Manteniendo Fe bou di Opresion Totalitario

SEGUN E RELATO DI MICHAEL DASEVICH

“Na Alemania nos ta tira Testigo di Jehova mata. Bo ta mira e scopet ei?” e oficial di Gestapo a puntra mustrando riba un rifle den huki. “Lo mi por hinca bo cu e bayonet sin mi curason bati.”

Mi tabatin 15 aña so ora mi a confrontá e menasa aki durante e periodo cu e nazinan a ocupá mi pais natal na 1942.

MI A nace na november 1926 den un pueblo chikitu cerca di Stanislav (awor e yama Ivano-Frankivs’k), cu e tempu ei tabata un parti di Polonia. Durante Segundo Guera Mundial, di september 1939 pa mei 1945, nos área tabata promé bou di ocupacion di Union Soviético, despues pa un tempu bou di Alemania, i finalmente bou dje soviéticonan atrobe. Despues di guera el a bira parti di República Socialista Soviético di Ucrania, i ora Union Soviético a stop di existí na 1991, el a bira parti di Ucrania.

Mi mayornan tabata miembro di Iglesia Católico Griego. Mi tata tabata polaco i mi mama di Belorusia. Pero na 1939, dos señora cu tabata pertenecé na un congregacion di 30 Testigo di Jehova den e pueblito bisiña di Horyhliady a laga cu nos e foyeto Guera Universal Ta Cerca. E foyeto a describí sucesonan cu mi por a mira ta tuma lugá. P’esei, ora e foyeto a puntra: “Kico ta e berdadero motibu pakico nacionnan ta pura pa bai guera?” Mi a tuma bon nota dje splicacion bíblico cu e foyeto a duna.

Guera no tabata nos único problema na Ucrania. Tabatin hamber severo. E política dje premier soviético Joseph Stalin a hiba na deportacionnan obligatorio pa Rusia. E sufrimentu di cua mi tabata testigo a pone mi examiná Bijbel cu sumo atencion i cuidou. Mi a pidi un Testigo di Horyhliady studia Bijbel cu mi.

Nos pueblito Odajiv ta keda na otro banda di riu Dniester for di Horyhliady, i vários bes pa siman mi tabata crusa e riu den un boto chikitu pa bai studia Bijbel. Na augustus 1941, ami cu mi ruman muher Anna a bautisá den e riu ei huntu cu dos otro persona.

Interogacion Intenso na Man di Gestapo

E ocupacion aleman a cuminsá na 1941, i apesar dje menasa continuo di castigu, nos no a stop cu nos actividad cristian. E siguiente aña mi a cuminsá traha pionero, bayendo  tur caminda riba baiskel. No muchu tempu despues di esei mi tabatin e encuentro cu e Gestapo aleman mencioná den introduccion. Wak kico a pasa.

Un dia riba caminda pa cas for dje ministerio, mi a bai bishitá dos ruman cristian, un mama cu su yu muher. E casá dje yu muher tabata oponé nos fe i tabata ansioso pa haña sa di unda su esposa tabata obtené su literatura bíblico. E dia ei mi tabatin huntu cu mi no solamente algun literatura sino tambe e raportnan dje ministerio di otro cristiannan. E esposo a mira mi bai for dje cas.

“Para!” el a grita. Mi a coge mi tas i core bai.

“Para! Ladron!” el a grita. Hendenan cu tabata traha den cunucu a pensa cu mi mester a horta algu, pues nan a obligá mi para. E homber a hiba mi warda di polis, caminda tabatin un oficial di Gestapo presente.

Ora e oficial a mira e literatura den mi tas, el a grita na aleman: “Rutherford! Rutherford!” Mi no tabatin mester di un traductor pa comprendé ta kico a pon’é rabia. E nomber di Joseph F. Rutherford, kende tabata e presidente di Watch Tower Bible and Tract Society, a sali riba e página dje título di bukinan publicá dor di Testigonan di Jehova. E esposo dje ruman muher a acusá mi di ta amante di su casá. Polis i e oficial di Gestapo por a mira cu esei tabata absurdo, ya cu su casá tabata suficiente bieu cu e por ta mi mama. Anto nan a cuminsá interogá mi.

