Hóbennan Sa Puntra . . .

Di Con Tata A Bai Laga Nos?

“Nunca mi no a comprendé pakico precis mi tata a bai. Tur loke mi sa ta loke mi mama a bisa mi.”—James. *

ORA un tata hisa su bela bai for di cas, hopi bes e ta laga atras un situacion di dolor i amargura. James di 14 aña, citá ariba, ta bisa: “Mi tabata hopi molestiá ora mi mama cu mi tata a divorciá.” I ora un tata bai sin duna un splicacion i despues no ta tene contacto cu su yunan, kisas pa añanan largu su yunan lo lucha cu sintimentunan di culpa, rechaso i rencor. *

Si bo propio tata a bai for di cas, kisas bo ta bon na haltura dje motibu. “Mi tata a bai cu un otro muher,” segun un hóben cu yama Michael. “Mi a mir’é cu e muher un biaha, i esei a haci mi masha rabiá. Mi a sinti cu Tata a traicioná nos.” Sin embargo, den algun caso su baida kisas ta un alivio. Melissa, kende su tata ta un alcohólico, ta bisa: “Si el a keda cas, lo tabata mas duru pa nos.”

Pero den hopi caso, yunan no sa pakico nan tata a bai, i esaki por haci su ausencia parce asta mas doloroso. Ta cierto cu kisas bo tabata sa cu bo mayornan tabatin problema, pero por ta bo no a imaginá nunca cu nan lo a kibra cu otro. Robert ta corda: “Ora Tata a bai, ègt mi no a comprendé tur cos cu tabata pasa. Tur loke mi tabata sa ta cu e situacion no tabata bon, pasobra mi mayornan tabata pleita constant.”

Di con algun tata ta bai for di cas? Si bo mes tata a bai, bo mester considerá esei como si fuera el a rechasá abo personalmente? I di con bo mayornan kisas no tin masha gana di conta bo tocante esei? Nan no debe bo un splicacion?

Di Con Nan Ta Keda Ketu

E motibu pakico un tata ta bai nunca no ta agradabel. Hopi bes, e motibu ta adulterio, un malconducta cu por lo general tabata bon scondí for dje famia. Ora un esposa descubrí tal malecho, kisas e ta dicidí di divorciá di su casá. Kisas e ta asta pidié pa bai ketu promé cu entregá e papelnan di divorcio. E yunan por ta no sa mes di con esaki ta pasando.

Sin embargo, purba comprendé di con bo mama kisas lo no tin masha gana di  revelá specíficamente kico a pasa. Un motibu por ta cu e ta sinti cu si e revelá cualkier malconducta di parti di bo tata, esei lo causa pena so. Pensa tambe con doloroso mester ta pa un hende muher descubrí cu su esposo tabata infiel. (Malakías 2:13, 14) Pues si adulterio ta tras dje divorcio di bo mayornan, no keda sorprendí si bo mama ta haña e asuntu demasiado doloroso pa papia di dje.

Kico di bo tata? Ta di comprendé cu si e tabata infiel na bo mama, no ta probabel cu lo e bai papia tocante esei. Tin hende homber ta sinti nan mes asina culpabel pa nan malconducta cu nan ta sinti cu nan no tin cara pa papia cu nan yunan! Sin embargo, apesar di nan comportacion bergonsoso, hopi tata ta sigui stima nan yunan i kisas ta purba pa bolbe haña contacto cu nan.

Den algun caso e tata ta bai debí na malconducta di parti dje esposa, i e ta haci tur esfuerso pa keda cerá cu su yunan. Sin embargo, den otro casonan ora mayornan ta kibra cu otro e no tin nada di haber cu adulterio, mas bien e ta e culminacion di añanan di pleitu matrimonial. * (Proverbionan 18:24) Dor cu hopi bes esaki ta sosodé tras di porta, abo kisas no sa mes pakico nan a pleita.

Bijbel ta bisa na Proverbionan 25:9: “Pleita bo mes caso cu bo próhimo, i no revelá papiamentu confidencial di un otro.” Tin biaha pleitunan matrimonial ta tocante asuntunan privá i íntimo. Por ta lo bo no kere, pero probablemente ta mihó pa bo si bo no tende e cosnan ei. Ademas, hopi bes si revelá “papiamentu confidencial,” esei ta haci un mal situacion pió. Kisas lo bo sinti bo incliná na tuma parti pa esun of e otro, loke lo habri e famia mas for di otro. Pues riba plaso largu, lo por ta mihó pa bo si bo mayornan tene e detayenan di nan pleitunan pa nan mes.

Lucha Contra Rencor dor di Adkerí Comprendimentu Penetrante

Tog, ta difícil pa no sinti rabia i rencor ora bo tata bai for di cas i abo no por contestá e pregunta: Di con? Sin embargo, na Proverbionan 19:11 Bijbel ta remarcá: “E comprendimentu penetrante di un homber siguramente ta tarda [no necesariamente kita] su rabia.” I bo no tin nodi sa tur detaye pa bo tin comprendimentu penetrante.

