Cincuenta Aña Ta Pinta Porcelana

SEGUN E RELATO DI ALFRED LIPPERT

MAMA tabata kier pa mi bira carpinté. Pero mi meneer di scol a urgié pa busca un trabou pa mi na e fábrica di obra di man di porcelana, banda di nos cas na Meissen, Alemania. Di con el a insistí tantu asina? Su bista penetrante a ripará cu mi tabatin talento pa pinta. Mi stima mi mama, pero mi ta contentu cu cos a bai manera mi meneer di scol tabata kier. Pues, na edad di 14 aña, mi a cuminsá siña con pa pinta algun dje porcelananan trahá na man mas bunita na mundu.

Pa casi 300 aña, hende ta traha porcelana na Meissen. Ta aki na Meissen na aña 1710, nan a establecé e promé fábrica na Europa cu a cuminsá producí porcelana auténtico. Rond di 30 aña despues, e fábrica a establecé un scol caminda hóbennan por a siña e arte di pinta riba porcelana. E scol aki, cu ta habrí ainda i cu awor e Fábrica di Porcelana Meissen ta operá, ta caminda mi a cuminsá como un pintor tímido di porcelana.

N’e scol mi a siña tambe e detayenan mas fini di pinta cuadronan di flor, palu, bestia i para. E les aki a pone e fundeshi pa e trabou cu mi a bin haci despues.

Cu Glazuur of sin Glazuur?

Porcelana ta un cerámica cu bo por pinta den dos manera básico. Por haci e pintura promé cu pone glazuur riba e cerámica. Pero porcelana sin glazuur ta poroso i ta absorbá tur e color, p’esei bo mester concentrá bon ora di pint’é, ya cu mayoria eror bo no por corigí. Di otro banda, por pinta e porcelana despues cu a glazuur e. Pinta decoracionnan di flor den e manera aki a bira mi specialidad. E trabou aki no a encerá pinta so, sino tambe diseñá bukèt individual pa cada artículo di porcelana. Pues una bes e pintor a siña concentrá riba su trabou i evitá distraicion, e ta siña usa su imaginacion pa componé algu bunita.

Despues di a pinta decoracionnan floral pa vários aña, mi a pasa finalmente na e categoria di mas difícil di tur, esta, pinta cuadro di criaturanan bibu. Aki ta caminda di berdad mi a probechá di loke mi a siña anteriormente tocante pinta bestia i para.

 Un Reto Sumamente Excitante

Pinta bestia, piscá i para ta presentá un reto excitante, pasobra cada criatura tin cu parce bibu, no stijf manera un flor of un palu. E artista mester sa algu dje anatomia i custumber dje bestia i paranan cu e ta pinta. Por ehempel, hopi dje esenanan cu ami ta pinta tin bestia di mondi, entre nan biná machu cu cachu masha grandi.

Ora ta trata di siña tocante bestia, no tin nada mas mihó cu observacion personal. Algun aña pasá, mi a planea pa pinta un seri di cuadro di piscá, pues mi a cumpra un acuario i a pone tur sorto di piscá den dje. Ami cu mi casá tabata sinta dilanti dje acuario pa oranan largu, observando e movementu i custumbernan di cada sorto di piscá. Ta te despues cu mi a familiarisá mi mes cu nan, mi a cuminsá pinta nan.

Kico Ta Haci un Hende un Bon Pintor?

Tin biaha amigunan ta puntra mi kico ta haci un hende un bon pintor di porcelana. Ta claro cu e pintor mester tin talento artístico, un bista skerpi i un man firme. Pero e tin mester di mas cos. Pa ta un artista exitoso, un persona mester tin e actitud corecto pa loke ta su mes, su trabou i otro hende. Un bon pintor ta un artesano cu ta train su mes pa traha duru pa mehorá su abilidad. E sa cu sea bo ta usa bo abilidad, of bo ta perd’é. Nunca e no ta stop di siña, ya cu e ta scucha loke otronan ta bisa i ta aceptá nan conseho.

Un último punto. E artista experenciá ta masha conciente dje deseonan dje cliente. Hende ta cumpra porcelana trahá na man, no pasobra nan kier un artículo di tur dia cu nan lo keda cuné pa un tempu i despues ta tir’é afó i cumpra un otro. E cliente kier un obra di arte, un artículo di balor cultural; algu cu ta hala atencion, cu ta alegrá e curason i ta enrikesé bida di su doño. E pintor ta contentu di por aportá na satisfacé e deseonan ei.

Pintamentu Ta Hiba na Fe den Dios

Mi trabou como pintor a duna mi e estímulo pa analisá Bijbel i pa desaroyá fe firme den Dios. Con? Wel, tabatin biaha cu mi a traha cu expertonan di para, pa pinta plachi pa buki cu nan tabata traha ariba. Tempu mi a cuminsá pinta plachinan asina, mi tabata kere den evolucion. Pero, contacto estrecho cu vários autor a hiba na combersacionnan tocante e orígen di bida. I e combersacionnan ei a cambia mi punto di bista.

Loke a impresioná mi tabata cu apesar cu tur experto tabata kere den evolucion, cada un tabatin su mes teoria, cu hopi bes tabata contradicí esnan di otro experto. Te asina leu cu mi por mira, no tin un teoria consistente di evolucion. Pues, mi a concluí cu si e expertonan mes no por yega na un acuerdo en cuanto un splicacion consistente di evolucion, con otro hende lo por? Asina mi creencia den evolucion a muri un morto natural. E único otro alternativa pa evolucion ta cu bida riba tera ta producto di creacion. Ei ta caminda mi a cuminsá kere den nos Creador.

Mi ta asina contentu cu hende ta disfrutá awor di mi trabou, i esei ta laga mi sinti bon. Nunca lo mi perde mi amor pa pintamentu of mi amor pa porcelana.

[Rekonosementu pa Potrèt na página 17]

Potretnan na página 16 i 17: Mit freundlicher Genehmigung der Staatlichen Porzellan-Manufaktur Meissen GmbH