Fe bou di Prueba na Polonia

SEGUN E RELATO DI JAN FERENC

MI TABATA mucha ainda ora cu Segundo Guera Mundial tabata den su furia. Mi ta corda bon con un tio cu tabata Testigo di Jehova, tabata bishitá nos cas i lesa pa nos for di Bijbel. Mi mayornan no tabata interesá, pero ami, mi ruman homber Józef i mi ruman muher Janina, sí. Poco tempu despues nos cada un a simbolisá nos dedicacion na Jehova mediante bautismo. Tempu mi a bautisá, mi tabatin 14 aña so.

Observando e excelente efecto cu studio di Bijbel tabatin riba nos bida, nos mayornan a cuminsá scucha. Ora mi tata a realisá cu Bijbel ta condená idolatria, e di: “Si esei ta loke e Palabra di Dios ta bisa, anto e pastornan a laga nos keda den ignorancia. Mi yu, kita tur e imágennan for di muraya i benta nan afó!” Rond di dos aña despues, mi mayornan a bautisá. Nan a sirbi Jehova fielmente te na nan morto.

Problemanan Cu Nos A Confrontá

Testigonan di Jehova a confrontá tempu difícil despues cu guera a caba. Por ehempel, e Departamento di Siguridad a tene un razia riba e oficina na Lodz, i a arestá esnan cu tabata traha einan. Den oost di Polonia gueriya dje Forsanan Armá Nacional, bou di influencia di clero católico, a atacá Testigonan di Jehova brutalmente. *

Tambe rond dje tempu aki, e autoridadnan comunista a hala e permit aden cu anteriormente nan a duna nos pa tene asamblea, i nan a purba interumpí e asambleanan cu ya caba tabata tumando lugá. Sin embargo, e creciente oposicion a haci nos mas decididu ainda pa sigui predicá e Reino di Dios. Na 1949 mas cu 14.000 Testigo a raportá na Polonia.

No muchu tempu despues mi a bira pionero, esta, un minister di tempu completo di Testigonan di Jehova. Mi promé asignacion tabata un 500 kilometer leu for di mi cas. Sin embargo, cu tempu mi a ser nombrá pa sirbi como superintendente biahero den un área oost di Lublin, no muchu leu for di caminda mi mayornan tabata biba.

Arestá i Persiguí

Na juni 1950, autoridadnan comunista a arestá mi i acusá mi di ta spioná pa Merca. Nan a tira mi den un bodega húmedo. Anochi nan tabata saca mi pa un oficial di investigacion interogá mi. El a bisa mi: “E asociacion religioso cu bo ta afiliá na dje ta un secta i un enemigu di nos Estado. Boso sede ta traha pa e agencia di inteligencia mericano. Nos por proba esei! Bo rumannan a admití caba cu nan a biaha rond e pais i a coleccioná datos riba facilidadnan i fábricanan militar.”

Claro cu e acusacionnan ei tabata completamente falsu. No obstante, e oficial a consehá mi firma un declaracion den cua mi ta renunciá loke el a yama “bo organisacion bergonsoso.” Bes tras bes el a purba obligá mi firma. El a asta purba obligá mi skirbi nomber i adres di tur Testigo cu mi conocé i e lugánan for di unda tabata distribuí nos publicacionnan. Su esfuersonan tabata en bano.

 Despues di esei, e oficialnan a bati mi cu klop te ora mi a perde conocimentu. Anto, nan a muha mi cu awa pa trece mi bij, i a reanudá e interogacion. E siguiente anochi, nan a bati mi ferosmente na mi hilchi. Mi a roga Dios na bos haltu pa duna mi forsa pa wanta. Mi a sinti cu el a hacié. E interogacionnan ei den anochi a tuma lugá regularmente pa casi un aña.

Nan a saca mi for di prizon na april 1951, pero tabatin hopi Testigo encarcelá ainda. Mi a bai cerca un Testigo encargá i a pidié un asignacion nobo. “Bo no tin miedu pa nan arestá bo atrobe?” el a puntra mi. “Mi ta mas decididu ainda pa traha caminda tin mayor necesidad,” mi a contest’é. Mi a reanudá mi trabou como superintendente biahero, i despues a ser invitá pa organisá e trabou di imprimí i distribuí nos publicacionnan na Polonia.

E tempu ei nos tabata usa mashinnan anticuá di stencil pa duplicá E Toren di Vigilancia. E calidad di nos imprenta tabata malu, i nos tabatin cu paga prijsnan exorbitante pa papel, ya cu e tempu ei tabatin scarcedad di papel. Mester a haci e trabou di stencil den lugánan isolá, manera mangasina, bodega i zolder. E rumannan cu nan a descubrí a haña castigu di prizon.

Mi ta corda un pos secu cu nos a haci uso di dje. Den su muraya, un 12 meter bou di suela, tabatin un luik cu a hiba na un cuarto chikitu caminda nos a stencil e revistanan. Pa yega einan, nos mester a baha cu cabuya. Un dia, mi tabata bahando den e pos den un hember grandi di palu, ora cu di ripiente e cabuya a kibra. Mi a cai te abou i a kibra mi pia. Despues di a keda hospital pa un tempu, mi a bai bek pa traha cu e mashin di stencil.

