E Punto di Bista Bíblico

Zodiac Mester Influenciá Bo Bida?

“TIN BASTANTE HOBEN I ADULTO CU TA BUSCA INDICACION DI NAN DESTINO DEN STREA.”—PAPA JUAN PABLO II.

SEGUN un encuesta, 1 di cada 4 mericano ta usa astrologia ora di tuma decision. Consultá signo di astrologia no ta limitá na solamente e parti ei di mundu. Casi rond mundu, hende ta consultá nan signo di zodiac pa conseho riba asuntunan financiero, plannan di biahe, cambio di carera, fecha di casamentu i estrategianan militar. Nan ta bisa cu un hende su signo por identificá prospectivo partnernan i por asta revelá cua partnernan lo ta incompatibel. Di Oriente pa Occidente, astrologia a capturá e atencion di miyones di hende. Pero kico ta e orígen di zodiac?

Antecedente Histórico

E orígen di vários forma di zodiac por ser hañá bek den e civilisacionnan mas bieu conocí. Asta Bijbel ta mencioná “e constelacionnan di zodiac.” (2 Reynan 23:5) Evidentemente, den tempu antiguo hindú i tambe chines, egipcio, griego i otro pueblonan a consultá e zodiac. Sin embargo, den antiguo Babilonia a haña e referencianan mas bieu na e signonan di zodiac.

E babilonionan a desaroyá astrologia den un intento pa obtené informacion tocante futuro. Segun cu nan a haci anotacion di movementunan celestial, nan a traha mapa i tabèlnan elaborá. For di esakinan, nan a pronosticá asuntunan humano i sucesonan terenal. Den hopi caso no tabata tuma decisionnan político ni militar, promé cu a yama e astrólogonan pa nan duna nan conseho. Pues asina, un grupo sacerdotal cu tabata pretendé di tin sabiduria special i podernan sobrenatural a bin haña gran influencia. De echo, tur tempel importante na Babilonia tabata ekipá cu un observatorio celestial.

Den tempu moderno signo di zodiac ta sigui hunga un papel importante den bida di hopi hende. Asta esnan cu ta bisa cu nan no ta kere den horoscop, kisas ta consult’é de bes en cuando djis pa pret of pa curiosidad. Ta berdad cu astrólogonan a haci algun pronóstico cu a realisá. Pero esei kier men cu ta probechoso pa consultá e streanan?  Realmente, con sirbidónan di Dios di antiguo a mira interes den astrologia?

Peligernan Scondí

Distinto dje babilonionan, hudiunan fiel no a practicá astrologia, i pa un bon motibu. Dios a spierta nan bon cla: “No mester ta hañá den bo . . . ningun hende cu ta usa divinacion, practicante di magia ni ningun hende cu ta busca señal ni ningun hacidó di bruha, of un persona cu ta mara otronan cu un maldicion ni ningun cu ta consultá un medium spiritista of un pronosticadó profesional di sucesonan ni ningun cu ta puntra e mortonan. Pasobra tur hende cu ta haci e cosnan aki ta algu detestabel pa Jehova.” *—Deuteronomio 18:10-12.

Dios su sirbidónan a tuma un posicion firme contra astrologia. Por ehempel, fiel rey Hosías “a kibra e negoshi di . . . esnan cu tabata haci huma di sacrificio na Baal, na solo i na luna i na e constelacionnan di zodiac.” Bijbel ta bisa cu e accion di Hosías tabata “recto den bista di Jehova,” i Dios a bendicion’é pa esei. (2 Reynan 22:2; 23:5) Pero tin hende kisas ta puntra: ‘No ta asina cu por lo ménos algun pronóstico di astrólogonan ta realisá?’

Ta interesante cu den e Scritura Griego Cristian, nos ta lesa di un mucha muher cu “tabata percurá hopi ganashi pa su doñonan practicando e arte di pronosticacion.” Aparentemente, algun dje cosnan cu e mucha muher aki a predicí a realisá, ya cu su doñonan tabata haña ganashi di su podernan. Pero kico tabatin tras dje mucha muher aki su abilidad di pronosticá sucesonan den futuro? Bijbel ta bisa cu e tabata bou di influencia di “un spiritu, un demoño di divinacion.”—Echonan 16:16.

Bijbel ta mustra cu “henter e mundu ta drumí den poder dje malbado,” Satanas e Diabel. (1 Juan 5:19) Dor di maniobrá sucesonan pa laga cierto pronóstico realisá, Satanas i e demoñonan a capturá e atencion di miyones di hende.

E berdad simpel ta cu astrologia ta un di “e mal inventonan dje Diabel,” cu e ta usa pa controlá i influenciá hende pa sirbi su propósito. Pues, casi no ta un sorpresa cu Bijbel ta urgi cristiannan pa “para firme” contra e mañanan ingenioso di Satanas, locual ta incluí astrologia. (Efesionan 6:11) Pero esei kier men cu nos no tin ningun guia relacioná cu futuro?

Bijbel—Un Guia Confiabel

Miyones di hende a descubrí cu Bijbel ta un guia confiabel ora di tuma decision. Manera e salmista David a expres’é, “e recordatorio di Jehova ta digno di confiansa, e ta haci hende sin experencia sabí.” (Salmo 19:7; 119:105) Esaki no kier men cu Bijbel ta splica precis kico un persona mester haci den cada situacion. Mas bien, e Palabra di Dios ta contené principionan cu por yuda nos entrená nos facultadnan perceptivo. Esaki, na su turno, lo capacitá nos pa distinguí loke ta bon i loke ta malu i lo yuda nos tuma decisionnan sabí.—Hebreonan 5:14.

Pues, ta cu bon motibu cristiannan berdadero no ta consultá horoscop, ni sikiera pa pret of pa curiosidad. Mas bien, sabiamente nan ta haci caso dje spiertamentunan den e Palabra di Dios contra tur influencia di demoño, incluso e formanan sutil. Dor di laga Bijbel—en bes di zodiac—influenciá bo bida, bo por disfrutá dje bendicionnan di Dios pa semper.—Salmo 37:29, 38.

[Nota]

[Plachi na página 30]

Zodiac oriental

[Komentario di e plachi na página 30]

Zodiac occidental