For di Olimpia pa Sydney

HOPI hende ta considerá Weganan Olímpico e competencia atlético mas importante na mundu. Segun The World Book Encyclopedia: “Ningun otro evento deportivo ta atraé asina tantu atencion. Vários miyon hende ta asistí n’e weganan, i cientos di miyones rond mundu ta wak nan na television.”

Un Historia Breve

Weganan Olímpico a originá miles di aña pasá. E antiguo griegonan tabata kere cu atletismo ta agradá e spiritu dje mortonan, i p’esei nan tabata tene fiestanan nacional cu a mescla religion cu deporte. Esakinan a incluí weganan ístmico, nemeo, olímpico i pítico. Dje weganan aki, esnan olímpico tabata sumamente respetá, pasobra nan a onra Zeus, kende e griegonan a considerá rey dje diosnan.

Evidentemente, na principio e olimpiadanan tabatin un solo competencia, un careda na pia. Pero cu tempu nan a incluí otro competencianan, manera careda di garoshi i pruebanan riguroso di resistencia. Bishitantenan for di tur parti tabata basha bini p’e weganan ei. Pa garantisá nan siguridad, tabatin un acuerdo cu a prohibí guera pa un periodo promé i despues dje weganan.

Ora Roma a bini na poder, Weganan Olímpico a cuminsá mengua. Sí, hopi romano a wak atletismo cu cierto desprecio. Un excepcion tabata emperador Nero. Na aña 67 E.C. el a hunga den e weganan i a gana tur competencia cu el a participá aden. Parce cu e otro competidónan tabata sa cu a cumbiní nan pa Nero gana! Di tur manera, pa aña 394 E.C., Weganan Olímpico a para.

Ta Rebibá Weganan Olímpico

Un 15 siglo despues, arkeólogonan aleman a coba riba e yanura di antiguo Olimpia, i loke nan a descubrí a renobá interes den e weganan. Despues, baron Pierre de Coubertin, un frances di 29 aña, a proponé pa rebibá e evento. Pues, na aña 1896 nan a tene e promé Weganan Olímpico moderno na Aténas. For di e aña ei padilanti, cu masha poco excepcion, a tene e weganan cada cuater aña.

Awe hopi hende ta anticipá e weganan ansiosamente. E aña aki, nan lo tuma lugá na Sydney, Australia, di 15 di september pa 1 di october. E weganan lo consistí di 28 deporte, 292 evento i 635 sesion, cu participacion di mas cu 10.300 atleta.

Sin embargo, último añanan Weganan Olímpico ta involucrá den hopi controversia. Hopi hende ta asta bisa cu e idealnan olímpico ta den crísis. Un bista tras di esenario lo resultá di ta revelador i tambe inkietante.

[Rekonosementu pa Potrèt na página 3]

Scala/Art Resource, NY