Por Fin e Solucion!

IMAGINÁ un mundu den cua hende di berdad ta stima i kier tur mucha. Unu den cua muchanan ta bendicioná cu mayornan amoroso i atento cu tin un deseo sincero pa percurá e mihó guia i direccion posibel pa nan yu. Imaginá un mundu den cua tur mucha ta tantu físicamente como mentalmente sano, caminda bo no ta haña mucha di caya na niun parti, i caminda no ta stroba mucha mas di disfrutá di infancia dor cu necesidad económico ta pone cu nan mester traha!

Algu deseabel? Claro cu sí. Algu cu bo por kere? Testigonan di Jehova ta kere cu sí, i pa dos motibu.

Mayornan Por Percurá Parti dje Solucion

Sin duda lo bo ta di acuerdo cu adultonan tin e poder pa solucioná—tin bes asta pa prevení—algun dje problemanan di mucha.  Claro cu ta asina, basta cu e adultonan ta dispuesto pa haci esei. Sí, mayornan mes tin un dje clavenan pa solucioná e problema.

Por ehempel, adultonan cu por sigui e conseho bíblico cu ta bisa cu “un esposa no mester bai for di su esposo . . . i un esposo no mester bandoná su esposa,” no tin yu cu ta sufri pasobra nan ta biba den un famia kibrá dor di separacion of divorcio.—1 Corintionan 7:10, 11.

Adultonan cu ta dispuesto pa sigui e conseho bíblico pa “cana decentemente, no den paranda i buracheria,” no tin yu cu ta sufri dje angustia causá dor di mayornan burachi of drogadicto.—Romanonan 13:13; Efesionan 5:18.

Adultonan cu ta dispuesto pa sigui e conseho bíblico pa “abstené di fornicacion” ta yuda reducí e riesgo cu nan yunan ta crece sin cu hende kier nan, kisas den un famia di un solo mayor.—1 Tesalonicensenan 4:3; Mateo 19:9.

Adultonan cu ta dispuesto pa sigui e conseho bíblico: “No fada boso yunan, pa nan no bira desanimá,” i cu ta “stima nan yunan” lo no tin yu cu ta experenciá e dolor físico of mental di abusu den cualkier di su vários formanan.—Colosensenan 3:21; Tito 2:4.

En resúmen, si tur adulto tabata dispuesto pa sigui e conseho bíblico cu Jesus a duna: “P’esei, tur loke boso kier pa hende haci na boso, boso tambe di igual manera tin cu haci na nan,” lo tabatin miyones di mucha cu hende no stima of no kier?—Mateo 7:12.

Felismente, tin hopi adulto cu ta dispuesto pa haci tur e cosnan mencioná ariba. Pero, lamentablemente, no ta tur adulto ta dispuesto, i ta ei e problema ta sinta. I asta esnan cu sí ta dispuesto ta nota cu nan intentonan ta ser strobá hopi bes dor di imperfeccion humano i dor di cosnan fuera di nan alcanse. Hende por percurá parti dje solucion pa e problemanan di mucha, pero ta bisto cu nan no por percurá e solucion completo.

Un Gobiernu Divino Cu Lo Percurá e Solucion Completo

E escritor John Ruskin, mencioná den e artículo anterior, tabata kere fuertemente cu “e promé deber di un Estado ta pa soru pa tur mucha cu nace den e pais tin bon caminda di biba, paña, cuminda i educacion, te ora e bira mayor di edad.” Sin embargo, Ruskin a admití cu “afin di [logra] esaki Gobiernu mester tin un autoridad riba e pueblo cu awor aki nos no por ni soña di dje.”

Solamente un gobiernu cu apoyo divino lo por tin e autoridad bondadoso cu Ruskin a papia di dje. I netamente un gobiernu asina a ser primintí, esun cu Jesus a mencioná na Mateo 6:9 i 10. Una bes cu e gobiernu aki di Dios tuma pleno control di asuntunan di tera, lo e ehercé su autoridad riba tur hende i percurá bibienda, paña, cuminda i educacion pa tur su súbditonan, incluso muchanan. (Isaías 65:17-25) Pero e gobiernu perfecto aki lo haci asta mas.

Bou dje Reino di Dios hende lo por lanta yu den un manera balansá. (Job 33:24-26) Lo cria muchanan den e spiritu di pas i hermandad universal, segun e ideal describí den Nacionnan Uní su Declaracion di Derechonan di Mucha. (Salmo 46:8, 9) Nunca mas lo tin mester di un Aña Internacional di Mucha ni un Tratado di Derechonan di Mucha.

Pa Cristo Jesus, Rey dje gobiernu celestial aki, lo ta un tarea fácil pa restorá salú perfecto na mayornan i na muchanan desabilitá. E curacionnan milagroso cu el a efectuá tempu cu e tabata riba tera ta un garantia di esei. (Lucas 6:17-19; Juan 5:3-9; 9:1-7) Asta resucitá muchanan morto i mayornan morto lo no ta fuera di su alcanse!—Mateo 9:18-25.

Esta un goso pa sa cu e tempu pa Dios actua na fabor di muchanan riba tera ta cerca!

 [Kuadro/Plachinan na página 12]

Yudansa pa Hóbennan

Testigonan di Jehova ta masha interesá pa yuda hóbennan evitá problema i tambe pa mustra nan con ta e mihó manera pa trata cu e problemanan cu ta inevitabel. P’esei atrabes di añanan nan a publicá vários yudansa diseñá pa satisfacé e necesidad di hóbennan, for di mucha preescolar te tiener. E publicacionnan aki ta entre otro Mi buki di relato bíblico i Loke hovenan sa puntra—Contesta práctica i tambe un video (na ingles) titulá Hóbennan Sa Puntra—Con Mi Por Haña Berdadero Amigu? Por haña e publicacionnan aki cerca Testigonan di Jehova cu ta biba den bo bario of dor di skirbi e publicadónan dje revista aki.

Pa loke ta trata nan mes yunan, Testigonan di Jehova ta mustra nan cu nan ta yunan deseá i stimá dor di combersá regularmente cu nan over di nan problemanan. Hopi bes mayornan ta usa e excelente material presentá den e yudansanan pa studio ariba mencioná, como base pa un programa regular i progresivo pa entrená hóbennan. Kisas bo por sigui un procedura similar cu bo yunan.