Ora e Ceru A Purba Uni cu Laman

DJE CORESPONSAL DI SPIERTA! NA VENEZUELA

ENTRE Carácas, e capital di Venezuela, i laman tin un ceru di 2.000 meter haltu cu yama El Ávila. Na su banda nort tin un repi di costa smal i hopi poblá. Venezuela su aeropuerto principal ta situá einan, i pa bai Carácas for di aeropuerto, turistanan tin cu biaha dor di un tunel cu ta pasa stret dor dje ceru.

Aña pasá december, despues di awaceru torencial, El Ávila tur saturá no por a wanta mas. A parce como si fuera su bandanan a rementá, segun cu dies di miles di meter cúbico di awa tabata basha for dje ceru. Manera un persona a expres’é, a parce como si fuera e ceru tabata purba uni cu laman. Un avalancha di awa, lodo, baranca i palu a tapa cas, di chosa te vila. Cama, frishider, television i asta hende a ser hibá cu e avalancha. Un homber bieu a bisa cu el a kere cu tabata fin di mundu.

Cu tempu, awaceru a stop di cai, i e awanan di inundacion a cuminsá baha. Segun un cálculo, kisas un 50.000 hende a muri, i 400.000 a keda sin cas. Cu bon motibu anto nan a yama esaki “e pió desaster natural den historia di Venezuela.”

Scapa na Wowo di Angua

Dia 15 di december, Juan Carlos Lorenzo cu su tata tabata atrapá entre dos riu desbordá. Nan a bandoná nan vehículo i a djoin 35 hende den un edificio. Sin embargo, djis despues awa a cuminsá basha paden i subi rápidamente. Nan tur a logra yega riba dak. Miéntras tantu,  barancanan grandi i tronconnan di palu tabata bati e edificio. No a tarda hopi cu e murayanan dje promé i di dos piso a basha den otro, di manera cu solamente e pilarnan cu e dak a keda para. E structura instabil aki tabata sagudí segun cu baranca i palu a sigui dal den dje.

Un helicopter a aparecé, pero e no por a baha riba e edificio frágil. Ora e helicopter a bira bai, Juan Carlos cu su tata a yama otro ayó cu awa na  wowo, convencí cu nan lo muri. E ora ei dos helicopter a yega. Segun cu e pilotonan den un forma ábil a keda bula riba nan, nan a logra hisa tur e hendenan riba dak un pa un i hiba nan na un lugá sigur. Asina cu e helicopternan a bai, e edificio a basha den otro den e awanan agitá. Nan a scapa net na ora!

Nan a evacuá miles di hende, algun den avionnan chikitu, via caretera, cu barcunan militar diseñá pa baha riba playa. Cu cabuya nan tabata guia filanan largu di hende—algun cu mucha riba nan scouder—dor di ola pa subi e botonan. Miéntras algun hende a logra scapa algun artículo personal, hopi a bai cu solamente nan paña na nan curpa.

Actividadnan di Auxilio

Na e oficina di sucursal di Venezuela di Testigonan di Jehova, actividad di auxilio a cuminsá asina cu nan a tende dje desaster. Sin embargo, e careteranan sea tabata cubrí cu ruina of simplemente a laba bai. Despues di un par di dia, nan a habri un solo banda dje caretera principal pa uso di emergencia, i autoridadnan a permití vehículonan di Testigo cargando remedi i personal cualificá pasa. Un funcionario a bisa despues: “Gobiernu ta bon conciente cu Testigonan di Jehova tabata entre e proménan pa yega cu yudansa i pa saca hende for dje área.”

E Testigonan a organisá búskedanan pa haña esnan cu tabatin mester di yudansa. Nan a areglá transporte pa hiba esnan evacuá Carácas, caminda hopi a yega sin nada. A establecé sitionan den e stad pa colectá cos, di manera cu cuminda, paña i remedi por a ser distribuí na esnan den necesidad. Pero mayoria di nan tabatin mester di mas cu cuminda i paña. Nan tabatin mester di lugá pa biba desesperadamente. Gustosamente nan rumannan cristian a tuma nan den cas.

Asta hopi tempu despues dje desaster, hende tabatin amigu i famia ta biba cerca nan. Joel i Elsa, Testigonan na Puerto Cabello, ta biba den un apartamento chikitu. Un luna despues dje tormenta, ainda nan tabatin 16 hende ta biba ei huntu cu nan. Hopi hende a perde no solamente nan cas, sino tambe nan trabou. Nan lugá di empleo simplemente no ta existí mas.

Lamentablemente, resortnan i stadnan portuario cu anteriormente tabata yen di actividad, a bira casi ireconocibel. Algun vehículo tabata sali for dje lodo, miéntras cu otronan tabata manera di pleister contra muraya, lorá rond di pilar of pegá den porta of bentana. Un capa di lodo duru—den algun lugá te cu tres meter hundu—a hisa e nivel di cayanan asina haltu, cu segun cu un persona a cana riba nan e tabata na mésun nivel cu di dos piso of asta pareu cu dak di edificionan cu el a pasa!

Algun hende na Venezuela a comentá cu e desaster a siña nan un les balioso: pa nan no pone nan confiansa den cosnan material. (Lucas 12:29-31) Un cantidad di hende a bin apreciá e conseho di Jesucristo: “Stop di acumulá tesoronan pa bo mes riba tera, unda mòt i frustu ta destruí, i unda ladron ta kibra drenta i horta. Mas bien acumulá tesoronan pa bo mes den shelu, unda ni mòt ni frustu ta destruí, i unda ladron no ta kibra drenta i horta. Pasobra caminda bo tesoro ta, ei bo curason tambe lo ta.”—Mateo 6:19-21.

[Mapa/Plachinan na página 16, 17]

(Pa e teksto den su formato kompleto, wak e publikashon)

VENEZUELA

Carácas

Área di desaster

COLOMBIA

[Plachi na página 17]

Rubén Serrano, banda di loke a resta di su cas

 [Plachinan na página 18]

1. Boluntarionan a reuní artículonan di auxilio na Carácas

2, 3. Congregacion Maiquetía a kita mas cu dos meter di lodo duru for di nan Salon di Reino

4. E Testigonan aki a perde nan cas i despues a ofrecé nan mes boluntariamente pa traha cas nobo pa nan mes i otronan

5. Un dje casnan casi cla na San Sebastián de los Reyes