Observando Mundu

Biba pa e Milenio

“Ta prácticamente bon establecí cu hende cu ta hopi malu ta tene duru pa keda na bida pa nan por mira sucesonan importante,” segun Richard Suzman dje Instituto Nacional di Biramentu Bieu, na Bethesda, Maryland, Merca. “Con esei ta tuma lugá precis ta un misterio, pero e fenómeno ta masha real.” Aparentemente dor cu hopi hende tabata decididu pa ta na bida pa mira aña 2000, mas cu e promedio normal di hende a muri durante e promé siman dje aña nobo, segun e korant The Guardian di Londen. Na Gran Bretania, 65 porciento mas tantu hende a muri e siman ei, i na New York City, e cantidad di morto a subi mas cu 50 porciento, compará cu e promé siman di 1999. Robert Butler, presidente dje Centro Internacional di Largura di Bida, a bisa cu e aumento dje cifranan aki a keda reflehá rond mundu. El a agregá: “E boluntad pa biba por ta basta poderoso.”

Nabegacion via Computer

Danki na tecnologia electrónico, barcunan kisas lo no tin mester di cantidad di mapa riba papel mas pa nabegá, segun The Daily Telegraph di Londen. Na november 1999, e Organisacion Marítimo Internacional, via e departamento aleman di mapa di awanan, pa promé bes a duna permit pa un sistema di nabegacion di barcu basá únicamente riba computer. En bes di mapanan riba papel, e computer ta ofrecé dos version electrónico: un copia di scan dje mapa di papel i un version digital conocí como un mapa vector. Un bentaha clave dje mapa electrónico ta cu e ta mustra e barcu su berdadero posicion na tur momento. I, dor di pone un mapa transparente di radar riba e screen dje computer, nabegantenan tin un control extra riba peligernan den nan caminda. Un capitan di barcu, entusiasmá cu e desaroyo aki, a bisa: “Esaki ta aliviá nos carga . . . di manera cu nos por concentrá mas riba stuur e barcu, movementu di tráfico, otro barcunan i, ora di acercá un haf, riba kico nos loods ta haciendo.”

Extraterestre Ta Improbabel

“Den e último par di décadanan, un cantidad creciente di astrónomo a propagá e punto di bista cu probablemente tin civilisacionnan di extraterestre plamá entre e streanan,” segun The New York Times. “E credo aki di extraterestre a stimulá no solamente un cantidad incontabel di buki, película i programanan di television . . . sino tambe un búskeda científico largu, cu ta usa dishnan di antena inmenso pa inspeccioná shelu en busca di señalnan swak di radio for di extraterestrenan inteligente.” Segun dos científico prominente, dr. Peter D. Ward i dr. Donald C. Brownlee, autornan dje buki Rare Earth, muy probablemente e búskeda ei lo fracasá. Nan ta bisa cu descubrimentunan nobo den astronomia, paleontologia i geologia, ta mustra cu “Tera su composicion i stabilidad ta extraordinariamente inusual” i cu condicionnan na otro parti no ta sirbi pa formanan di bida complicá. Segun dr. Ward: “Por fin nos a bisa na bos haltu loke masha hopi hende tabata pensa pa masha hopi tempu, esta, cu bida complicá, por lo ménos, ta masha scars.” Dr. Brownlee ta agregá: “Hende ta bisa cu Solo ta un strea típico. Esei no ta berdad. Casi tur ambiente den e universo no ta sirbi pa bida. Ta solamente lugánan cu ta Hofi di Eden manera [nos] Tera, ta caminda bida por existí.”

Ta Traducí Bijbel den Mas Idioma

E korant mexicano Excelsior ta comentá cu “Bijbel ta sigui ta e buki mas traducí na mundu.” Segun e Sociedad Aleman di Bijbel, na 1999 a traducí Bijbel den 21 idioma mas, loke ta hacié awor disponibel, por lo ménos en parti, den 2.233 idioma. Di e cantidad aki, “e Testament Bieu i e Testament Nobo ta traducí completo den 371 idioma, 5 mas cu na 1998.” Na unda bo ta haña tur e idiomanan aki? “E variedad mas grandi di traduccion nos ta haña na África, cu 627, siguí pa Asia, cu 553, Australia/Pacífico, cu 396, Latinoamérica/Caribe, cu 384, Europa, cu 197, i Merca, cu 73,” segun e korant. Tog, “Bijbel no a ser traducí den ni sikiera mitar di tur e idiomanan cu hende ta papia riba tera.” Di con no? Pasobra relativamente tiki hende ta papia e idiomanan ei, i traducí Bijbel den e idiomanan ei ta un desafio. Tambe, tin hopi hende cu ta papia dos idioma, i si Bijbel no ta imprimí den un di nan idiomanan, nan por les’é den un otro idioma.

