Smile—E Ta Bon pa Bo!

DJE CORESPONSAL DI SPIERTA! NA HAPON

ORA e ta sincero e ta dirti e ijs di sospecho. E ta eliminá e capanan di prehuicio cu a acumulá atrabes di añanan. E ta suavisá curasonnan cu a bira duru dor di duda i desconfiansa. E ta duna hopi hende alivio i goso. E ta bisa: “Mi ta comprendé. No wori.” E ta haci e apelacion: “Mi ta spera cu nos por ta amigu.” Kico e medio potente aki ta anto? Esei ta un smile of sonrisa. E por ta BO smile.

Kico ta un smile? Por lo general diccionarionan ta definí un smile como ‘un expresion di cara caminda e hukinan di boca ta curva un tiki bai ariba, expresando aprobacion, goso of cu algu ta pret.’ Ei ta sinta e secreto di un smile caluroso. Un smile ta un manera sin palabra, pa expresá bo sintimentunan of pa comunicá bo emocionnan na otro hende. Claro cu un smile por expresá tambe desprecio of menosprecio, pero esei ta un otro tema.

Di berdad un sonrisa ta haci un diferencia? Wel, bo ta corda un biaha cu e sonrisa di un hende a laga bo sinti aliviá of a relahá bo? Of ora cu un hende a keda sin smile i esei a haci bo nervioso of asta sinti bo rechasá? Sí, un sonrisa ta haci un diferencia. E tin un efecto tantu riba esun cu ta smile como riba esun cu ken el a smile. E personahe bíblico Job a bisa di su adversarionan: “Mi a duna nan un sonrisa—nan no kier ker’é—i e lus di mi cara nan no por a paga.” (Job 29:24) “E lus” di Job su cara kisas a indicá su splendor of alegria.

E efecto positivo di un sonrisa a keda mescos te awe. Un sonrisa caluroso por yuda aliviá tension acumulá. E por resultá di ta manera e valve di siguridad riba un pressure cooker. Ora nos ta sinti nos tenso of frustrá, un sonrisa por yuda nos aliviá e tension ei i trata cu nos frustracion. Por ehempel, Tomoko a ripará cu hopi bes hende a keda wak e. El a asumí cu nan a mira algu malu den dje, ya cu nan tabata kita nan cara lihé ora nan mira cu el a ripará cu nan ta wak e. Tomoko a sinti su mes solitario i infelis. Un dia un amiga a sugerí pa e smile ora e mira nan ta wak e. Tomoko a purba esaki pa dos siman, i a keda asombrá cu tur hende tabata smile bek cuné! Ayó tension. “Bida a bira ègt dushi,” e ta bisa. Sí, un smile ta  laga nos sinti mas cómodo cerca otro hende i ta yuda nos bira mas amigabel.

E Bon Efecto Riba Bo i Otronan

Smile por tin un efecto emocional riba un persona. E ta yuda pone bo den un estado di ánimo positivo. E ta bon pa e salú físico tambe. Tin un dicho: “Curason contentu ta bida largu.” De echo, autoridadnan médico ta comentá cu un hende su estado di ánimo tin hopi di haci cu su condicion físico. Tin hopi estudio cu ta indicá cu stres prolongá, emocionnan negativo i cosnan por estilo, ta debilitá nos sistema inmunológico. Di otro banda, ora nos smile nos ta sinti bon, i harimentu ta asta fortificá nos sistema inmunológico.

Un sonrisa tin un efecto grandi riba otro hende. Imaginá bo den un situacion caminda bo ta ricibiendo conseho of ta ser reprendé. Ki expresion lo bo kier mira riba cara dje consehero? Un expresion friu i severo por transmití rabia, iritacion, rechaso of asta hostilidad. Na otro banda, un sonrisa caluroso riba cara dje consehero lo no laga bo sinti mas trankil i pues mas receptivo pa e conseho? Definitivamente, un smile por yuda mengua malcomprendimentu den situacionnan tenso.

