Haciendo e Selva di Amazona Berde

DJE ESCRITOR DI SPIERTA! NA BRAZIL

DURANTE añanan ’90, mundu a perde anualmente miyones di hectar di selva natural, segun un informe dje Organisacion pa Alimentacion i Agricultura di Nacionnan Uní. Den Brazil su region di Amazona so, mashin di zag i candela ya caba a combertí un área di selva di yobida mas grandi cu Alemania, den un simpel sabana. En bes di un paisahe continuo di top di palu, e dak dje selva ta ser interumpí awor cu pidanan grandi di tereno di klei yen di sker, cubrí cu un capa fini di mal yerba cu pida tronconnan di palu ta hasa den solo.

Aunke e destruccion continuo aki di selva ta alarmante, tin rayonan di speransa. Un programa prometedor ya caba a duna algun resultado. E programa yama agroselvicultura, i un fuente a describié como “un sistema den cua cultivacion di palu ta ser combiná cu plantacion di cunucu of sabana den un manera cu por ser mantené . . . ecológicamente.” Con agroselvicultura ta funcioná? Kico el a logra? Ki prospectonan e por tin pa futuro? Pa haña sa, Spierta! a bishitá e Instituto Nacional pa Investigacion den Amazona (INPA) na Manaus, capital dje Estado Amazonas di Brazil.

E Escape Decepcionante

Johannes van Leeuwen, un agronomista (specialista di plantacion i di tera) hulandes n’e Departamento di Agronomia di INPA, tin 11 aña ta traha cu e cunukeronan den Amazona. Pero pa cuminsá, con bini tin asina tantu cunukero den e selva di Amazona? Cultivacion di cunucu usando mashin na gran escala den centro i sur di Brazil a cuminsá horta cunukeronan chikitu di nan tera i pan di cada dia, loke a pone nan bai biba otro caminda. Otro cunukeronan cu tabata cultivá yute, usá den trahamentu di  sacu di pita, a mira nan pan di cada dia disparcé ora a remplasá sacu di pita pa sacu di plestik. Tambe tabatin otronan cu a biba den regionnan asotá pa secura, i cu a haña nan obligá ta muda en busca di terenonan mas fértil. Pero unda nan por a bai? Ora nan a tende promesanan di tera, cas i tereno fértil den Amazona, nan a sigui e caminda nobo cu a hiba n’e selva di yobida.

Sin embargo, pronto e cunukeronan a descubrí cu nan a establecé nan mes den un área caminda awaceru ta cai pisá, humedad ta haltu, e clima ta cayente i e tereno ta improductivo. Denter di dos pa cuater aña, e tereno tabata completamente agotá i e mésun problema a lanta: hende pober riba tera improductivo. E cunukeronan desesperá a atacá e problema dor di rosa mas parti di selva pa sirbi como tereno pa plantacion.

Ta cierto sí cu no ta e cunukeronan chikitu ta e causa principal dje destruccion di selva di Amazona. Haciendanan grandi di baca, negoshinan grandi di agricultura, industrianan di mina i di kap palu, i proyectonan pa construí dam hidroeléctrico, ta esnan cu a causa mayor parti dje daño. Pero tog, e entrada di cunukeronan chikitu i e método di plantacion di kap-kima cu nan ta practicá a contribuí na destruccion di selva.

 Consultando “Bibliotecanan Bibu”

“Sin importá con grandi nan impacto riba e selva ta,” Van Leeuwen ta bisa, “e cunukeronan pober ei ta aki i nan no tin niun otro caminda di bai. Pues pa baha man na destruccion di selva, nos tin cu yuda nan biba di nan tera sin tin cu destruí mas selva.” I ei ta caminda e programa di agroselvicultura ta drenta, siñando nan un método di plantacion cu ta combatí degradacion di tera i cu ta permití e cunukeronan sigui usa e mésun pida tereno di selva cu nan a rosa pa hopi aña. Con investigadónan a yega na e puntonan specífico dje programa?

