Con Mi Por Trata cu Intimidacion Sexual?
Hóbennan Sa Puntra . . .
Con Mi Por Trata cu Intimidacion Sexual?
“Mucha hombernan ta fluit i pis bo.”—Carla, Irlanda.
“Mucha muhernan ta keda bel bo ketu bai. Nan ta purba kibra bo resistencia.”—Jason, Merca.
“El a keda ta mishi cu mi brasa i purba tene mi man.” —Yukiko, Hapon.
“Mucha muhernan ta haci co’i frescu cu mi.” —Alexander, Irlanda.
“For di bus di scol, un mucha homber a keda grita algun comentario den mi direccion. E no kier a ègt bai sali cu mi. Gewoon e kier a molestiá mi.”—Rosilyn, Merca.
KEDA wak un hende pa haci co’i frescu cuné, un “compliment” cu conotacion sexual, un chiste sushi i mishi na un forma claramente sexual—tal trato, ora e ta indeseá i ta sosodé cada bes, hopi bes ta loke por cai bou di intimidacion of molester sexual. Aunke ta difícil pa haña estadísticanan mundial, encuestanan ta indicá cu mayoria hóben di edad escolar na Merca a experenci’é.
Kico precis ta intimidacion sexual? E buki Coping With Sexual Harassment and Gender Bias (Con pa Enfrentá Intimidacion Sexual i Prehuicio di Sexo) di dr. Victoria Shaw, ta definié como “molestiá un hende den un manera sexual . . . Esei por ta den forma físico (manera dor di mishi cu un hende den un forma sexual), verbal (manera dor di haci comentarionan indeseá tocante un persona su aparencia) of no-verbal.” Tin biaha e intimidacion por encerá proposicionnan indecente.
Mayoria molester na scol ta bini probablemente di bo pareunan. Sin embargo, den algun caso tabata adultonan, manera e maestronan, cu a comportá nan di manera ofensivo. Un artículo den e revista Redbook ta speculá cu e cantidad relativamente chikitu di maestro cu realmente ta ser sentenciá pa ofensanan sexual “ta representá probablemente djis e punta dje ijsberg.”
Asta den tempu bíblico hende muher—i tin bes hende homber—a haña e maltrato ei. (Génesis 39:7; Rut 2:8, 9, 15) I Bijbel a haci e pronóstico scur aki: “Den e último dianan lo tin tempu difícil. Hende lo ta egoista, golos, bromadó i arogante; nan lo ta insultante . . . ; nan lo ta sin bondad, sin misericordia, calumniadó, violento i feros.” (2 Timoteo 3:1-3, Today’s English Version) Pues ta posibel, asta probabel, cu lo bo haña bo cu molester sexual.
Con Dios Ta Mir’é
Ta berdad cu comportacion sexualmente agresivo no ta preocupá tur hóben. Talbes algun ta hañ’é pret, of asta leuk. Un encuesta mericano alarmante a mustra cu entre e víctimanan di intimidacion sexual, 75 porciento a admití cu nan mes a yega di molestiá otronan. Algun adulto ta empeorá e problema dor di haci manera cos cu comportacion sexualmente agresivo no ta dje serio ei, i ta rechas’é como simpel experimento infantil. Pero con Dios ta mir’é?
E Palabra di Dios, Bijbel, ta condená bon cla tur forma di intimidacion sexual. Bijbel ta bisa nos pa no “abusá dje derechonan” di otro hende dor surpasá límitenan sexual. (1 Tesalonicensenan 4:3-8) De echo, specíficamente e ta manda hombernan hóben pa trata “hende muher mas hóben manera ruman cu tur puresa.” (1 Timoteo 5:1, 2) Ademas, Bijbel ta condená “chiste obseno.” (Efesionan 5:3, 4) P’esei, bo tin derecho di sinti bo rabiá, perturbá, confundí i asta humiyá ora nan molestiá bo sexualmente!
Kico Mi Tin cu Bisa?
Pues anto, con bo mester reaccioná si un hende ta molestiá bo den e manera aki? Tin biaha un contesta slap of vago ta pone e molestiadó purba mas tantu. Bijbel ta conta nos cu ora esposa di Josef su doño di trabou a propon’é pa tene relacion sexual, Josef no a djis ignor’é. Mas bien, el a rechasá su avancenan sexual cu firmesa. (Génesis 39:8, 9, 12) Awe, ser firme i directo te ainda ta e mihó manera pa resistí intimidacion sexual.
Ta berdad cu kisas e persona cu ta molestiá bo su intencion no ta pa ofendé bo. Loke ta parce intimidacion por ta en realidad un intento brutu pa hala bo atencion. Pues no sinti cu bo tambe tin cu comportá bo brutu pa para un avance indeseá. Djis bisa algu manera: ‘Mi no gusta e tipo di papiá ei’ of, ‘por fabor, tene bo man na bo curpa,’ por ta suficiente pa comunicá kico bo kier bisa. Sea loke sea bo bisa, laga bo mensahe ta firme. Laga bo no nificá no! E hobencita Andrea ta expres’é asin’akí: “Si nan no comprendé bo mensahe ora bo indicá nan esei den forma bondadoso, anto bo tin cu bisa nan stret. Hopi bes ta esei bo tin cu haci.” Por ta suficiente pa bisa den un forma firme: ‘Stop cu e cos ei!’
