Un Mihó Salú—Un Rumbo Nobo?

Masha poco tópico ta interesá hende mas cu esun di salú. Tin biaha, ta parce cu tin mes tantu opinion cu tin hende cu ta practicá medicina. En bes di tuma parti pa esun of e otro, Spierta! cu e seri di artículo aki ta purba duna informacion riba e creciente uso di tratamentu cu comunmente ta ser yamá alternativo. Nos no ta apoyá ningun tratamentu médico cu nos ta bai trata, ni cualkier otro. Hopi tipo di tratamentu no ta ser mencioná, algun di nan ta basta popular, algun controversial. Nos ta kere cu por lo general educacion relacioná cu cuestionnan di salú ta útil; decisionnan relacioná cu cuestionnan di salú ta algu completamente personal.

TUR hende kier ta salú. Pero un bon salú por ta algu difícil pa alcansá, manera por mira na e cantidad di hende cu tin kehonan di salú. Tin personanan ta haña cu awendia tin mas hende malu cu nunca promé.

Pa por combatí malesa, dokternan ta dependé hopi riba prescribí recept pa remedinan cu ta ser desaroyá i promové agresivamente pa companianan farmacéutico. Remarcablemente, e mercado mundial pa e remedinan ei a aumentá drásticamente den décadanan recien, di un par di mil miyon florin pa cientos di miles di miyon florin pa aña. Kico tabata e consecuencia?

Remedi cu dokter ta prescribí a yuda hopi hende. Tog, e salú di algun hende cu ta usa remedi sea a keda mescos of a bira pió. P’esei, último tempu algun a acudí na otro métodonan di tratamentu médico.

Na Unda Hopi Ta Acudí

Na lugánan caminda medicina convencional i moderno tabata e norma pa cuido, awor tin hopi hende ta acudí na loke a ser yamá terapianan alternativo of complementario. E revista Consumer Reports di mei 2000 a bisa: “Ta parce cu e Muraya di Berlin cu pa hopi tempu a separá terapianan alternativo for di medicina convencional, a cuminsá basha abou.”

E revista The Journal of the American Medical Association (JAMA) di 11 di november 1998, a remarcá: “Terapianan médico alternativo, definí como intervencion debí na e manera cu nan ta funcioná, cu no ta ser siñá ampliamente den scolnan médico i cu por lo general no ta disponibel den hospitalnan mericano, a atraé creciente atencion nacional di medionan di comunicacion, di comunidad médico, agencianan gubernamental i e público.”

Sin embargo, tumando nota di tendencianan recien, e revista Journal of Managed Care Pharmacy a splica na 1997: “Ántes, dokternan cu tabata practicá medicina convencional tabata duda di prácticanan médico alternativo, pero 27 scol médico na Merca [un informe mas recien ta bisa 75] ta ofrecé actualmente e opcion pa scoge curso di medicina alternativo, entre e scolnan ei tin Harvard, Stanford, Universidad di Arizona i Yale.”

JAMA a nota loke hopi pashent ta haci den un esfuerso pa mehorá nan salú. E revista a informá: “Na 1990, segun cálculo 1 (19,9%) di cada 5 persona cu a consultá un dokter pa un enfermedad principal a usa tambe un terapia alternativo. E porcentahe aki a aumentá te casi 1 (31,8%) di cada 3 na 1997.” Tambe e artículo a remarcá: “Encuestanan nacional efectuá pafó di Merca ta sugerí cu medicina  alternativo ta popular den tur parti dje mundu industrialisá.”

Segun JAMA, e proporcion di poblacion cu a usa tratamentunan alternativo denter di un periodo recien di 12 luna tabata 15 porciento na Cánada, 33 porciento na Finlandia i 49 porciento na Australia. “E magnitud dje demanda pa terapia alternativo ta remarcabel,” JAMA ta admití. Esaki ta cierto foral en bista dje echo cu rara bes seguro ta paga terapianan alternativo. P’esei e artículo den JAMA a concluí: “E uso actual probablemente no ta reflehá bon cuantu hende mas lo bai usa nan si den futuro seguro cuminsá paga mas terapia alternativo.”

Den hopi pais e práctica general ya pa basta tempu caba ta e tendencia pa integrá terapia alternativo cu esnan convencional. Dr. Peter Fisher, di Hospital Homeopático Real di Londen, a comentá cu e formanan principal di medicina complementario a bira “casi convencional den hopi lugá. No ta existí mas dos tipo di medicina, ortodox i complementario,” el a declará. “Tin solamente bon forma di practicá medicina i mal forma di practicá medicina.”

Pues anto, hopi profesional médico djawe ta reconociendo e balor di tantu medicina convencional como di terapianan alternativo. En bes di insistí pa un pashent aceptá sea un forma di medicina of e otro, nan ta recomendá pa saca probecho di loke sea ta e cos cu ta resultá na beneficio dje pashent for di tur e vários formanan di terapia curativo cu tin.

Cua ta algun método curativo di loke nan ta yama medicina alternativo of complementario? Ki tempu i na unda algun di esakinan a originá? I di con asina tantu hende ta usa nan?