Promé cu a lansa INPA su programa di agroselvicultura a pasa añanan di encuesta, cuestionario i tumamentu di muestranan di mata i tera. Informacionnan balioso a sali na cla foral for di entrevistanan cu “bibliotecanan bibu”: indjannan i caboclo, personanan di antecedencia mixto blancu, pretu i indjan, kende nan antepasadonan a establecé nan mes den e conchi geográfico di Amazona.

E habitantenan aki di Amazona tin un mangasina di conocimentu. Nan ta conocí cu e clima local i e tiponan di tera—tera pretu, klei corá, klei blancu, tera corá, i un mescla di santu cu klei—i tambe cu e gran cantidad di fruta nativo, specerei i matanan medicinal cu e selva ta producí. Dor di probechá dje conocimentu aki, agronomista i cunukeronan a bira socio den investigacion, un cooperacion cu a mehorá e calidad dje programa.

Selva No Ta un Mina

A efectuá e programa di agroselvicultura gradualmente. E promé paso tabata pa convencé e cunukeronan pa no mira e selva manera un mina—pa traha cuné i despues bandon’é—sino pa mir’é como un recurso renobabel. Siguientemente, a consehá nan pa planta no solamente casava, bacoba, maishi, aros, bonchi i otro plantacion cu ta crece lihé, sino tambe palu di mata. “Palu di mata?” e cunukeronan a puntra. “Di con?”

Como cu e cunukeronan hopi bes ta bini di áreanan caminda palu di mata no ta hunga un papel den agricultura i como cu nan no ta conocí cu e tiponan di mata di Amazona, investigadónan a splica nan na placa chikitu e beneficionan di planta palu di mata. Nan a splica cu e tera di selva no ta mantené substancianan nutritivo cu plantacion di productonan alimenticio mester. Promé cu e substancianan nutritivo por drenta den por ehempel e plantacion di maishi, awaceru ta laba nan bai cuné. Na contraste, palu di mata ta logra absorbá i acumulá un suministro di substancia nutritivo i ta mantené e tera fértil. Ademas, palunan ta percurá cuminda i sombra pa bestia. Tambe cunukeronan por usa palu di mata como tranké pa marca e límite di nan propiedad. I claro cu palu di fruta por sirbi como un fuente di fruta i di palu cu ta producí entrada.

Tambe a animá e cunukeronan pa planta hopi diferente sorto i variedad di palu. Di con? Pa asina nan por cosechá un gran variedad di fruta i palu. Dje manera ei, e cunukero ta evitá di hañ’é cu un cosecha grandi di solamente un of dos tipo di fruta cu e tin cu bende na prijs abou pasobra tur otro hende ta bendiendo e mésun producto na mésun tempu.

Promé Etapa dje Programa Ta Duna Fruta

Ki tipo di palu nan ta planta? Entregando un lista di 65 mata cu nombernan exótico, agronomista Van Leeuwen ta bisa: “Actualmente nos ta usa entre 30 pa 40 dje palunan di fruta mencioná aki.” Pa mustra cu e programa ta dunando resultado, Van Leeuwen ta mustra vários potret dje mésun pida tereno di selva cu nan a rosa, sacá na diferente periodo.—Mira e cuadro “Con e Selva Por Recuperá.”

Un bishita na e plasanan na Manaus ta mustra cu e promé etapa dje programa di agroselvicultura ta dunando fruta. Na e plasanan aki ya caba tin mas cu 60 diferente tipo di fruta na benta cu ta ser cultivá localmente. Pa loke ta e futuro, agronomistanan ta spera cu mas agroselvicultura saca rais, mas poco-poco e destruccion di selva lo bai. Sí, pasobra una bes un cunukero siña con pa bolbe usa un cunucu bieu, kisas e ta stop di kap selva pa crea unu nobo.

