Idealnan Olímpico den Crísis

ORA baron Pierre de Coubertin a proponé pa rebibá Weganan Olímpico, el a presentá algun ideal noble. De echo, e credo olímpico moderno, atribuí na Coubertin, ta declará: “E cos mas importante den Weganan Olímpico no ta gana, sino participá . . . E cos esencial no ta cu bo a vence, sino cu bo a lucha bon.”

Coubertin tabata di opinion cu participacion den competencia sano lo por a desaroyá bon caracter, fomentá sano huicio i promové conducta recto. Asta el a papia di un ‘religion di deporte.’ E tabata di opinion cu Weganan Olímpico lo por a siña hende biba na pas.

Pero pa ora cu Coubertin a muri na aña 1937, tur speransa relacioná cu esaki a disparcé. Ya caba a suspendé e weganan un biaha pa motibu di guera mundial, i tension tabata acumulá pa un otro conflicto grandi. Awe, e idealnan olímpico ta den crísis mas profundo ainda. Con bin?

Weganan Olímpico i Droga

Pa décadanan, atletanan a usa droga como stimulante (doping) pa haña un bentaha competitivo, i Weganan Olímpico no a scapa dje plaga aki. De echo awor, 25 aña despues cu nan a introducí testnan supuestamente riguroso pa detectá doping, e uso di substancianan prohibí cerca atletanan olímpico ta sigui ta un problema.

Algun atleta ta usa steroid pa haña un bentaha. Otronan ta usa stimulante. Hormonnan cu ta stimulá crecementu humano ta popular cerca coredónan di distancia corticu i atletanan cu mester di fortalesa, pasobra e hormon ta yuda e atletanan recuperá lihé for di ehercicionan intenso, i ta promové fortalesa di músculo. Miéntras tantu, un version genéticamente manipulá di EPO (eritropoyetin) ta e droga  preferí cerca coredó di distancia largu, landadó i coredó di ski riba tereno di campo, pasobra e ta aumentá nan resistencia dor di stimulá produccion di cel corá den sanger.

Ta di comprendé di con dr. Robert Voy, ex-director di testmentu pa detectá droga pa e Comité Olímpico Mericano, ta yama e atletanan “un laboratorio ambulante.” E ta agregá: “Weganan Olímpico a bira un lugá pa científico, kímico i dokternan no-ético haci experimento.” Kico dje testnan pa detectá droga? Dr. Donald Catlin, director di un laboratorio cu ta test pa droga na Merca, ta bisa: “E atleta sofisticá cu kier usa droga, a cambia pa cosnan cu nos no por detectá.”

Soborno i Corupcion

Como cu ta solamente un par di stad por aford pa bid pa ta anfitrion dje Weganan Olímpico, tin stad lo haci tur loke nan por pa garantisá cu nan ta haña e evento. Casi dos aña pasá, Comité Olímpico Internacional (COI) a hañ’é involucrá den escándalo. Tabatin alegacionnan cu a paga te cu 400.000 dollar di soborno na miembronan di COI durante e bid exitoso cu Salt Lake City a haci pa haña Weganan di Winter 2002. Esei a pone na duda e ética di esnan enbolbí den e proceso di seleccion.

Hopi bes ta bira difícil pa mira e diferencia entre hospitalidad i soborno abierto, ora potencial stadnan  anfitrion ta ofrecé masha hopi regalo na esnan cu ta scoge e sitio pa e evento. Te cu 20 miembro dje COI tabata implicá den e escándalo di Salt Lake City, i cu tempu a expulsá 6 di nan. Pa loke ta Weganan 2000 na Australia, tur intento pa mantené un imágen limpi a disparcé ora e presidente dje Comité Olímpico Australiano a admití: “Wel, no ta e beyesa dje stad so i dje facilidadnan di deporte cu nos tabatin pa ofrecé a pone cu nos a gana [e bid].”

E estilo di bida extravagante di algun miembro haltu di COI a lanta mas duda ainda. Tommy Keller, defuntu cabesante dje Federacion Internacional di Rema di Suisa, a yega di bisa cu na su opinion algun funcionario di deporte ta mira Weganan Olímpico como un medio pa “satisfacé nan propio orguyo personal.” El a agregá cu a parce cu e forsa motivador ta “corementu tras di placa i e satisfaccion personal di ambicionnan.”

Mercadeo Potente

Niun hende no por nenga cu sumanan grandi di placa ta hunga un rol den Weganan Olímpico. Tradicionalmente, e weganan a acapará un audiencia grandi di television i paketenan lucrativo di propaganda, loke a haci patrocinacion dje weganan un instrumento potente di mercadeo.

