E Punto di Bista Bíblico

Decoracion di Curpa—Mester Ta Razonabel

“BANIDAD ta e trampa di inteligencia,” un novelista frances a skirbi. Inteligencia of e facultad di razoná, sigur no tabatin muchu di haci cu hopi dje cosnan cu hende a haci cu nan curpa atrabes di siglonan pa motibu di banidad. Por ehempel, den un intento pa por tin e cintura mas smal posibel, muhernan di siglo 19 dolorosamente tabata hala nan barica cera cu corset te n’e punto cu apénas nan por a hala rosea. Tabatin di nan cu a bisa cu nan cintura ta midi 32 centimeter so. Corset di algun muher tabata asina stijf mará, cu el a pusha nan repchinan den nan higra i mata nan.

Aunke, felismente, e locura dje moda ei a caba na nada, e banidad cu a producié ta mes bisto awe cu e tabata e tempu ei. Te ainda hende homber i muher ta pasa dor di proceduranan difícil, asta peligroso, afin di cambia nan aparencia natural. Por ehempel, salonnan di tatuahe i di ‘piercing,’ cu un tempu tabata ser frecuentá solamente pa elementonan ménos respetá di sociedad, ta lantando di ripiente den centronan comercial i suburbio. De echo, den un aña recien na Merca, negoshi di tatuahe tabata na di seis lugá entre e negoshinan cu ta bende por detal cu tabata crece mas lihé.

Formanan mas extremo di decoracion di curpa tambe ta aumentando, foral cerca hóbennan. Boramentu extenso di buracu na partinan di curpa pa bisti renchi (piercing)—incluso na punta di pechu, nanishi, lenga i asta na órganonan genital—ta birando masha popular. Pa un grupo chikitu, e boramentu extenso ei ya caba a perde smak. Nan ta purbando prácticanan mas extremo manera, marca curpa cu heru cayente, corta curpa, * i haci escultura cu curpa, esta, nan ta hinca obhetonan bou di cueru pa producí buracu i bultonan extravagante.

Un Práctica Antiguo

Decorá i modificá curpa no ta algu nobo. Den cierto partinan di África, hende pa siglonan a usa tatuahe i sicatris ritual pa identificá grupo of tribunan specífico di famia. I ta interesante cu den hopi dje paisnan aki, nan no ta aprobá mas dje prácticanan aki i nan ta menguando.

Den tempu bíblico, a existí tatuahe, boramentu i cortamentu di curpa.  Mayoria bes tabata nacionnan pagano cu a practicá e cosnan ei en coneccion cu nan religion. Ta di comprendé cu Jehova a prohibí su pueblo, e hudiunan, pa imitá e paganonan ei. (Levítico 19:28) Dje manera ei e hudiunan, como Dios su propio “propiedad special,” a ser protehá di prácticanan religioso falsu i degradá.—Deuteronomio 14:2.

Libertad Cristian

Cristiannan no ta bou dje Ley di Moises, aunke e Ley ta describí cierto principionan cu a pasa over pa e congregacion cristian. (Colosensenan 2:14) Pues cristiannan por expresá nan mes denter dje límite di loke ta apropiado, ora ta trata dje tipo di adorno cu nan ta scoge pa usa. (Galationan 5:1; 1 Timoteo 2:9, 10) Sin embargo, e libertad aki no ta sin límite.—1 Pedro 2:16.

Pablo a skirbi na 1 Corintionan 6:12: “Tur cos ta legal pa mi; pero no ta tur cos ta bentahoso.” Pablo a comprendé cu su libertad como cristian no a dun’é permit pa haci kico cu e tabata kier sin tene cuenta cu otro hende. Amor pa otro hende a influenciá su comportacion. (Galationan 5:13) El a urgi pa ‘no vigilá cu interes personal boso mes asuntunan so, sino tambe cu interes personal den asuntu dje otronan.’ (Filipensenan 2:4) Su punto di bista inegoista ta sirbi como un excelente ehempel pa cualkier cristian cu tin pensá di haci un of otro forma di decoracion di curpa.

Principionan Bíblico pa Tene Cuenta Cuné

Un dje mandatonan cu cristiannan tin, ta di predicá i siña otro hende e bon nobo. (Mateo 28:19, 20; Filipensenan 2:15) Un cristian lo no kier laga nada, incluso su aparencia, stroba otro hende di scucha e mensahe ei.—2 Corintionan 4:2.

Maske decoracionnan di curpa manera piercing of tatuahe por ta popular cerca algun hende, un cristian tin cu puntra su mes: ‘Ki clase di reaccion un decoracion asina lo provocá den e área caminda mi ta biba? Nan lo asociá mi cu cierto figuranan straño di sociedad? Asta si mi concenshi permití mi hacié, ki efecto mi piercing of tatuahe lo tin riba otronan den congregacion? Nan lo mir’é como un evidencia di “e spiritu di mundu”? Kisas esei por pone mi “sano huicio” na duda?’—1 Corintionan 2:12; 10:29-32; Tito 2:12.

Cierto tipo di modificacion di curpa ta carga riesgonan médico serio. Tatuahe hací cu angua sushi a ser asociá cu plamamentu di hepatítis i HIV. Tin biaha e ink cu nan ta usa ta causa problema di cueru. Piercing por tuma lunanan pa cura i e por keda haci dolor durante mayor parti dje tempu ei. Tambe e por producí venenamentu di sanger, sangramentu, klompi di sanger, daño na nervio i infeccionnan serio. Ademas, no ta fácil pa boltu algun dje proceduranan bek. Por ehempel, dependiendo dje tamaño i color, por tin mester di vários sesion doloroso i caru cu laser pa kita un tatuahe. Piercing por causa sicatris cu ta keda pa bida largu.

Ta un persona su decision personal si e ta dicidí pa aceptá e riesgonan aki of no. Pero un persona cu ta trata na agradá Dios ta reconocé cu bira un cristian ta encerá ofrecé bo mes na Dios. Nos curpa ta un sacrificio bibu presentá na Dios p’e usa. (Romanonan 12:1) Pues anto, cristiannan maduro no ta mira nan curpa como nan propiedad exclusivo cu nan por daña of desfigurá manera nan kier. Foral esnan cu ta cualificá pa hiba delantera den e congregacion ta personanan conocí pa nan custumbernan moderá, nan sano huicio i cualidad razonabel.—1 Timoteo 3:2, 3.

Desaroyá i ehercé e facultad di razoná bíblicamente entrená lo yuda cristiannan evitá prácticanan extremo i masokista dje mundu aki cu ta totalmente “alehá for dje bida cu ta pertenecé na Dios.” (Efesionan 4:18) Dje manera ei nan por laga tur hende mira cu nan ta razonabel.—Filipensenan 4:5.

[Nota]