Cera Conocí cu Australia Su Abehanan Cu No Ta Pica

DJE CORESPONSAL DI SPIERTA! NA AUSTRALIA

E ZONIDO relahante di abeha ocupá bayendo purá di flor pa flor den e solo briyante na principio di primavera a yega di calma bo? Di berdad nan ta bunita insecto. Mare nan no tabata pica!

Kisas ta un sorpresa pa bo, pero tin abeha cu no ta pica. Nan ta conocí como abeha australiano cu no ta pica, i por haña nan den hopi parti di oost Australia. Abeha cu no ta pica ta 4 milimeter so largu. Nan ta color pretu, cu cabei diki blancu na nan cara i banda. Hopi di nan tin pik-pik geel chikitu na rand di nan parti di curpa meimei. Tin por lo ménos dies sorto di abeha cu no ta pica a lo largu di costa, for di Queensland leu den nort te abou den zuid na New South Wales. Tambe a haña algun den e continente su Teritorio Nort tropical.

Pensa riba e beneficionan pa esnan cu ta saca honing for di cas di abeha. Un criadó di abeha a bisa: “Aunke mi ta bisti un velo contra abeha i suèter turtleneck pa traha cu [otro sorto di abeha], mi no mester di nada pa protehá mi mes contra [abeha cu no ta pica]. Cincu minuut despues cu mi habri e caha di abeha, ainda e abehanan ta traha como si fuera mi no ta einan.”

E casnan di abeha cu no ta pica ta hopi distinto for dje otro abehanan di honing. De echo, hopi bes ta yama nan neshi. En bes di warda honing i pollen den e panal normal hexagonal (di seis banda), e abehanan cu no ta pica ta traha troshi di pochi oval. Nan ta seya e pochinan ora esakinan yena, anto ta traha otro pochi riba nan of rond di nan.

Den e Neshi

Laga nos tuma un tour den e neshi, cu ta cas di un 15.000 abeha cu no ta pica. Pero tog tene cuidou, pasobra maske e abehanan aki no ta pica, nan por morde bo cu nan kakumbein.

Pasando dor dje gang dje neshi, nos ta topa un mundu di actividad. E abehanan aki ta traha ègt manera un tim. Cada un sa precis  kico pa haci i unda mester hacié. Nos ta mira un abeha chikititu ta duna forma i pòlish un pochi di honing nobo, como si fuera e ta siguiendo un mapa cuidadosamente. Banda di nos tin cuater abeha mas, seyando un pochi cu a caba di yena cu honing. Un trali grandi tridimensional ta e frame den cua nan ta traha e pochinan di honing. E obra maestro aki di ingenieria ta yuda carga e peso dje honing.

Awor nos ta drenta e siguiente compartimentu i ta nota un abeha cu ta hopi mas grandi cu e otronan. Esaki ta e reina den tur su splendor! Esta bunita e ta, bistí na ronchinan pretu cu oro briyante i rondoná pa un multitud di otro abeha cu ta druk bezig! Awor e reina ta cuminsá pone webu den e 60 celnan cu a ser prepará p’e. Esta cuidadoso i precis e ta, i e ta haci nos corda un mama cu ta poniendo su baby den wieg! Ripará tambe con lihé e trahadónan ta seya e celnan su tras. Den un par di minuut so, e trabou ta cla.

Ora e Webunan Brui

Ora e webunan brui, cada larva chikitu cu sali ta come e cuminda cu nan a pone den e cel p’e. Despues cu e bira muchu grandi p’e cel di was, e larva ta traha un pop di seda pa su mes. Den e pop aki e larva ta cambia bira abeha. Despues e ta sali for dje pop i ta cuminsá traha, pero esei ta despues cu e abehanan verpleegster a malcri’é un tiki. Kico ta pasa cu e celnan di was? Mesora ta coleccioná nan i ta reciclá e material. Una bes e abehanan sali for di nan pop, no tin mester dje pop mas. Si laga nan ei, ta potoshi so e ta forma den e neshi. P’esei vários abeha di limpiesa ta deshací dje material aki cu a keda atras.

Hopi sorto di abeha cu no ta pica ta producí un material di construccion cu yama cerumen. Nan ta producí esaki di was dje  abehanan mes su curpa combiná cu hars i was cu nan ta coleccioná for di mata i palu. E abehanan ta usa cerumen pa traha un frame di pilar i biga i balki dwars, cu tur djoin reforsá. Segun nan ta forma e pochinan pa honing i pollen den e frame aki, tin abeha ta core rond den e pochi, i asina forma i primi e cerumen. Caba ta yena e pochinan i seya nan pa warda. Riba instinto e abehanan sa e balor cu mata tin den cierto temporada i e peligernan di weer di cierto temporada. Parce cu nan ta bon conciente cu mester coleccioná i conserbá cuminda como un rekisito importante pa sobrebibencia.

E abehanan ta bandoná e neshi i ta bai en busca di nan material di construccion i tambe di néctar i pollen. Una bes e abeha ta pafó dje neshi, e ta bira un piloto i guia competente. Tambe e abeha sa precis kico pa coleccioná i unda pa hañ’é.

Cuminsando un Cas Nobo

Segun cu e colonia ta crece, e neshi ta yena completamente. Kico ta pasa awor? Parce cu e mensahe cu ta bai n’e famia ta: “Nos tin cu traha un otro cas.” De bes en cuando, un solo abeha exploradó lo investigá un buracu cu por ta un sitio apropiado pa un neshi. Despues e “ingenieronan” ta bishitá e sitio. Por lo general entre 30 pa 50 dje expertonan aki lo inspeccioná e superficie paden dje buracu pa vários ora, como si fuera nan ta hala liña i pone staca. Caba, ora nan a determiná cu e fundeshi ta bon, nan ta bai cas bek, aparentemente pa raportá. Siguientemente, por lo general denter di 48 ora, e “constructornan” mes ta yega. Por tin mas cu mil abeha den e grupo di trahadó, pero sin reina. Nan ta cuminsá traha rápidamente, treciendo material di construccion i cuminda for dje neshi original.

Preparando pa yegada dje reina dje neshi nobo aki, nan mester traha e neshi di brui pa e mantené e temperatura corecto, esta, rond di 28 grado Celsius. Pa logra esaki, abeha trahadó ta fura e neshi di pafó cu un muraya di cerumen, como si fuera lorando e neshi den un klechi. Ta como si fuera e abehanan sabí aki sa cu mester tene e webunan cayente. Awor tur cos ta cla, i rond dje di nuebe dia nan ta trece e reina nobo cu tabata desaroyá den e neshi original. Mesora, e ta cuminsá pone webu cu lo producí mas abeha pa su palacio.

Gradualmente, e abehanan cu a muda for dje neshi original lo muri i ser remplasá pa abeha nobo i mas yong dje cas nobo aki. Cu tempu, e abehanan dje neshi aki lo haña cu ta necesario pa traha un otro cas. I asina e ciclo asombroso, diseñá pa un Creador sin igual, ta sigui!

[Plachi na página 21]

En bes di construí un panal di seis banda, e abehanan cu no ta pica ta construí troshi di pochi oval

[Plachi na página 22]

Na Australia tin por lo ménos dies sorto di abeha cu no ta pica