No ta probabel cu e esfuersonan digno di elogio aki lo eliminá e menasa mundial cu tin pa cu e ecologia di tera. Pero nan ta demostrá sí kico por logra ora trata nos recursonan precioso cu respet.

[Kuadro/Plachinan na página 24]

Apelsina cu Acerola, Ta Hala un Banda

Apelsina, e símbolo conocí pa vitamina C, ta nada na comparacion cu un fruta cu a ser aclamá como “e reina nobo di vitamina C.” Asta acerola, e soberano entre e frutanan ricu na vitamina C, tin cu admití derota. E gobernante nobo? Un fruta color lila, chikitu pero potente, tamaño di un druif i cu ta crece den naturalesa den e yanuranan di inundacion di Amazona. Su nomber? Camu-camu. E ta merecé e onor? Un revista brazilero a comentá cu 100 gram di apelsina ta contené 41 miligram di vitamina C, miéntras cu 100 gram di acerola ta contené 1.790 miligram di vitamina C. Sin embargo, e mésun cantidad di camu-camu tin e cantidad enorme di 2.880 miligram di vitamina C: 70 biaha e cantidad cu tin den apelsina!

[Credt Line]

Acerola i camu-camu: Silvestre Silva/Reflexo

[Kuadro/Plachinan na página 25]

E Arte di Planta Grupo di Palu

Despues cu e cunukeronan bai di acuerdo pa adoptá algun parti dje programa di agroselvicultura, agronomista Johannes van Leeuwen por duna nan un proposicion mas detayá, un mapa di nan futuro cunucu di palu. En bes di scoge pa loco i combiná cualkier tipo di palu, ta usa imitacionnan di agro-ecosistema hací riba computer pa yuda determiná cua sorto di palu mester planta i con mester areglá nan. Ta un arte pa planta of areglá sortonan di palu tamaño chikitu, mediano i grandi, den grupo.

Por ehempel, e promé grupo, cu ta consistí di palu di guyaba, guarana i cupuaçu, ta ser plantá cerca banda di otro. E palunan aki ta keda chikitu i ta cuminsá duna fruta trempan. E di dos grupo, di palunan tamaño mediano manera biribá, awakati i palma murumuru, lo bai tin mester di mas espacio. Den e grupo aki, produccion di fruta por lo general ta cuminsá mas lat cu e promé grupo. E di tres grupo, cu ta palunan grandi manera Brazil nut, piquia i mahòk, tin mester di asta mas espacio ainda. Algun palu den e último grupo aki ta producí fruta, otronan ta producí palu balioso i tin di nan tur dos cos. Ora tur e tres gruponan di palu crece huntu, e cunucu ta parce un selva natural.

[Plachinan]

Johannes van Leeuwen (na man drechi)

Un plasa na Manaus cu fruta cultivá localmente

[Rekonosementu]

J. van Leeuwen, INPA, Manaus, Brazil

 [Kuadro/Plachinan na página 26]

Con e Selva Por Recuperá

1. Februari 1993—A kap i kima e palunan riba e pida tereno di selva aki den Amazona central na september 1992. Na januari 1993, a planta mata di anasa. Un luna despues, a planta palu di fruta tambe.

2. Mart 1994—E matanan di anasa a crece, i e palunan di fruta a bira mas visibel. E borchinan chikitu pará banda dje palunan ta identificá nan como abiu, Brazil nut i palma di peach, djis pa mencioná algun. Mal yerba cu e cunukeronan ta kita rond dje plantacion ta beneficiá e palunan tambe. Como si fuera pa mustra gratitud, e palunan a cuminsá rehabilitá e fertilidad dje tera.

3. April 1995—A cosechá e cultivo cu ta crece lihé i a come of bende nan, i un variedad di palu di fruta ta sigui crece.

[Rekonosementu]

Potretnan 1-3: J. van Leeuwen, INPA-CPCA, Manaus, Brazil