Nan kier a sa ken mi ta i di unda mi a bini i foral, unda mi a haña e bukinan. Pero mi no kier a bisa nan. Nan a dal mi un par di biaha i a haci bofon di mi, i despues nan a cera mi den un bodega. Nan a sigui interogá mi pa tres dia. Despues nan a hiba mi n’e oficina dje oficial di Gestapo, caminda el a menasá di hinca mi cu bayonet. Pa un momento mi no tabata sa si lo el a cumpli cu su menasa. Mi a sak mi cabes abou, i a sigui un silencio cu a parce mi masha largu. Caba el bisa di ripiente: “Bo por bai.”

Pues manera bo por mira, tabata un berdadero reto pa predicá e tempu ei, i tambe pa tene nos reunionnan. Nos a celebrá e Memorial anual dje morto di Cristo dia 19 di april 1943, usando dos cuarto di un cas na Horyhliady. (Lucas 22:19) Ora nos tabata a punto di cuminsá nos reunion, un hende a grita cu polis ta acercando e cas. Algun di nos a sconde den e hofi, pero mi ruman muher Anna cu tres otro señora a bai den bodega. Polis a haña nan i a lastra nan un pa un bai cuné pa interogacion. Nan a maltratá nan pa hopi ora, i un di nan a keda seriamente heridá.

 Esena di Mundu Ta Cambia

Den zomer 1944, e alemannan a bati retirada i e soviéticonan a regresá nos área. Como sirbidónan di Jehova, nos a keda tene firme n’e mésun principionan bíblico cu nos a sigui durante ocupacion nazi. Nos a nenga di participá den cualkier actividad militar of político. No a tarda muchu cu nos lealtad n’e principionan bíblico ei a ser poné na prueba.—Isaías 2:4; Mateo 26:52; Juan 17:14.

Denter di un par di dia, e soviéticonan a cuminsá reclutá tur homber hóben pa servicio militar. Pa haci e asuntu mas difícil, no ta e soviéticonan so tabata reclutá hende. Miembronan di resistencia ucraniano a pasa sistemáticamente dor dje área en busca di hombernan hóben, cu nan a hiba den mondi pa train como luchadó. Pues nos como Testigo tabata den e posicion difícil cu nos tabatin cu proba nos neutralidad na dos faccion contrali: e soviéticonan i e miembronan di resistencia.

E dos gruponan aki a topa otro net den nos pueblito, lagando un par di miembro di resistencia morto riba caya dilanti nos cas. Autoridadnan soviético a bini na nos cas pa haña sa si nos tabata conocé e mortonan. E funcionarionan cu a bini a dicidí di bai cu mi i reclutá mi pa nan ehército, cu tabata formando un brigada di soldá polaco. Como cu mi tabata di orígen polaco, mi mester a participá den dje.

Ami huntu cu cuater otro Testigo, a nenga di drenta den servicio militar, pues nan a hiba nos Dnipropetrovs’k cu trein, un stad situá 700 kilometer leu den direccion oost. Ei nan a encarcelá nos miéntras nan tabata prepará cargonan contra nos, ya cu nos a splica nan cu nos no por sirbi den servicio militar debí na nos conviccionnan basá riba Bijbel. Ora nos a presentá den corte, nos a haña sa cu e investigadó civil tabata hudiu. Den nos defensa, cu e investigadó a scucha cu sumo atencion, nos a splica nos creencianan. Nos a mencioná cosnan cu nos tabata sa cu lo a interes’é, entre otro e opresion dje israelitanan i con Moises a libra nan for di Egipto.

Durante e lunanan cu a tuma pa corte dicta nos sentencia, nos tabata cerá den un cel cu mas o ménos 25 otro prezu. Ora e prezunan ei a haña sa cu nos a nenga di drenta servicio militar, nan a sclama: “Boso ta nos ruman!” Sin embargo, djis despues nos a haña sa cu nan no tabata Testigo sino baptista. Nan tabata dispuesto pa drenta servicio militar, pero a arestá nan ora nan a nenga di carga arma.