 Municion Bentá Afó

Último tempu piscadónan italiano ta cogiendo den nan netnan cosnan cu nan a preferá di no a pisca: armanan kímico. Segun Valerio Calzolaio, subsecretario dje Ministerio di Medio Ambiente di Italia, “for di 1946 te cu añanan ’70 . . ., e custumber tabata pa deshací di municion bieu dor di benta nan den laman.” Ta ser calculá cu tin rond di 20.000 bom drumí den fondo di laman Adriático, na e costa oost di Italia. Pa 1997, 5 piscadó italiano a muri i 236 mester a keda hospitalisá, como resultado dje efectonan di kímico mortal cu ta lek for di municion frusá cu a bin ariba den nan net. Loke ta empeorá e problema ta cu den e mésun awanan ei, avionnan di guera a tira afó un cantidad no-revelá di bom durante e reciente conflicto na Balkan, i algun dje bomnan aki a ser “piscá” caba den net di piscadó. No ta awanan italiano so ta afectá. Segun cálculo, tin 100.000 ton di arma kímico drumí den fondo di laman Báltico, i ta conocí cu dùmpnan similar ta existí den awanan na costa di Hapon, Merca i Gran Bretania.

Cifranan Exagerá

The Economist ta declará: “No kere semper loke bo ta lesa den korant.” Reporteronan “no ta infaliblemente exacto.” Esaki ta berdad particularmente ora ta trata di estadística, foral esnan relacioná cu desaster. Di con? Segun e artículo, “den e confusion di guera of di un catástrofe durante tempu di pas, ta claro cu ta imposibel pa sa sigur cuantu hende a muri of a ser lesioná.” Pa satisfacé e curiosidad di hende, reporteronan ta duna cifranan calculá, hopi bes cifra haltu, i “rara bes ta reducí nan cálculonan segun cu tempu pasa.” E motibu? “Reporteronan kier promové nan relato, redactornan nan korant, trahadónan cu ta duna auxilio nan agencia. Asta funcionarionan di gobiernu kisas kier haña simpatia.” E revista ta recomendá lectornan pa “tene cuidou cu exactitud engañoso, cu cifranan cu ta bisto cu nan ta muchu haltu i cu e reporteronan su tendencia persistente di exagerá.” I ta agregá: “Loke sea e poder di prensa en general, ora ta trata di mata hende, di berdad pen ta mas poderoso cu spada.”

Tene Cuidou cu Bestia di Cas

Segun e korant frances Le Monde, 52 porciento di hogar na Francia tin bestia di cas. Sin embargo, un estudio recien di un grupo di veterinario dje Instituto di Inmunologia Comparativo di Bestia, na Maisons-Alfort, Francia, ta mustra cu e schimmel i parasitnan cu Francia su 8,4 miyon pushi i 7,9 miyon cachónan ta carga, ta responsabel pa vários malesa dje doñonan di bestia di cas. E malesanan aki ta entre otro, renwer, bichi di tripa, sarna, infeccion di leishmaniásis i toxoplasmósis. Toxoplasmósis por pone hende muher na estado perde barica of causa malformacion di feto. Tambe e informe ta mencioná e hopi reaccionnan alérgico cu bestia di cas ta causa i e infeccionnan cu ta resultá di mordé di cachó; tin rond di 100.000 mordé di cachó pa aña na Francia.

Ecosistema di Boca

“Científiconan di Universidad di Stanford a descubrí 37 organismo único i nobo den un dje ecosistemanan mas variá na mundu: boca humano,” segun The Toronto Star. Esaki ta aumentá e tiponan conocí di bacteria oral na mas cu 500, “un variedad asina grandi cu e por competí cu esun dje selva di yobida tropical, cu hende hopi bes a considerá como e culminacion di rikesa biológico.” E bacterianan ta perhudicial? Despues di a descubrí e organismonan nobo den placa oral, microbiólogo dr. David Relman a declará: “E variedad ei ta hopi trankilisante pasobra e ta percurá stabilidad i proteccion.” E korant ta agregá cu expertonan ta pensa cu mayoria tipo di bacteria “ta percurá comodidad, proteccion i nutricion.” Ta un par so ta causa problemanan manera putrimentu di djente, malesa di encia i mal aliento.

Guera Ta Aumentá

E korant aleman Siegener Zeitung ta informá cu “e cantidad di guera a sigui aumentá” na 1999. E Grupo di Estudio pa Investigá e Causanan di Guera, na Universidad di Hamburg, a conta 35 conflicto armá na 1999, 3 mas cu e aña promé. Di nan, 14 tabata na África, 12 tabata na Asia, un tabata na Europa i e otronan tabata na Medio Oriente i Latinoamérica. I fin di guera no ta na bista, segun e grupo di estudio. De echo, “ocho guera a aparecé riba e lista dje aña aki pa promé bes, entre nan e conflictonan violento na Chechenia, Nepal, Kirgizstan i Nigeria.” Un motibu ta cu algun causa di conflicto por keda cushi bou di superficie pa un periodo largu di tempu, promé cu nan explotá den conflicto armá of guera total.