Pensamentunan Positivo Ta Laga Bo Smile Mas Fácil

Claro cu mayoria di nos no ta manera actornan profesional cu por dal un sonrisa rápido i radiante ki ora cu ta; ni nos no kier ta asina tampoco. Nos kier pa nos sonrisa ta natural i sincero. Un yufrou di scol cu ta duna les di comunicacion a comentá: ‘Ta importante pa relahá i duna un sonrisa sincero, sino bo sonrisa por parce artificial.’ Con nos por smile sinceramente di curason? Aki Bijbel por yuda nos. Relacioná cu nos abla, e ta bisa nos na Mateo 12:34 i 35: “For dje abundancia di curason e boca ta papia. Hende bon, for di su bon tesoro ta saca bon cosnan, miéntras cu hende malbado, for di su tesoro malbado ta saca cosnan malbado.”

Corda cu un smile ta un manera sin palabra pa comunicá nos sintimentunan na otro hende. Teniendo na mente cu nos ta papia “for dje abundancia di curason” i cu “bon cosnan” ta bini for di un “bon tesoro,” ta bisto cu e clave pa un sonrisa sincero ta sinta den nos pensamentu i emocionnan. Sí, loke tin den nos curason lo ser expresá sin duda, tardi of trempan. No solamente dor di nos palabra i accionnan, sino tambe dor di nos expresion di cara. Pues, nos tin cu sigui traha pa pensa riba cosnan positivo. Nos expresion di cara ta ser influenciá mashá dor di  loke nos ta pensa di otronan. P’esei, laga nos concentrá riba e bon cualidadnan dje miembronan di nos famia, di hende den nos bario i di nos bon amigunan. Nos lo ripará cu e ora ei lo ta hopi mas fácil pa smile cu nan. Esei lo ta un sonrisa sincero, pasobra tras di dje tin un curason yen di bondad, misericordia i amabilidad. Nos wowonan lo ta radiante, i otronan lo sa cu nos sonrisa ta sincero.

Sin embargo, nos tin cu admití sí cu pa cierto hendenan, debí na nan antecedente of ambiente, ta mas difícil pa nan smile cu pa otronan. Asta si nan curason ta yen cu bon boluntad pa nan próhimo, gewoon nan no tin e custumber di smile cu nan. Por ehempel, tradicionalmente ta ser verwagt di hombernan hapones pa nan tin un serenidad perfecto i pa nan mantené silencio na tur ocasion. P’esei, hopi di nan no tin custumber di smile cu hende cu nan ta considerá desconocí. Mescos por ta e caso den otro culturanan. Of tin hende por ta tímido di naturalesa i podisé nan no ta haña ta fácil pa smile cu otronan. Pues, nos no mester husga otro hende n’e grandura di nan smile ni n’e cantidad di bes cu nan ta smile. Hende ta distinto, i tambe nan característicanan i maneranan di comunicá cu otro.

No obstante, si bo ta haña cu ta difícil pa smile cu otro hende, pakico no traha riba dje? Bijbel ta consehá: “Laga nos no entregá den haci loke ta excelente . . . Laga nos obra loke ta bon pa cu tur.” (Galationan 6:9, 10) Un manera pa obra “loke ta bon” pa cu otronan ta dor di smile cu nan, i esaki ta algu cu bo por! Pues tuma e iniciativa den cumindá otronan i duna nan un palabra di animacion cu un sonrisa. Nan lo apreci’é mashá. Tambe, lo bo ripará cu segun bo desaroyá e custumber, ta bira mas fácil pa smile.

[Kuadro na página 12]

Un Palabra di Cautela

Ta un echo tristu cu no ta tur smile cu nos mira ta sincero. Estafadó, bendedónan sin escrúpulo i otronan ta dal bo un smile masha atractivo. Nan sa cu un sonrisa ta pone nan gana confiansa di hende i pone hende vigilá ménos. Hende di moral dudoso of cu motibunan impuru tambe por pone un sonrisa atractivo. Sin embargo, nan sonrisa ta bashí; nan ta engañoso. (Eclesiástes 7:6) P’esei, aunke nos no ta demasiado sospechoso di otronan, nos tin cu comprendé cu bibando den “e último dianan,” cu ta duru pa trata cuné, nos tin cu ‘demostrá di ta cauteloso manera colebra i tog inocente manera palomba,’ manera Jesus mes a recomendá.—2 Timoteo 3:1; Mateo 10:16.

[Plachi na página 13]

Tuma e iniciativa pa cumindá otronan cu un sonrisa