Na mei 1945, miéntras cu ainda nos tabata detené na Dnipropetrovs’k, tiru di scopet i gritamentu cu tabata bini for dje baraknan i di pafó riba caya a lanta nos for di soño meianochi. Nos tabata puntra nos mes si tabata un motin, un bataya of un celebracion. E siguiente mainta na desayuno, nos a tende e noticia for dje barberia: Guera a caba! Djis despues di esei, corte a anunciá nos sentencia. Nos cu e baptistanan a haña e mésun sentencia: 10 aña den campo di prizon.

Campo di Prizon na Rusia

Nan a manda nos cincu Testigo na un campo di prizon na Rusia. Despues di un biahe di dos siman cu trein, nos a desembarcá finalmente na Sukhobezvodnoje, un 400 kilometer oost di Moscú. Sukhobezvodnoje tabata e  centro administrativo di 32 campo di trabou forsá cu tabatin a lo largu dje ruta di trein. Cada campo tabatin miles di prezu. Despues di seis luna na Sukhobezvodnoje, nan a manda mi Campo Num. 18. Mayoria prezu einan tabata criminal of ofensornan político.

Autoridadnan a pone nos traha den kapmentu di palu, cu tabata un tarea masha difícil. Tin biaha nos tabatin cu cana dor di sneu cu ta yega te na nos cintura, corta palu cu zag di man i despues lastra e tronconnan dor di sneu. Un biaha pa siman, riba diadomingo despues di desayuno, mi tabatin chens di considerá algu bíblico cu e cuater otro Testigonan den e campo. Esei tabata nos reunion. Tambe nos a celebrá Memorial, i un aña nos a hacié den e lugá di baña. Nos a usa djus di beshi pretu ya cu nos no tabatin biña pa usa como emblema p’e sanger di Jesus.

E sintimentu di isolacion tabata aplastante. Mi a drama mi curason na Jehova, kende a fortalecé mi mescos cu el a fortalecé Elías ora e profeta tabata cargá cu mésun sintimentu. (1 Reynan 19:14, 18) Dios a yuda mi mira cu nos no tabata nos so. En berdad e tabata un pilar stabil i firme den mi bida, asta bou dje circunstancianan difícil ei.

Cada un dje camponan cerca di Sukhobezvodnoje tabatin un par di Testigo, i nos a logra tene contacto cu nan de bes en cuando via un Testigo kende su trabou a permitié bishitá tur e camponan. E tabata actua como un mediador, treciendo i sacando literatura for dje camponan na scondí. Esaki a yuda nos compartí e poco literatura cu nos tabatin. Esta un animacion esei a resultá!

Bek na Ucrania

Pa medio di un amnistia cu Estado a declará, mi sentencia a ser reducí di dies pa cincu aña. Pues, na april 1950, mi a regresá mi congregacion na Horyhliady. Nos trabou na Ucrania tabata bou di prohibicion ainda, i e riesgo di participá den e ministerio tabata grandi. Pero e recompensanan tambe.

Djis despues di mi regreso, mi a papia cu un homber cu yama Kozak, cu tabata biba na Zhabokruky, un pueblito cu a keda un 20 kilometer for di mi cas. Mi a puntr’é con bida tabata trata e cu su famia. Mi tabata sa cu tur trahadó den e cunucunan colectivo tabata ansioso pa por logra percurá e necesidadnan básico, pues mi tabata sa cu un pregunta asina ta un bon manera pa cuminsá un combersacion. Mi a splik’é cu Bijbel a profetisá cu lo tin scarcedad di cuminda i guera den nos tempu. (Mateo 24:3-14) E kier a sa mas. Pues mi a bolbe bishit’é. Siman tras siman mi a cana e 40 kilometernan bai i bini for di Zhabokruky pa studia Bijbel cu famia Kozak. E riesgonan, pa no papia mes dje gran cantidad di tempu enbolbí, tur a pasa pa olvido ora famia Kozak a bautisá na augustus 1950.

