Un Emperador Asombroso

E PINGWIN emperador (keizerpinguïn) ta esun mas grandi di tur pingwin, i ta midi mas cu un meter haltu i por pisa te cu 40 kilo. Ora otro pingwinnan ta coge cabes pa nort pa scapa di Antártica su winter cruel i scur, e emperadornan ta coge cabes pa zuid, rumbo pa Antártica! Di con? Sorprendentemente, pa nan bai brui.

Ora e emperador hembra pone su webu, e machu ta schep e lihé for di riba e ijs i pon’é riba su pata. Caba e ta hink’é bou di su sacu di brui, cu ta un pida cueru doblá parti abou di su barica. Anto e hembra ta coge rumbo pa laman grandi i cuminda. Pa 65 dia, durante e parti mas pisá di winter, e machu ta keinta e webu miéntras e ta biba di su vet di curpa. Tormentanan severo di sneu, cu bientu cu por yega 200 kilometer pa ora, ta suta e paranan aki. Pa tog conserbá nan cayente di curpa, e paranan sabí aki ta krimp huntu den gruponan grandi, cada un tumando turno na e rand pafó, cu su lomba pa bientu.

Cu un taiming increibel, e webu ta brui precis ora e hembra bolbe bek. Pero con e hembra ta haña su partner entre e miles di pingwinnan idéntico? Cu un cantica. Na principio di nan enamoracion, e pareha tabata canta pa otro, i nan a memorisá e cantica di otro. Ora e hembranan bolbe, machu cu hembra ta canta tur cu tin. Si tabata hende, hende lo a keda completamente confundí p’e cacofonia, pero den corto tempu e emperadornan ta haña nan partner. Anto, despues di entregá cu mala gana e puitu recien nací n’e mama, e machunan casi morto di hamber tin cu yanga bai na pia of lastra riba barica riba ijs pa un 70 kilometer en busca di laman grandi i cuminda.

[Rekonosementu pa Potrèt na página 31]

Pa cortesia di John R. Peiniger