Por ehempel, Bijbel ta yuda nos mira cu nos mayornan ta imperfecto. E ta bisa: “Tur a peca i no ta alcansá e gloria di Dios.” (Romanonan 3:23) Aceptando e berdad doloroso aki por yuda bo mira e importancia relativo dje erornan di bo mayornan. Si, por ehempel, bo tata a desonrá su voto matrimonial, esei ta un falta serio, unu pa cua e tin cu duna cuenta na Dios. (Hebreonan 13:4) Pero esei no ta nificá necesariamente cu el a rechasá abo of cu e no stima bo.

Tur pareha casá ta sufri “tribulacion den nan carni.” (1 Corintionan 7:28) I aunke no tin excuus pa entregá na malecho, tin hende homber i hende muher ta entregá debí na preshon di bida den e mundu turbulento aki. Robert ta corda: “Tata tabata kier lo mihó pa nos. El a muda nos famia na un área caminda el a pensa cu lo e por a gana un mihó salario pa asina nos por tin un cas bunita i pa e famia lo por ta felis.” Pero no a tarda muchu cu e bon intencion di su tata pa percurá un mihó bida pa su famia a fracasá. Robert ta splica: “Tata a cuminsá baha man na baimentu di reunionnan cristian. Caba el a perde su trabou. Despues di un tempu el a cuminsá maltratá mi mama i mi ruman muher.” Pronto e situacion a bira asina malu cu su tata i mama a divorciá.

 Robert por a bira tur amargá debí na e fracasonan di su tata. Pero un comprendimentu penetrante den e situacion di su tata a baha su rabia. Aunke e kiebro dje matrimonio di Robert su mayornan tabata trágico, esei a siñ’é algu importante. Robert ta bisa: “Dia mi cuminsá un famia, cosnan spiritual tin cu bini na promé lugá.”

Michael, mencioná anteriormente, tambe tabatin cu lucha contra sintimentunan di amargura. E ta admití: “Mi kier a hùrt mi tata pa loke el a haci nos.” Pero el a mantené un relacion cu su tata. Segun cu tempu a pasa, Michael a asta logra laga su rabia bai i sigui cu su bida.

Kisas bo tambe kier purba mantené un relacion normal cu bo tata te asina leu cu e situacion ta permití. Ta cierto cu kisas el a ofendé abo cu bo mama. Pero probablemente bo no ta na altura di tur e echonan. I asta si bo sa cu e ta culpabel di malecho, e ta keda bo tata. Bo tin un obligacion di mustr’é por lo ménos un grado di respet. (Efesionan 6:1-3) Evitá “furia i rabia i griteria i abla ofensivo” ora di trata cuné. (Efesionan 4:31) Si ta posibel, keda neutral relacioná cu e pleitunan matrimonial privá di bo mayornan. Dor di sigurá tur dos cu bo stima nan, lo bo por disfrutá di un bon relacion cu nan tur dos.

No Ta Bo Falta

Si bo tata bai for di cas, esei ta probablemente un dje cosnan mas doloroso cu lo bo yega di experenciá. Pero maske nunca bo no haña sa tur e motibunan di con el a bai, bo no tin nodi sinti cu esei tabata bo falta. Ta berdad cu esei por laga bo sinti como si fuera el a rechasá bo personalmente. Pero masha poco bes matrimonionan ta kibra pa motibu dje yunan. Bo mayornan a haci un voto dilanti Dios cu nan lo keda huntu. Ta nan responsabilidad—no di bo—pa cumpli cu e voto ei.—Eclesiástes 5:4-6.

Si ainda bo ta sinti bo confundí, culpabel of responsabel, pakico bo no ta purba conta bo mayornan esei? Kisas nan lo bira mas habrí i trankilisá bo. James, citá na principio, ta admití: “Ántes mi tabata pensa cu ta mi falta, te ora cu mi mama i mi tata a cai sinta cu mi i a papia cu mi.” E hobencita Nancy tambe tabata sinti su mes culpabel ora su tata cu mama a divorciá. Despues di vários combersacion cu su mama, Nancy a logra concluí: “Mucha no mester culpa nan mes pa loke nan mayornan ta haci.” Sí, lagando bo mayornan ‘hiba nan mes carga di responsabilidad’ por prevení cu bo ta sinti bo mes demasiado cargá emocionalmente. (Galationan 6:5) Pero con bo por enfrentá e situacion awor cu bo ta biba den un cas sin tata? Un futuro artículo den e seri aki lo duna algun contesta.

[Nota]

[Plachi na página 15]

No culpa bo mes pa e problemanan matrimonial di bo mayornan