E Punto di Bista Bíblico

Meditacion Cu Ta Probechoso

“LAGA E DICHONAN DI MI BOCA I E MEDITACION DI MI CURASON BIRA AGRADABEL DILANTI BO, O JEHOVA MI BARANCA I MI REDENTOR.”—SALMO 19:14.

KICO “meditacion” ta nificá pa bo? Si bo ta sigui siñansa di algun religion oriental, kisas bo ta kere cu e ta algu cu ta duna bo mayor claridad di pensamentu of iluminacion special. Meditacion cu budismo ta practicá, ta animá hende pa haci e mente bashí di tur pensamentu. Hende ta bisa cu otro formanan di meditacion ta animá pa yena bo mente cu “berdadnan di sabiduria universal.”

E punto di bista bíblico di meditacion ta diferente for di esakinan. Den ki manera? Considerá e ehempel bíblico di un homber cu yama Isaac, kende na edad di 40 aña tabatin hopi cos pa meditá ariba. Génesis 24:63 ta bisa: “Isaac tabata pafó ta cana pa por meditá den cunucu rond di ora cu anochi ta cerando.” No tin motibu pa kere cu Isaac a haci su mente bashí di tur pensamentu of cu e tabata djis contemplá un berdad vago di ‘sabiduria universal.’ Probablemente Isaac tabatin cosnan specífico pa pensa ariba, manera por ehempel su futuro, e morto di su mama of ken lo ta su casá. El a usa un poco tempu privá parti anochi pa meditá, probablemente riba e asuntunan vital ei. Den Bijbel, meditacion ta mas cu djis soña lantá.

Meditacion Ta Incluí Mas Cos

Considerá e ehempel dje salmista David. El a confrontá vários problema aparentemente insuperabel, i e tabata sa bon cu como hende imperfecto, e tabatin mester di Dios su yudansa p’e comportá su mes corectamente. Kico a fortificá David atrabes di circunstancianan difícil? Manera ta pará skirbí na Salmo 19:14, David a bisa: “Laga e  dichonan di mi boca i e meditacion di mi curason bira agradabel dilanti bo, o Jehova mi Baranca i mi Redentor.” E palabra hebreo traducí aki como “meditá” ta originá di un palabra cu literalmente kier men “papia cu bo mes.” Sí, David ‘a papia cu su mes’ tocante Jehova i Jehova su actividad, su obranan, su leynan i su husticia.—Salmo 143:5.

Asina tambe, e promé cristiannan a considerá apartá tempu pa meditá riba cosnan spiritual como un parti di adoracion berdadero. Apostel Pablo a urgi: “Cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.” (Filipensenan 4:8) Claro cu pa nos por tin pensamentunan edificante, e “cosnan” aki cu Pablo a papia di dje mester drenta nos mente promé. Con?

E salmista ta duna un contesta. Salmo 1:1 i 2 ta bisa: “Felis ta e homber cu no a cana den e conseho dje malbadonan . . . Su deleite ta den e ley di Jehova, i den su ley e ta lesa na bos abou di dia i anochi.” Sí, e salmista a lesa e ley di Dios regularmente. E ora ei e por a meditá riba e cosnan cu el a siña tocante e Creador.

Con pa Meditá Awe

Lesa Bijbel ta baliosísimo, pero despues di les’é, nos tin cu meditá, pensa profundamente, of “papia cu nos mes” tocante loke nos a lesa. Mescos cu nos mester digerí e cuminda cu nos ta come pa nos beneficiá plenamente di dje, asina tambe meditacion ta necesario pa absorbá loke nos ta lesa den Bijbel. Meditacion corecto ta haci mas cu djis kita pensamentunan negativo. Tambe e ta permití nos considerá solucionnan basá riba Bijbel pa nos problemanan. E tipo di meditacion ei por yuda nos trata exitosamente cu ansiedadnan di bida diario.—Mateo 6:25-32.

Salmista David a reconocé e papel cu meditacion ta hunga den agradá Dios. El a declará: “Boca dje hustu ta esun cu ta expresá sabiduria na bos abou.” (Salmo 37:30) Sí, meditacion ta un marca di identificacion di un fiel adoradó. Ta un berdadero bendicion pa Dios considerá bo hustu, i esei ta trece beneficionan spiritual cuné. Por ehempel, Bijbel ta bisa cu “e caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.” (Proverbionan 4:18) P’esei, e cristian obediente cu “ta expresá sabiduria na bos abou,” por spera di aumentá den comprendimentu di Bijbel.

Tambe Bijbel ta urgi cristiannan pa meditá riba nan responsabilidadnan bíblico. Apostel Pablo a bisa Timoteo: “Refleccioná riba e cosnan aki; sea intensamente ocupá den nan, pa bo progreso por ser manifestá na tur hende. Presta atencion constante na bo mes i na bo siñamentu. Persistí den e cosnan aki, pasobra haciendo esaki lo bo salba tantu bo mes como esnan cu ta scucha bo.” (1 Timoteo 4:15, 16) Sí, loke nos ta bisa i haci por tin un efecto profundo riba otronan.

Ta keda claro anto cu tin hopi motibu pa pensa profundo i concentrá riba cosnan importante. Ta vital pa refleccioná riba loke nos a experenciá na ántes, pensa riba asuntunan actual i contemplá nos futuro cu atencion. Pero riba tur cos, nos meditacion lo duna nos e mayor iluminacion si nos pensamentunan ta enfocá riba e sabiduria di nos Creador, Jehova Dios.

[Plachi na página 20]

“E Pensadó,” di Rodin