Djis despues cu famia Kozak a bautisá, nan a ser hibá den exilio huntu cu miles di otro Testigo. Na principio di april 1951 soldánan armá di ripiente a coge nan i—sin huicio of audiencia—a deportá nan pa Siberia. Ei famia Kozak i hopi otro di mi amigunan a ser forsá pa cuminsá un bida nobo. *

Dje 15 famianan Testigo na Horyhliady, ta 4 so a ser deportá. Sin embargo, den otro congregacionnan e proporcion di Testigonan deportá tabata hopi mas haltu. Con nan a areglá e deportacionnan masal aki? Wel, autoridadnan tabatin lista di Testigo i pues nan por  a coge cantidad grandi di nan manera nan tabata kier. Parce cu nan a compilá e listanan na 1950, tempu cu mi tabata den prizon ainda na Rusia, p’esei mi nomber no tabata riba lista. Un luna promé cu esei, na mart 1951, mi a casa cu Fenia, un sirbidó leal di Jehova. Henter Fenia su famia a ser exiliá, pero e a scapa pasobra el a casa cu mi i awor tabata carga mi fam, cu no tabata riba lista.

Pruebanan Difícil di Fe

Despues dje deportacionnan, nos cu a keda cas tabatin cu reorganisá e trabou. Nan a pidi mi atendé e congregacionnan den e region cercano di Ivano-Frankivs’k, caminda asta despues dje deportacion, ainda tabatin rond di 30 Testigo den cada un dje 15 congregacionnan. Mi tabata traha riba mi mes como carpinté i mi tabatin un orario flexibel, pues un bes pa luna mi tabata reuní den secreto cu e rumannan di cada congregacion.

Hopi bes nos tabata reuní anochi den un santana, caminda nos tabatin sigur di ta nos so. Un asuntu principal pa trata tabata con pa soru cu tur congregacion tin algun literatura bíblico. De bes en cuando, nos tabata ricibí un revista actual di Toren di Vigilancia na polaco of rumano i a traducié na ucraniano. Sin embargo, autoridadnan tabata constant nos tras, tratando di localisá i destruí nos mashinnan di stencil anticuá.

Pero nos problema mas grandi tabata cu nos tabata isolá di nos rumannan cristian den otro pais, incluso esnan na Brooklyn, New York, cu tabata hiba delantera den nos actividad cristian. Como resultado desunion, rumor i intriga tabata plaga nos congregacionnan. Algun Testigo a bandoná e organisacion i a forma gruponan di oposicion. Asta tabata circulá historianan falsu i negativo tocante e rumannan cu tabata hiba delantera na Brooklyn.

Pues, hopi di nos a haña cu nos pruebanan mas difícil di fe no tabata debí na persecucion na man di opositornan, sino e conflictonan denter dje congregacion. Apesar cu algun a scoge pa no adorá mas huntu cu nos, nos a siña cu tabata vital pa tene duru n’e organisacion i warda riba Jehova p’e resolvé e situacion. Felismente, mayoria Testigo den nos área a haci precis esei. Tambe ta un placer pa mi bisa cu hopi di esnan cu a bandoná e organisacion a reconocé nan eror i despues a regresá pa sirbi Jehova huntu cu nos.

Asta durante e tempu difícil ei di isolacion, nos a keda ocupá den e ministerio público i a ser bendicioná ricamente. I esta hopi recompensa nos a mira! Tur biaha cu mi asistí awor na nos Studio di Buki di Congregacion, mi ta ser recordá dje bendicionnan di Jehova. Cada un dje 20 of mas personanan presente a ser yudá pa conocé e berdad dor di un miembro di mi famia.

Mi mayornan i mi ruman muher Anna tur a muri, fiel na Jehova. Ami cu Fenia ainda ta mas activo posibel sirbiendo Jehova. Di berdad tempu a bula. Durante e último 30 añanan, Testigonan di Jehova na Ucrania a experenciá sucesonan excitante cu ta imposibel conta den e relato corticu aki. Pero mi ta contentu di por wak atras riba hopi aña di sirbishi na Jehova, cu confiansa cu lo e keda mi pilar i sosten firme, pasobra e ta bisa tocante su mes: “Ami ta Jehova; mi no a cambia.”—Malakías 3:6.

[Nota]

[Komentario na página 21]

Nan kier a sa ken mi ta i di unda mi a bini i foral, unda mi a haña e bukinan. Pero mi no kier a bisa nan

[Komentario na página 22]

E sintimentu di isolacion tabata aplastante. Mi a drama mi curason na Jehova, kende a fortalecé mi

[Plachi na página 20]

Ami cu Fenia na 1952

[Plachi na página 23]

Ami cu Fenia awe