E Specerei Cu A Bini for di Otro Banda di Mundu

DJE CORESPONSAL DI SPIERTA! NA HUNGRIA

“ESTA un stobá dushi! Cu kico bo a sason’é?” Kisas asina bo ta reaccioná riba e sabor dje cuminda típico di Hungria: goulash. Su sabor distintivo ta bini di paprika, un specerei trahá di un sorto di mata di promenton (mira e fruta ariba), cu a yega Hungria for di otro banda di mundu.

Historia ta indicá cu Sur América tabata e promé-promé cas di promenton conocí. Artículonan di klei cu nan a haña den grafnan di inca—cu segun cálculo ta miles di aña bieu—ta decorá cu cuadro dje mata di promenton. Tin asta promenton entre e cumindanan cu nan tabata dera huntu cu e momianan di inca.

Algun historiadó ta kere cu un dokter cu a nabegá bai América cu Columbus, a bini bek Spaña cu simia di promenton na aña 1493. Sea loke sea e caso, Spaña tabata e promé pais europeo cu a cuminsá cultivá promenton na gran escala. Djeinan e mata di promenton a drenta Gran Bretania i sur di Francia, caminda e tabata mas popular como mata pa den cas cu como specerei of fuente di cuminda! Despues, comerciantenan griego a hiba e mata di promenton na paisnan rond di laman Mediteráneo i laman Pretu.

E mata di promenton ta conocí na Hungria for di siglo 16. Un di su nombernan, “promenton turco,” ta sugerí cu el a yega Hungria via e turconan. Di tur manera, te awe paprika di Hungria, corá scur, yen di aroma i zoet, ta un faborito di amantenan di specerei rond mundu.

Mata di promenton ta bona riba terenonan plat di tera maron i manera santu, caminda tin hopi solo. Cunukeronan ta cuminsá prepará e tera pa planta na final di zomer, djis despues dje cosecha  dje aña anterior. Nan ta sembra algun mata di promenton dor di planta e simia; otronan ta ser transplantá. Matanan di promenton cu mester transplantá tin cu nace den un ambiente controlá, manera un broeikas bon ventilá. Ei nan ta muha i fertilisá e matanan cuidadosamente, i tambe kita mal yerba for di nan. Promé cu transplantá nan, ta exponé nan gradualmente n’e ambiente di pafó.

Despues di seis pa ocho siman, ta tempu pa planta e yunan di mata di promenton den cunucu. Na Hungria esaki ta tuma lugá durante e promé dianan di mei. Na e nivel aki ainda e matanan tin mester di hopi cuido, e cunukeronan tin cu muha nan i flit nan, i chapi rond di nan si nan kier cosechá promenton salú.

E cosecha ta cuminsá na fin di augustus of na principio di september. Un promenton berde ta bira un corá bunita ora e hecha. A ménos cu tur e matanan ta hecha pareu, ta mihó cosechá nan na man i no cu mashin. Sea cual sea e método cu usa, e promentonnan lo pasa dor di hopi cambio físico i kímico promé cu e yega riba bo mesa di comedor. Por ehempel, despues di cosech’é, e promenton ta perde mayor parti di su humedad, i su nivel di sucu i vitamina C ta baha. *

Despues dje cosecha, mester laga promenton seca i hecha mas. Un manera tradicional di haci esaki tabata di cologá nan na un cabuya. Pero, awendia ta mas comun pa hinca e promentonnan den sacu largu trahá di un material cu nan a weef un tiki los, loke ta permití aire pasa dor di dje. Nan ta cologá e sacunan na reki of den mangasina. Una bes nan ta completamente hechu, por mula e promenton te ora e bira puiru, i asina ta producí e specerei sabroso conocí na su nomber húngaro pa promenton: paprika.

Algun tipo di paprika por ta hopi picante, pa gran parti esaki ta debí na un substancia kímico cu yama capsaicin. Nan sa usa e producto natural aki asta pa remedi, manera pa trata problema di digestion i dolor di reumatismo. Di tur manera, e sabor distintivo di paprika—sea ta picante of suave—ta solamente un di su atributonan. Pa loke ta bunitesa, e color corá cu paprika ta agregá na un plato, ta atractivo p’e bista. Ora agregá paprika na cuminda pa galiña, e ta asta yuda e galiñanan producí webu cu dol color mas bibu.

Lo bo tin gana di purba un plato sasoná cu paprika? Pakico no purba e receta di goulash cu ta sigui aki bou? Manera húngaronan ta bisa, jó étvágyat!, esta, bon apetit!

[Nota]

[Kuadro na página 11]

GOULASH HÚNGARO

1/2 liber di carni baca sin wesu, cortá na bloki

1 cuchara grandi (15 ml) di zeta

1 siboyo mediano, cortá chikitu

2 tenchi grandi di konofló, machicá

2 cuchara grandi (30 ml) di paprika dushi

2 telep (10 ml) di salu

1/4 telep (2 ml) di simia di ‘caraway’ (si ta deseá)

2 batata mediano, labá, cascá i cortá na bloki

1 promenton chikitu color berde, saca su mondongo i cort’é na pida-pida

2 tomati chikitu, cascá, sin pipita i cortá na pida

100 gram di aletria (egg noodles) secu

Keinta e zeta den un wea di sopi, i agregá e siboyo. Has’é te ora e bira moli. Bruha e konofló i paprika den dje, agregando un poco awa si ta necesario, pa e no kima. Caba agregá e carni i salu, i drei bon. Tapa e wea i lagu’e cushiná. Drei e de bes en cuando, i agregá awa si ta necesario pa e no kima. Agregá e simia di caraway, si ta deseá. Ora e carni ta moli, agregá promenton, tomati i dos liter di awa (8 cup). Laga e awa herebé, tap’é i lagu’é cushiná pa 15 minuut. Agregá e batata i lagu’e cushiná te ora e batata ta moli (10 pa 15 minuut). Agregá salu na smak. Sirbié cayente huntu cu e aletria cu bo a prepará apart. E ta yega pa cuater te seis hende.