For di Nos Lectornan

Ta Disfrutá di Spierta! Siendo un miembro dje iglesia Asamblea di Dios no ta stroba mi di lesa Spierta! Te ainda mi no a topa un otro revista di un calidad asina haltu i cu asina un variedad di tema. Mi no tin television na cas, pero hopi bes mi por combersá tocante tópiconan di actualidad cu mi amigunan pasobra mi a lesa tocante nan den boso revista.

A.B.A., Brazil

Bon Feitá E artículo “Un Bon Feitá” (8 di februari 2000) a bin net na ora pa mi. Mi casá tin mester di cuido constant awor i e no por feita su mes mas. E cuater tipnan pa feita tabata un gran yudansa. Awor e kier pa mi feit’é tur dia!

L. D., Alemania

Gañamentu Mi a haña cu e artículo “E Punto di Bista Bíblico: Tin Ora Cu Gañamentu Ta Hustificá?” (8 di februari 2000) ta pone bo pensa. Pero segun definicionnan razonabel, Bijbel no ta condená tur engaño?

D. S., Merca

Den Bijbel, por lo general gañamentu ta encerá bisa algu falsu na un persona cu tin derecho di sa e berdad i haci esei cu e intencion di engañá of perhudicá e of un otro persona. Pues personanan temeroso di Dios manera Abraham, Isaac, Rahab i David, a participá den formanan di engaño pero no a ser condená como mentiroso. Claro cu nan a haci asina bou di circunstancianan extraordinario. P’esei nan accionnan no ta hustificá engaño innecesario. Por ehempel, si un cristian a hura di papia berdad den un tribunal, lo e sea papia berdad of keda ketu.—RED.

Famianan sin Tata E edicion di 8 di februari 2000, a trata e ciclo di yunan sin tata. (“Famianan sin Tata—Con pa Kibra e Ciclo”) Mi no tin palabra pa expresá con decepcioná i rabiá mi a keda despues di lesa esaki. Boso a sancioná e conducta di tatanan ausente dor di trata cu e vários preocupacionnan cu nan tin, manera derecho di bishitá e yu i nan dificultadnan económico. Unda e scual a keda? Unda e animacion pa hende homber rectificá nan erornan a keda?

S. L., Merca

Nos por comprendé bon ki doloroso mester ta pa algun hende considerá tal tipo di informacion, foral si nan a ser bandoná. Pero no tabata e intencion p’e artículo scual hende homber. Mas bien, nos a purba promové comprension di tur dos banda p’e cuestionnan complicá cu ta enbolbí. Tambe nos a duna conseho práctico na víctimanan di abandono. Ta interesante cu e artículo final, “Famianan sin Tata—Con pa Kibra e Ciclo,” a haci e declaracion: “Lo bin un paro na e tendencianan actual den famia solamente si hende ta dispuesto pa haci cambionan profundo den nan manera di pensa, nan actitud, nan comportacion i nan moralidad.”—RED.

Ora mi a mira e kaft cu e potret di un mucha muher cu su tata, mi wowonan a yena cu awa. Semper mi kier tabatin un relacion asina cu mi tata. E artículo a yuda mi purba comprendé di con cos a bai manera nan a bai den mi famia. Tabata manera un rayo di solo a penetrá den mi pasado i a iluminá e preguntanan scur cu tabat’ei pa asina hopi aña.

M. M., Merca

Peliger Riba Internet E artículo “Hóbennan Sa Puntra . . . Con Mi Por Evitá Peliger Riba Internet?” (8 di februari 2000) a presentá un balansa excelente dje utilidad di Internet i su peligernan. Como un persona cu tur dia ta traha cu Internet como parti di mi trabou, mi ta ripará cu constant bo ta mira e peligernan. Ta ki importante pa evitá e peligernan ei!

J. L., Merca