Si e situacion escalá, no purba manehá e
asuntu bo so. Purba papia cu bo mayornan of otro adultonan maduro. Podisé nan tin sugerencianan práctico con pa trata cu e situacion. Como último recurso, por ta nan ta haña ta necesario alertá funcionarionan di scol. Maske esei por laga bo sinti masha incómodo, lo e por protehá bo di sigui ser molestiá.Con pa Prevení Molester
Claro cu na promé lugá ta mihó pa prevení di bira víctima. Kico lo por yuda den esaki? Andrea ta consehá: “Nunca duna e impresion cu podisé bo ta un tiki interesá. Otronan lo tende di esei, i nan lo sigui pone preshon riba bo.” E manera cu bo ta bisti por hunga un papel importante. E hóben Mara ta bisa: “Mi no ta bisti manera wela, pero mi ta evitá paña cu ta hala atencion na mi curpa.” Si bo ta rechasá avancenan sexual i na mésun tempu ta bisti paña provocativo, esei lo por bruha hende. Bijbel ta recomendá pa bisti “cu modestia i sano huicio.”—1 Timoteo 2:9.
E amigunan cu bo ta scoge tambe lo influenciá e manera cu bo ta ser tratá. (Proverbionan 13:20) Rosilyn ta observá: “Ora algun mucha muher den un grupo gusta haña atencion di mucha homber, e mucha hombernan ta asumí cu ta tur mucha muher den e grupo ta pensa mescos.” Carla a mencioná e mésun punto: “Si bo ta cana rond cu esnan cu ta reaccioná riba e comentarionan of cu ta gusta e atencion, anto nan lo molestiá abo tambe.”
Bijbel ta conta di un mucha muher cu yama Dina cu tabata asociá cu mucha muhernan di Canan, caminda hende muher tabata conocí pa nan comportacion inmoral. Esaki a hiba cu el a ser violá. (Génesis 34:1, 2) Cu bon motibu Bijbel ta declará: “Vigilá cuidadosamente p’e manera cu boso ta cana no ta manera hende imprudente sino manera hende sabí.” (Efesionan 5:15) Sí, ser ‘cuidadoso’ den e manera cu bo ta bisti, e manera cu bo ta papia i cu ken bo ta asociá, por haci hopi pa protehá bo di molester.
Sin embargo, pa hóbennan cristian, un dje maneranan mas eficas pa resistí intimidacion ta dor di gewoon laga otro hende sa bo posicion religioso. E hóben Timon, un Testigo di Jehova, ta corda: “E muchanan tabata sa cu mi ta Testigo, i esei a para casi tur molester.” Andrea ta observá: “Bisa nan cu bo ta un Testigo ta haci un diferencia grandi. Nan lo realisá cu den hopi cos bo ta diferente for di nan i cu bo tin normanan moral estricto.”—Mateo 5:15, 16.
Si Bo Ta Ser Molestiá
Por ta maske cuantu bo haci bo best, bo no por scapa completamente di hende frescu i abusador. Pero si bo ta víctima di un molestiadó, no tin motibu pa bo castigá bo mes sintiendo culpabel, tanten cu bo a comportá bo manera un cristian. (1 Pedro 3:16, 17) Si e situacion ta angustiá bo emocionalmente, busca apoyo dor di papia cu bo mayornan of cu esnan maduro den e congregacion cristian. Rosilyn ta admití cu ta difícil pa sinti bo bon ora hende ta molestiá bo. E ta bisa: “Si bo tin djis un compaño, un hende cu bo por papia cuné, ta hopi bon.” Corda tambe cu “Jehova ta cerca tur hende cu ta inbok’é.”—Salmo 145:18, 19.
No ta fácil pa tuma un posicion firme contra maltrato, pero ta bale la pena. Tuma por ehempel e relato bíblico di un mucha muher di Sunem. Aunke e no a ser molestiá realmente, manera nos ta comprendé esei awendia, el a ricibí atencion indeseá di parti di Sálomon, e rey ricu i poderoso di Huda. Como cu e mucha muher tabata enamorá di un otro homber, el a resistí e avancenan ei. P’esei cu orguyo e por a bisa di su mes: “Mi ta un muraya.”—Cantica di Sálomon 8:4, 10.
Demostrá cu bo tambe tin e mésun fortalesa i determinacion moral. Sea un “muraya” ora ta trata di avancenan indeseá. Laga tur hende rond di bo comprendé bon cla kico ta bo posicion cristian. Dor di haci esei, bo por keda “liber di culpa i inocente” i bo por tin confiansa cu bo a agradá Dios.—Filipensenan 2:15. *
[Nota]
^ par. 27 Spierta! a duna mas conseho en cuanto intimidacion sexual den e edicionnan na spañó di 22 di mei 1996, 22 di augustus 1995 i 22 di mei 1991.
[Plachi na página 26]
Por ta un proteccion pa laga tur hende sa di bo creencianan cristian
[Plachi na página 26]
Bo por prevení intimidacion dor di evitá mal asociacion