Un Les Grandi di un Isla Chikitu

RAPA NUI, un baranca volcánico casi sin mata, di 170 kilometer cuadrá, ta e parti di tera habitá mas isolá na mundu. * Awor henter e isla ta un monumento histórico, pa un parti debí na su estatuanan di baranca cu yama moai. Nan ta obra di un civilisacion cu un tempu tabata yen di bida.

Moai ta formá di baranca volcánico, i tin algun derá asina hundu cu ta nan cabes gigante so ta visibel. Den otro casonan, e curpa ta sali, i tin moai cu ainda tin nan dundu di baranca, yamá pukao, riba nan cabes. Pero mayoria estatua ta mitar trahá, den lugánan di coba piedra of ta plamá cantu di careteranan antiguo, como si fuera e trahadónan a djis benta nan hermentnan abou i cana bai laga e trabou. Esnan cu ta pará, ta varia di estatuanan isolá pa filanan di te cu 15 estatua, cada un cu su lomba pa laman. Ta di comprendé cu pa hopi tempu bishitantenan n’e isla tabata keda straño tocante e moai.

Den añanan recien, ciencia a cuminsá comprendé no solamente e misterio di moai, sino tambe con bin e civilisacion cu a traha nan i cu un tempu tabata asina próspero, a cai den otro. Remarcablemente, e echonan cu ta sali na cla, tin mas cu solamente balor histórico. Segun Encyclopædia Britannica, nan ta ofrecé “mundu moderno un les importante.”

E les ei tin di haci cu maneho dje tera, foral di su recursonan natural. Claro cu planeta tera ta hopi mas complicá i tin gran variacion biológico compará cu un isla chikitu, pero esei no kier men cu nos tin cu ignorá e les di Rapa Nui. Laga nos tuma un ratu anto, pa repasá algun punto sobresaliente dje historia di Rapa Nui. Nos relato ta cuminsá rond di aña 400 E.C., ora cu e promé famianan a yega e isla den nan canoanan cu por a crusa laman grandi. E único wowonan cu a wak esei tabata dje cientos di paranan di laman cu tabata bula den laira.

Un Isla Paradísico

E isla no tabatin un gran variedad di mata, pero sí e tabatin hopi mondi di palma, hauhau i palu di toromiro, ademas di matanan chikitu, vários sorto di yerba i lisinbein (varen). Tabatin por lo ménos seis sorto di para di tera cu tabata prosperá riba e isla remoto aki, entre nan palabrua, garabet, garza i lora. Rapa Nui tabata tambe “e lugá di brui mas ricu na para di laman den Polinesia i probablemente den henter Pacífico,” segun e revista Discover.

Kisas e colonisadónan a bin n’e isla cu galiña i djaka comibel, cu pa nan tabata un delicatesse. Tambe nan a trece mata di cosecha: taro, yams, batata dushi, bacoba i mata di caña. E tera tabata gordo, p’esei mesora nan a cuminsá rosa tereno i planta, un proceso cu a sigui segun cu e poblacion a crece. Pero Rapa Nui tabatin un área limitá i, maske e tabatin hopi mondi, su cantidad di palu tabata limitá.

E Historia di Rapa Nui

Loke nos sa dje historia di Rapa Nui ta basá principalmente riba tres campo di investigacion: análisis di pollen, arkeologia i paleontologia (estudio di fosil). Análisis di pollen ta encerá coge muestra di pollen for di sedimentu di dam i moeras. E muestranan aki ta revelá e variedad di mata i nan abundancia den transcurso di cientos di aña. Mas hundu e muestra  di pollen ta den fondo dje sedimentu, mas trempan ta e periodo cu e ta representá.

Arkeologia i paleontologia ta enfocá riba cosnan manera lugá di biba, artículonan di uso, moai i e restonan di bestia cu nan a usa pa cuminda. Como cu tur registro di Rapa Nui ta den forma di pintura i difícil pa decifrá, fechanan promé cu contacto europeo ta fechanan aproximá, i no por proba casi nada di loke ta ser asumí. Ademas, cierto desaroyonan, manera esnan describí aki bou, podisé ta extendé bai den e periodonan siguiente. Tur e fechanan, skirbí cu letter diki, ta di nos era.

400 Entre 20 pa 50 colonisadó polinesio ta yega, probablemente den canoanan dòbel di 15 meter of mas largu, cu por a carga mas di 8 ton cada un.

800 E cantidad di pollen di mata den sedimentu ta mengua, loke ta indicá cu destruccion di mondi tabata andando. Pollen di yerba ta aumentá, segun cu algun dje áreanan cu nan a rosa ta yena cu yerba.

