For di Nos Lectornan

Siglo 20 E edicion di 8 di december 1999 tabata great! Mi a beneficiá mashá di dje, foral dje seri “Siglo 20—Añanan Crítico di Cambio.” E tabata masha informativo i al caso. El a lanta den mi e deseo pa ta mas alerto durante e último dianan aki.

M. V., Filipínas

Víctima den Coma Danki p’e experencia di Michiko Ogawa. (“Speransa A Sostené Nos pa Wanta Prueba,” 8 di januari 2000) E accidente a sosodé cu su esposo cincu dia despues cu mi a nace. E idea cu su esposo ta inconciente durante casi henter e periodo di mi bida, ta abrumador! En berdad Jehova a yud’é lanta su dos yu hombernan i wanta e circunstancia difícil aki.

L. N., Merca

E artículo a toca mi curason profundamente. Mi ta biba mi so i recientemente mi a haña sa cu mi tin cancer. Despues di a lesa e artículo aki, mi kier a brasa Michiko i gradicié cu el a keda fiel na Jehova apesar di prueba. Den mi caso, na promé instante mi tabata kier pa un milager sosodé. Pero awor, mescos cu Michiko, mi kier pa simplemente Jehova su boluntad sosodé.

M. S., Merca

Medicina sin Sanger E seri “Demanda Creciente pa Medicina i Cirugia sin Sanger” (8 di januari 2000) tabata un producto di investigacion avansá. Mi ta bayendo scol di enfermeria i a duna un colega i un di mi maestranan e revista. Anteriormente e personanan aki a demostrá prehuicio contra Testigo di Jehova. Pero nan a keda contentu di ricibí e artículonan aki huntu cu otro informacion tocante Testigonan di Jehova.

R. P., Suisa

Dos di mi yunan tabata den un accidente cu auto na 1998. Mi yu homber su pia a keda destrosá. El a bisa repetidamente cu e no tabata kier sanger! Pero e hospital no tabata ekipá pa cirugia sin sanger. Nan a transfirié pa un otro hospital, pero ei e personal di hospital no kier a oper’é sin cu su hematocrit den sanger a subi te na 35. (El a baha te na 8,1.) Nan a tuma e actitud di no interferí, como si fuera nan tabata warda pa wak si lo el a muri. Sin embargo, segun nan a aplicá estrategianan sin sanger—hisa su pia na haltu, dun’é eritropoyetin, etcétera—su hematocrit a subi te na 35,8! E cirugia tabata exitoso, pero e tardansa a lagu’é cu hopi daño permanente. Mi tin masha gana pa nan exigí di tur dokter, ciruhano i anestesiólogo pa nan lesa e artículonan aki.

L. L., Merca

Ta un consuelo pa sa cu hopi dokter ta dispuesto pa cooperá cu Testigonan di Jehova. E revista aki ta bai stret pa mi dokter. Mi sa cu lo e apreci’é.

U. M., Merca

E artículo a bini net ora cu mi tabatin un cirugia planeá. Ora mi sanger a baha debí cu mi a perde muchu sanger, mi a usa e revista aki pa splica e personal di hospital i miembronan di mi famia, di con lo mi no aceptá sanger. Danki na Jehova, mi a recuperá completamente.

C. B., Merca

Artículonan pa Hubentud Mi tin 12 aña, i mi gusta lesa boso revistanan masha hopi. Promé cu mi a cuminsá lesa boso revistanan, tabata masha difícil pa mi bai bon cu mi amigunan, pasobra nan tur tabata mas bieu cu mi. Pero despues di lesa e artículonan “Hóbennan Sa Puntra . . .” a bira mas fácil pa mi bai bon cu nan. Danki pa boso revistanan. Nan ta masha útil.

N. I., Rusia