Logrando e Idealnan

BON boluntad, hermandad i pas internacional, ken lo no a elogiá tal idealnan noble? Baron Pierre de Coubertin, e persona cu a rebibá Weganan Olímpico, a kere cu e weganan lo a surpasá rivalidad nacional dor di promové gran respet entre competidónan sin importá nan rasa, religion of sexo. El a pensa cu “lo por a trece un mihó mundu solamente dor di tin mihó hende.” Pero di berdad deporte por trece pas mundial? Husgando a base di su registro te cu awor, nos lo tin cu bisa no.

Aunke deporte tin su lugá, educacion for di Bijbel ta e clave pa promové berdadero pas. Sí, principionan bíblico por producí “mihó hende,” manera Coubertin a expres’é. Considerá algun texto bíblico cu ta promové  pas entre hende cu ta aplicá nan, sin importá nan nacionalidad.

“Dor di esaki tur lo sa cu boso ta mi disipelnan, si boso tin amor entre boso.”—Juan 13:35.

“Si ta posibel, cuantu cu ta dependé di boso, sea pacífico cu tur hende.”—Romanonan 12:18.

“Miéntras cu nos tin tempu faborabel p’e, laga nos obra loke ta bon pa cu tur.”—Galationan 6:10.

“Sin haci nada motivá pa gana di pleita of motivá pa egoismo, sino considerá cu humildad di mente cu e otronan ta superior cu boso.”—Filipensenan 2:3.

“Entrenamentu corporal ta beneficioso pa un poco; pero debocion na Dios ta beneficioso pa tur cos, ya cu e ta encerá promesa dje bida djawor i di esun pa bini.”—1 Timoteo 4:8.

E idealnan describí den e textonan aki realmente ta duna resultado? Considerá loke a sosodé na Munich, Alemania. Na 1974, dos aña so despues cu terorismo i asesinato a daña Weganan Olímpico cu nan a tene den e stad ei, Testigonan di Jehova a tene un congreso internacional den e Stadion Olímpico. Tabatin presente entre otro, gruponan for di Grecia i Turkia—paisnan cu tabata bringa otro. De echo, durante e mésun zomer ei, trupanan griego i turco tabata den conflicto cu otro pa e isla di Chipre. Esaki lo a afectá e cristiannan presente n’e congreso aki? No! Esta conmovedor tabata pa observadónan mira hende griego i turco brasa otro i yama otro ruman!

Rond mundu ta conocí cu Testigonan di Jehova ta logra relacionnan pacífico cu ta surpasá bareranan nacional, étnico i di tribu. Claro cu nan no ta pretendé di a logra e ideal di unidad i cooperacion mundial perfectamente. Mescos cu tur otro hende, nan tin cu traha duru pa sigui e conseho di apostel cristian Pablo: “Kita e personalidad bieu cu su prácticanan, i bisti boso cu e personalidad nobo.” (Colosensenan 3:9, 10) No obstante, nan ta kere firmemente cu aplicá principionan bíblico por yuda hende “busca pas i sigui tras di dje.”—1 Pedro 3:11.

Lamentablemente, Weganan Olímpico—apesar di su idealnan noble—a trece dilanti lo peor den hopi hende. Na contraste, Dios su Palabra poderoso ta trece dilanti lo mehor den hende, promoviendo bon boluntad i pas internacional.

[Plachinan na página 8]

Weganan Olímpico ta promové competencia

[Rekonosementu]

Aus dem Fundus der MÜNCHNER OLYMPIAPARK GMBH, München

[Plachinan na página 9]

Bijbel ta promové pas