900-1300 Rond di un tercer parti dje wesunan di bestia cu nan a coge pa cuminda durante e periodo aki ta wesu di dolfijn. Pa bin cu dolfijn for di laman grandi, e isleñonan a usa canoa grandi trahá dje stam di palmanan grandi. Palu di mata a percurá tambe material crudo pa traha e ekipo cu nan a usa pa move i traha e moai. P’e tempu ei nan construccion ya tabata hopi avansá. Aumento den agricultura i necesidad di mas palu pa candela ta sigui caba cu e mondinan.

1200-1500 Construccion di estatua ta na su punto máximo. E habitantenan di Rapa Nui ta hinca hopi recurso den construí moai i e plataformanan riba cua nan ta para. Arkeólogo Jo Anne Van Tilburg ta skirbi: “E structura social di Rapa Nui a stimulá enfáticamente e produccion di mas estatua i di tamaño mas grandi.” El a agregá cu nan “a producí aproximadamente 1.000 estatua durante un 800 pa 1.300 aña . . ., un pa cada shete te nuebe habitante, si calcul’é a base dje máximo di poblacion.”

Aparentemente nan no tabata adorá e moai, aunke den ritonan di agricultura i di entiero sí nan a hunga un papel. Kisas a considerá nan como habitacion pa spiritu. Ta parce cu nan a simbolisá tambe e poder, posicion i genealogia di nan constructor.

1400-1600 E poblacion ta yega su máximo di entre 7.000 pa 9.000 habitante. E último pida  mondi ta disparcé, pa un parti debí n’e extincion di paranan nativo, cu tabata polinisá e matanan i plama simia. “Sin excepcion, nan a caba cu delaster un especie nativo di para di tera,” segun Discover. Djaka tambe a contribuí n’e destruccion di mondi; evidencia ta mustra cu nan a come e fruta di palma.

Poco despues erosion ta gara e isla, riunan ta cuminsá seca, i awa ta bira scars. Wesunan di dolfijn ta stop di aparecé rond di aña 1500, posiblemente pasobra no tabatin suficiente palu grandi mas pa traha canoa cu por a subi laman grandi. Cualkier chens di scapa for dje isla ta disparcé awor. Segun cu e hendenan ta bira desesperá pa cuminda, nan ta caba cu tur para di laman. Nan ta come mas galiña.

1600-1722 Ausencia di palu, uso mas intenso di tera i suela agotá, ta contribuí na mas i mas cosecha cu ta bai perdí. Hende ta muri di hamber na gran escala. E pueblo di Rapa Nui ta dividí su mes den dos confederacion cu ta oponé otro. E promé indicacionnan di cáos social ta aparecé, posiblemente asta canibalismo. Esaki ta e temporada di gloria pa guereronan. Hende ta cuminsá biba den cueba pa proteccion. Rond di aña 1700, e poblacion ta baha te na mas o ménos 2.000 habitante.

1722 Exploradó hulandes Jacob Roggeveen ta e promé europeo cu ta descubrí e isla. Esei ta sosodé riba dia di Pascu di Resureccion, p’esei e ta yam’é Isla di Pascu. E ta registrá su promé impresion: “[Isla di Pascu su] aparencia desolá no por duna ningun otro impresion, sino di un lugá extraordinariamente pober i improductivo.”

1770 Alrededor dje tempu aki, gruponan rival dje habitantenan cu a resta di Rapa Nui ta cuminsá basha otro su estatua abou. Ora exploradó británico capitan James Cook ta bishitá e isla na 1774, e ta mira hopi estatua bentá abou.

1804-63 Contacto cu otro civilisacionnan ta aumentá. Sclabitud, cu p’e tempu ei ta comun den Pacífico, i malesa ta cobra hopi víctima den un forma cruel. E cultura tradicional di Rapa Nui ta yega esencialmente na un fin.

1864 P’e aña ei tur moai ta bentá abou, deliberadamente nan ta kita hopi di nan cabes afó.

1872 Solamente 111 nativo ta resta riba e isla.

Rapa Nui ta bira un provincia di Chile na 1888. Den añanan recien, Rapa Nui tabatin un poblacion mesclá di mas o ménos 2.100 habitante. Chile a declará henter e isla un monumento histórico. Pa por conserbá Rapa Nui su caracter i historia único, nan a pone hopi estatua bek riba pia.

Un Les pa Awe

Di con e habitantenan di Rapa Nui no a mira unda nan tabata bayendo i purba evitá desaster? Tuma nota dje comentarionan di vários investigadó relacioná cu e situacion.