Tuma Weganan Olímpico di 1988, pa cua nuebe compania multinacional a paga un total di mas cu 100 miyon dollar na COI pa derechonan mundial di mercadeo. Weganan di Zomer 1996 na Atlanta, tabatin un ganashi total di 400 miyon dollar pa e mésun derechonan ei. I esei no ta incluí derechonan di television. Un red di television mericano a paga mas cu 3,5 mil miyon dollar pa e derechonan di transmití Weganan Olímpico entre aña 2000 pa 2008, i segun informe durante un periodo di cuater aña, 11 sponser mundial lo tin cu paga 84 miyon dollar cada un. P’esei, algun hende a expresá e opinion cu aunke un tempu Weganan Olímpico tabata símbolo dje ideal di excelencia humano, awe nan ta principalmente un oportunidad pa traha placa i ta simbolisá golosidad humano.

 Kico A Bai Robes?

Algun experto ta bisa cu por rastrea e crísis di Weganan Olímpico na dos desaroyo clave cu a cuminsá na principio di añanan 1980. E promé tabata e decision pa otorgá federacionnan deportivo internacional individual e derecho pa determiná cua atletanan a bini na remarke pa Weganan Olímpico. Miéntras cu un tempu COI a limitá participacion na atletanan amateur, e federacionnan a cuminsá permití atletanan profesional competí den nan respectivo competencia olímpico. Pero atletanan profesional a bin cu nan actitudnan profesional. Djis ‘lucha bon’ no ta soru pa nan haña cen for di promocion di producto, i no a tarda muchu cu gana a bira tur cos. No ta un sorpresa anto cu esei a animá uso di droga como stimulante.

 E di dos desaroyo clave a tuma lugá na 1983 ora cu COI a busca manera pa saca ganashi di loke su expertonan di mercadeo a yama “e símbolo mas balioso na mundu cu no ta ser explotá”: e renchinan olímpico. Esaki a fomentá un clima di comercialismo desenfrená, cu a bira e marca di Weganan Olímpico. Jason Zengerle a observá: “Apesar di tur e papiamentu tocante promové pas i uni hende na mundu . . . , Weganan Olímpico no ta masha distinto for di . . . cualkier otro exhibicion grandioso di deporte.” Pero, esaki kier men anto cu e idealnan proponé dor dje movementu olímpico, ta inalcansabel?

[Kuadro/Plachi na página 5]

ECHONAN TOCANTE WEGANAN OLÍMPICO

→ E símbolo olímpico ta consistí di cincu renchi, cu ta representá e continentenan di África, Asia, Australia, Europa i Nort i Sur América. Nan ta pasá den otro pa simbolisá e amistad deportivo entre tur pueblo.

→ E lema olímpico ta Citius, Altius, Fortius na latin. E ta nificá “mas lihé, mas haltu, mas balente.” Un educadó di Francia a bini cu e traduccion alternativo: “mas rápido, mas haltu, mas fuerte.”

→ E vlam olímpico tabata kima na altar di Zeus durante e weganan antiguo. Awe, rayo di solo ta cende un antorcha na Olimpia i despues nan ta hib’é n’e sitio dje weganan.

→ E tradicion olímpico ta miles di aña bieu. E promé Weganan Olímpico registrá a tuma lugá na aña 776 P.E.C., pero hopi hende ta bisa cu e orígen dje weganan ta por lo ménos cincu siglo promé cu esei.

[Kuadro/Plachi na página 6]

E SITIO OLÍMPICO NA SYDNEY

For di september 1993, ora cu Sydney a gana e bid pa haña Weganan Olímpico 2000, e stad ta preparando frenéticamente pa ricibí dies di miles di bishitante. Nan a traha duru pa limpia e sitio, construí un sede di primera clase, i transformá dùmpnan bieu di sushi den un seri di tereno cu hopi awa, parke i riu, cu ta abarcá 760 hectar.

E Pueblo Olímpico Sydney, construí pa acomodá tur atleta i funcionario, ta e pueblo mas grandi na mundu cu ta funcioná riba energia solar. E SuperDome⁠—⁠e centro deportivo i di entretenimentu completamente cubrí mas grandi den e Hemisferio Sur⁠—⁠tin e structura di panelnan di energia solar privá mas grandi di Australia, i e ta funcioná riba energia cu no ta producí casi ningun tiki gas cu ta keinta e atmósfera.

Dominando horizonte, tras dje SuperDome, tin e curvanan i balkinan crusá den otro dje Stadion Olímpico. A costa 435.000.000 dollar pa trah’é, i e ta e stadion olímpico mas grandi na mundu, i tin asiento pa 110.000 hende. Cuater Boeing 747 lo por para banda di otro bou dje boog principal dje stadion! Den dak, plachi di plafon transparente ta protehá espectadónan dje rayonan ultravioleta di solo. Alan Patching, ehecutivo principal dje stadion, a bisa: “Pa un par di luna di aña 2000, e lugá aki lo ta e curason di Australia.” Anto el a risca duna un pronóstico: “Despues di esei, lo e bira un símbolo mescos cu e Cas di Ópera.”

[Plachi na página 4]

Baron Pierre de Coubertin

[Rekonosementu]

Culver Plachinan

[Komentario di e plachi na página 5]

AP Photo/Eric Draper

[Rekonosementu pa Potrèt na página 7]

AP Photo/ACOG, HO