Nos Universo Impresionante—Un Producto di Casualidad?

TIN hende ta bisa: ‘Sí, nos universo ta completamente un producto di casualidad.’ Otro hende, foral esnan religioso, no ta di acuerdo cu esei. I tambe tin hende cu gewoon no sa sigur kico pa kere. Kico abo ta kere?

Sea loke sea bo opinion, sin duda lo bo ta di acuerdo cu nos cu e universo ta un maraviya. Tuma e galaxianan. Segun cálculo tin rond di 100 mil miyon galaxia den e parti di universo cu nos por mira. Cada un ta un agrupacion di ménos cu mil miyon te mas cu un biyon strea.

Mayoria galaxia ta agrupá den ‘cluster’ of troshi di un par di dozijn te na miles di galaxia. Por ehempel, nan a yega di describí nos galaxia bisiña Andromeda como pia di ohochi di nos galaxia Via Láctea (Melkweg). E dos inmenso sistemanan aki di strea ta mará na otro via gravedad. Huntu cu un cantidad chikitu di otro galaxia bisiña, nan ta forma parti di un cluster.

Universo ta consistí di un cantidad innumerabel di cluster di galaxia. Algun cluster ta mará na otro cluster via gravedad, formando supercluster. Pero di e tamaño ei padilanti, gravedad ta perde su gara. Científiconan a descubrí cu superclusternan ta move bai for di otro. Cu otro palabra, universo ta expandiendo. E descubrimentu asombroso aki ta sugerí cu tabatin un principio ora cu universo tabata hopi mas chikitu i mas denso. Hopi bes nan ta referí n’e nacementu di universo como e ‘big bang’ (e gran explosion).

Algun científico ta duda mashá cu hende un dia lo por descubrí con universo a nace. Otronan ta speculá tocante maneranan cu nos universo lo por a bini na existencia sin un causa inteligente. E revista Scientific American den su edicion di januari 1999, a trata e tema “Con Universo A Cuminsá?” Ya caba hende a ripará cu algun dje teorianan científico ta deficiente. E revista ta bisa: “Desafortunadamente, lo por ta masha difícil . . . pa astrónomonan test cualkier un dje ideanan aki.”

E idea cu universo ta un producto di casualidad ta rekerí pa hende kere den loke científiconan ta describí como hopi “accidente afortuná” of “coincidencia.” Por ehempel, universo ta consistí di un  abundancia di atom masha simpel: hidrógeno i helio. Sin embargo, bida ta rekerí no solamente hidrógeno, sino tambe un abundancia di atomnan mas complicá, foral carbon i oxígeno. Científiconan tabata puntra nan mes di unda e atomnan precioso ei ta bini.

Ta djis un coincidencia cu e atomnan complicá cu ta necesario pa sostené bida ta ser fabricá den cierto streanan gigante? I ta djis pa casualidad cu algun dje streanan gigante aki ta explotá manera supernova, scupiendo afó nan coleccion precioso di atomnan extraordinario? Sir Fred Hoyle, kende a contribuí n’e descubrimentunan aki, a bisa: “Mi no ta kere cu cualkier científico cu examiná e evidencia lo keda sin saca e conclusion cu e leynan di física nuclear a ser diseñá deliberadamente.”

Pues anto, laga nos examiná e materia di cua nos universo ta trahá.

[Kuadro/Plachi na página 4]

E TEORIA DI INFLACION

Algun científico ta kere cu por splica cierto característicanan dje principio di universo, manera su ­velocidad precis di expansion, sin tin cu kere den un causa inteligente. Nan ta apelá n’e teoria, of teorianan, yamá inflacion. Sin embargo, e teoria di un universo di inflacion no ta trata cu e pregunta con el a originá. E teoria ta rekerí pa bo kere cu nos universo a nace accidentalmente for di algu cu tabata ­existí caba.

Segun e teoria di inflacion, den ménos cu un seconde universo a crece for di un tamaño mas chikitu cu un atom bira un tamaño mas grandi cu nos galaxia. I segun e teoria, for dje punto ei padilanti universo a sigui expandé na un velocidad mas lento i normal. Awe, científiconan ta considerá cu e parti visibel di nos universo ta un fraccion chikitu di un universo mas grandi. Segun e proponentenan dj e teoria di inflacion, aunke e universo visibel tin e mésun aparencia ordená den tur direccion, e parti mas grandi invisibel kisas ta diferente, asta caótico. Astrofísico Geoffrey Burbidge ta bisa: “Nunca lo por tin un test di inflacion pa observá con el a bai.” De echo, teoria di inflacion ta contradicí evidencianan nobo hañá via observacion. Awor nan ta mira cu si e teoria tabata berdad, esei lo rekerí un forsa nobo speculativo di antigravedad. Científico Howard Georgi di Universidad di Harvard, a describí inflacion como “un sorto di mito científico maraviyoso, cu ta por lo ménos mes bon cu cualkier otro mito di creacion cu mi a yega di tende.”

[Plachi na página 3]

Casi tur obheto den e potret aki dje Telescop Espacial Hubble ta un galaxia

[Rekonosementu]

Página 3 i 4 (wazig): Robert Williams and the Hubble Deep Field Team (STScI) and NASA

[Plachinan na página 4]

“E leynan di física nuclear a ser diseñá deliberadamente.”—Sir Fred Hoyle, mustrá aki cu supernova 1987A

[Rekonosementu]

Dr. Christopher Burrows, ESA/STScI and NASA

Potret cortesia di N. C. Wickramasinghe