“Mondi . . . no a djis disparcé den un dia, el a disparcé poco-poco, atrabes di décadanan. . . . Cualkier isleño cu a purba spierta tocante e peligernan di destruccion progresivo di mondi, lo a ser vencí dor di labradó, burócrata i hefenan cu tabatin interes special den mantené e condicion ei.”—Discover.

“E prijs cu nan a paga p’e manera cu nan a scoge pa expresá nan ideanan político i spiritual, tabata un mundu di isla cu den hopi sentido a resultá solamente un sombra di su naturalesa anterior.”—Easter Island—Archaeology, Ecology, and Culture.

“Loke a pasa cu Rapa Nui a indicá cu crecementu descontrolá i e impulso pa manipulá e medio ambiente mas ayá di su punto crucial, no tabata meramente aspectonan dje mundu industrialisá; nan tabata algu típico dje caracter humano.”—National Geographic.

Kico si e asina yamá algu típico dje caracter humano no cambia awe? Kico si humanidad sigui persistí pa imponé riba nos tera—nos isla den espacio—un estilo di bida cu ecologia no por mantené? Segun un escritor, nos tin un gran bentaha riba Rapa Nui. Nos tin e ehempelnan spiertador di “historia di otro sociedadnan ruiná.”

 Sin embargo, kisas un hende ta puntra: Humanidad ta tumando nota dje historianan aki? E echo cu destruccion di mondi i extincion continuo di cosnan bibu di tera ta sigui na un velocidad alarmante, ta indicá cu no. Den e buki Zoo Book, Linda Koebner ta skirbi: “E eliminacion di un of dos of cincuenta especie lo tin efectonan cu nos no por predicí. Extincion ta crea cambio, asta promé cu nos comprendé e consecuencianan.”

Un vandalista cu unu-unu ta kita un bout for di un avion, no sa cua bout lo pone e avion cai; pero ora e bout crucial ei bai, e destino dje avion ta seyá, maske kisas e avion no ta cai n’e promé vuelo cu sigui. Mescos tambe, hende ta eliminando e “boutnan” bibu di tera na un velocidad di 20.000 especie pa aña, sin señal di ta baha man! Ken sa ki ora nos ta yega n’e punto cu nos no por bira bek? I si acaso nos sa esei di antemano, realmente lo e haci un diferencia?

E buki Easter Island—Earth Island (Isla di Pascu—Isla di Tera) a haci e comentario significativo aki: “E persona cu a kap e último palu [riba Rapa Nui] por a mira cu esei tabata e último palu. Pero tog el a kap e.”

“Nos Tin Cu Cambia Nos Religion”

“Si tin cualkier speransa,” e buki Easter Island—Earth Island ta agregá, “esei sigur ta den e idea cu nos tin cu cambia nos religion. Nos diosnan actual di crecementu económico, ciencia i tecnologia, nivel di bida cu ta subi continuamente, i e birtudnan di competencia—diosnan cu nos ta considerá todopoderoso—ta manera e estatuanan gigante riba e plataformanan di Isla di Pascu. Cada pueblito a competí cu su bisiña pa lanta e estatua di mas grandi. . . . Mas i mas esfuerso a bai den trabou di forma, move i lanta e estatuanan. Un trabou cu a gasta hopi recurso . . ., pero cu tabata inútil.”

Un persona sabí a yega di bisa: “E caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” (Jeremías 10:23) Nos Creador ta e único cu por mustra nos con pa ‘dirigí nos paso.’ Tambe e ta e único cu por saca nos for dje condicion tristu cu nos ta den. I el a primintí di haci esaki den su Palabra, Bijbel, un buki cu tambe a registrá hopi ehempel bon i malu di civilisacionnan di pasado. En berdad, e buki aki por ta un ‘lus pa nos caminda’ den e tempu scur aki.—Salmo 119:105.

Cu tempu, e caminda ei lo hiba hende obediente na un paradijs di pas i abundancia, un mundu nobo cu lo incluí e pida lugá ei den Sur Pacífico cu yama Rapa Nui.—2 Pedro 3:13.

[Nota]

[Mapa na página 15]

(Pa e teksto den su formato kompleto, wak e publikashon)

Isla di Pascu

[Rekonosementu]

Mountain High Maps® Copyright © 1997 Digital Wisdom, Inc.

[Plachi na página 15]

“A producí aproximadamente 1.000 estatua”

[Plachinan na página 17]

Henter e tera, incluso islanan remoto, lo bira un paradijs