E Punto di Bista Bíblico

Ciencia Por Trece Bida Eterno?

AÑANAN PASÁ, e pregunta ei lo a parce ridículo. Pero awor, tin hende ta pensa seriamente riba e prospecto ei. Ya caba, científiconan a logra haci e duracion di bida di muskita i bichi dòbel mas largu dor di usa técnicanan cu segun algun hende por ser aplicá na ser humano.

Investigacion a mustra cu celnan normal di hende ta muri, nan ta dividí nan mes solamente pa un cierto cantidad di biaha. Despues di esei nan ta stop di dividí nan mes. Nan a compará e proceso ei cu un oloshi interno cu ta controlá ki ora hende ta bira bieu i muri. Científiconan ta trahando awor pa ‘reset’ e oloshi aki.

Un teoria popular ta cu e clave di behes ta sinta na punta di cada drachi di DNA, un region yamá telomere. Nan a yega di compará telomere cu e punta di plestik di veter di sapatu, diseñá pa stroba e veternan di fraña. Científiconan a observá cu cada bes cu algun cel dividí, e telomere ta bira mas corticu manera un mecha cu ta kimando. Cu tempu aparentemente e telomerenan ta bira asina corticu te cu e celnan ta stop di dividí. Sin embargo, ora tin cierto enzima presente e telomere no ta bira corticu. Pues, segun e teoria, esaki lo por duna e celnan e potencial pa sigui dividí indefinidamente. Un funcionario di un compania enbolbí den e trabou aki a bisa: “Ta promé bes cu nos por imaginá inmortalidad humano.” Pero no ta tur científico ta di acuerdo cu esei.

Con Morto A Bini

Claro cu pa miles di aña personanan cu tin fe den Bijbel ta kere cu hende tin e posibilidad di bida eterno. Nan confiansa no ta den científiconan humano sino den e Científico Maestro, Jehova Dios, kende a crea tur cos bibiente.—Salmo 104:24, 25.

Bijbel ta mustra cu morto humano no tabata un parti dje propósito dje Creador. E promé pareha humano a ser creá den e imágen di Dios i poné den un hofi paradísico. Nan tabata perfecto, sin defecto di mente ni di curpa. Como tal, nan tabatin e prospecto di biba pa semper riba tera. Esei tabata loke Dios a deseá pa nan. El a instruí nan pa haña yu i extendé Paradijs gradualmente rond mundu.—Génesis 1:27, 28; 2:8, 9, 15.

Manera Génesis capítulo 3 ta mustra, Adam a rebelá deliberadamente contra Dios,  sabiendo cu e castigu lo tabata morto. Ademas, dor di sigui e caminda di desobedencia, el a trece picá i morto riba su desendencia cu no a nace ainda. Apostel Pablo a splik’é asin’akí: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) Cu otro palabra, dor cu Adam a peca, su curpa no tabata perfecto mas. Poco-poco el a bira bieu i a muri. Su desendencia a heredá e defecto ei.

Pues, morto humano a bini como resultado dje rebelion di Adam i e huicio cu Dios a dicta p’e como consecuencia. Hende lo no logra anulá e huicio ei. Aunke ciencia a haci hopi adelanto médico, e palabranan inspirá di Moises, skirbí 3.500 aña pasá, ainda ta expresá un berdad: “Riba nan mes e dianan di nos añanan ta setenta aña; i si debí na poder special nan ta ochenta aña, sin embargo nan insistencia ta den afan penoso i cosnan perhudicial; pasobra e tin cu pasa bai lihé, i nos ta bula bai.”—Salmo 90:10.

Jehova Su Percuracion pa Bida Eterno

Felismente, tin speransa! Aunke actualmente tur hende ta muri tardi of trempan, no ta Jehova su propósito pa e situacion aki sigui indefinidamente. Aunke Adam cu Eva a merecé di muri, Dios tabata sa cu lo bai tin hopi hende entre nan yunan cu no a nace ainda, cu lo bai reaccioná cu aprecio na su supervision amoroso. P’e hendenan ei el a haci un percuracion pa bida eterno riba tera. E salmista a skirbi: “E hustunan mes lo poseé tera, i nan lo biba pa semper riba dje.” (Salmo 37:29) Pero con lo logra esaki?

Esaki lo no sosodé dor cu hende ta logra descubrí e misterionan di DNA. Mas bien, bida eterno ta un don cu Jehova lo otorgá na esnan cu ehercé fe den dje. Reconociendo cu e desendencia di Adam cu Eva tabatin mester di rescate, Jehova a percurá un medio pa nan por gana bida eterno: e sacrificio di rescate di Jesucristo. Jesus a referí na e percuracion aki ora el a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.”—Juan 3:16.

Mescos cu Adam, Jesus tabata un hende perfecto. Distinto di Adam, Jesus a keda perfectamente obediente na Dios. P’esei Jesus por a sacrificá su bida humano perfecto pa paga pa Adam su picá. Mediante e acto amoroso aki—cu a balansá husticia—e yunan di Adam lo por a ser librá dje condenacion na morto. Consecuentemente, tur esnan cu ehercé fe den Jesus lo ricibí Dios su don di bida eterno.—Romanonan 5:18, 19; 1 Timoteo 2:5, 6.

Si hende por a vence imperfeccion i trece bida eterno pa nan mes, lo no tabatin mester dje rescate. Bijbel ta duna e conseho sabí aki: “No pone bo confiansa den e noblenan, ni den e yu di hende terenal, na ken ningun salbacion ta pertenecé. Su spiritu ta sali, e ta bolbe na su suela; den e dia ei su pensamentunan en berdad ta perecé. Felis ta esun cu tin e Dios di Jacob como su yudansa, kende su speransa ta den Jehova su Dios, Esun cu a traha shelu i tera, laman, i tur loke tin den nan, Esun cu ta keda pegá n’e berdad te na tempu indefiní.”—Salmo 146:3-6.

Bida eterno lo bini, no for di investigacion científico, sino for di Jehova. Kico cu Dios cuminsá haci, e por i lo logr’é. “Cu Dios ningun declaracion ta un imposibilidad.”—Lucas 1:37.

[Rekonosementu pa Potrèt na página 30]

© Charles Orrico/SuperStock, Inc.