Rond dje tempu ei mi a topa Danuta, un pionera celoso. Na 1956 nos a casa, i pa e siguiente cuater añanan, nos a traha huntu den e ministerio den Polonia central. Pa 1960 nos tabatin dos yu, i nos a dicidí cu Danuta lo stop cu e ministerio di tempu completo pa atendé nan. No a tarda hopi cu mi a ser arestá atrobe, i e biaha aki nan a pone mi den un cel pestá cu djaca. Shete luna despues, mi a ser sentenciá na dos aña di prizon.

Drenta-Sali Prizon

Tabatin mas cu 300 prezu den e prizon Bydgoszcz, i mi a pidi Jehova den oracion pa mi por a compartí e mensahe di Reino cu esnan di curason sincero. Mi a papia cu e hefe di prizon, i a lagu’é sa cu mi por traha como barbero. Pa mi sorpresa, el a bai di acuerdo. Djis despues mi tabata feita e prezunan, corta nan cabei i duna testimonio na esnan cu a parce di reaccioná faborabel.

Den poco tempu, e prezu cu tabata traha como barbero huntu cu mi a reaccioná bon riba nos combersacionnan. El a asta cuminsá compartí cu otronan e cosnan cu el a siña for di Bijbel. No a tarda hopi cu e hefe di prizon a  manda yama nos i a ordená nos pa stop di plama loke el a catalogá como “propaganda subversivo.” Mi colega barbero a para firme. El a splica: “Mi tabatin custumber di horta, pero awor mi no ta hacié mas. Mi tabata adicto na nicotina, pero mi a stop di huma. Mi bida a haña un propósito, i mi kier bira un Testigo di Jehova.”

Ora mi a sali for di prizon, e rumannan a manda mi Poznan pa mi supervisá un “panaderia,” manera nos tabata yama nos drukkerijnan secreto. Pa fin di añanan 1950, nos drukmentu a mehorá hopi. Nos a siña con pa reducí e tamaño di página fotográficamente—un logro importante den nos tecnologia—i traha cu mashin di druk Rotaprint offset. Na 1960 nos a cuminsá druk i encuaderná buki tambe.

Djis despues, un bisiña a notificá autoridadnan di nos actividad, i mi a ser arestá un biaha mas. Despues cu mi a sali na 1962, mi a ricibí asignacion pa sirbi na Szczecin huntu cu vários otro ruman. Pero promé cu nos mester a bai, nos a ricibí informacion cu nos a kere cu a bini di rumannan cristian leal, pa nos bai Kielce na lugá di Szczecin. Sin embargo, ei nan a arestá nos, i mi a ser sentenciá atrobe na un aña i mei di prizon. Nos a ser traicioná dor di impostornan den nos seno. Cu tempu, a descubrí nan i a saca nan for di entre nos.

Ora cu despues di tempu mi a sali for di prizon, mi a ser nombrá pa supervisá nos actividad di imprimí den henter Polonia. Na 1974, despues di a evitá di ser detectá pa dies aña, nan a busca mi te ora nan a haña mi i arestá mi na Opole. Djis despues nan a manda mi prizon na Zabrze. E hefe di prizon a bisa mi: “Bo trabou di obispu a caba. Si bo sigui compartí bo propaganda, bo ta bai kashot.”

Predicando den Prizon

Claro cu mi trabou como minister tabata leu di caba. De echo, mi a cuminsá un studio di Bijbel cu dos di mi compañeronan di prizon. Cu tempu, nan a haci progreso te cu mi a bautisá nan den un badkuip grandi den prizon.

Otro prezunan tambe a reaccioná bon riba nos predicacion, i na april 1977, nos a reuní huntu pa tene e Memorial dje morto di Cristo. (Lucas 22:19) Dos luna despues, na juni 1977, mi a sali i no a ser arestá mas.

Pa e tempu ei e autoridadnan tabata tolerá nos trabou mas tantu. Sin duda bishita di miembronan dje Cuerpo Gobernante di Testigonan di Jehova a yuda mashá. Na 1977, tres di nan a papia cu superintendentenan, pioneronan i Testigonan di hopi tempu den vários stad. E siguiente aña, dos di nan a haci un bishita di cortesia na e Departamento di Asuntunan Religioso. Sin embargo, tabata te na 1989 numa cu nan a kita e prohibicion riba nos trabou. Actualmente, un 124.000 Testigo ta activo na Polonia.

Debí na mal salú, Danuta no por a compañá mi den e último añanan, pero e ta animá mi i kier pa mi sigui bishitá congregacionnan. Lo mi keda eternamente gradicidu pa su yudansa fortalecedor durante e hopi biahanan cu mi a bai cerá.

E decision cu mi a tuma 50 aña pasá di sirbi Jehova Dios, tabata sigur esun corecto. Mi a haña gran goso den sirbié di henter mi curason. Ami cu mi esposa a experenciá e realidad dje palabranan registrá na Isaías 40:29: “E [Jehova] ta dunando poder na esun cansá; i esun sin energia dinámico e ta haci abundá den pleno potencia.”

[Nota]

[Plachinan na página 28]

Nos a usa un mashin di stencil i despues un mashin di druk Rotaprint offset pa imprimí e publicacionnan

[Plachinan na página 29]

Mi esposa Danuta, i ami