sí, e ministernan di Cristo lo mester tabata trahadó den e trabou mas grandi cu mundu a yega di mira: percurá consuelo spiritual na henter humanidad dor di predicá i siña otronan e bon nobo dje Reino di Dios.—Mateo 28:19, 20.

E enfoke aki riba duna i sirbi e necesidadnan di otro hende, ta loke a haci Cristo su manera di abordá e ministerio asina distinto. El a siña cu ministernan mester ta obrero, piscadó i wardadó spiritual, no místico ni académico bistí cu paña special i di ceremonia.—Mateo 4:19; 23:5; Juan 21:15-17.

E Punto di Bista Bíblico

Lamentablemente, cu pasamentu di siglonan hende a troce e concepto elevá i inegoista aki di mira ministernan como predicadó i maestro cu ta sacrificá nan mes. Loke a cuminsá como e ministerio cristian a para bira un institucion formal i di herarkia. Nan a forma órden i rangonan religioso, i a otorgá ministernan prestigio i poder i hopi bes nan a acumulá gran rikesa. Esaki a crea division. A desaroyá un clase di clero cu tabata dedicá principalmente na duna sacramento religioso i consehá esnan cu a dual. Cristianismo di promé siglo a cambia den e siglonan cu a sigui for di un religion activo caminda tur hende tabata minister, pa unu pasivo caminda solamente un man yen di personanan specialmente entrená i acreditá por a predicá i siña otronan.

Sin embargo, Bijbel ta identificá e minister cristian, no na paña special, rito elaborá, un salario ni decreto di estado, sino na su trabou inegoista. Apostel Pablo a describí e actitud cu ministernan cristian mester desplegá. El a animá nan pa no haci ‘nada motivá pa egoismo sino cu humildad di mente.’—Filipensenan 2:3.

Pablo sigur a practicá loke el a predicá. Pegando estrechamente na e patronchi di Cristo, e no a busca nunca su “mes bentaha sino esun dje hopinan, pa nan por ser salbá.” El a comprendé i a sinti profundamente su responsabilidad di “percurá e bon nobo sin costo,” pa manera el a bisa, “no abusá di mi autoridad den e bon nobo.” E no “tabata busca gloria di hende.”—1 Corintionan 9:16-18; 10:33; 1 Tesalonicensenan 2:6.

Esta un modelo sobresaliente di un berdadero minister cristian! Esnan cu ta imitá su excelente ehempel i ta cana den e patronchi inegoista cu Jesucristo a pone, dunando nan mes libremente pa percurá yudansa spiritual i consuelo dje bon nobo na otronan, ta mustra cu nan ta berdadero minister di Dios.—1 Pedro 2:21.