Un Búskeda Continuo pa Solucion

DESDE su comienso, e organisacion di Nacionnan Uní (ONU) tabata interesá den mucha i nan problemanan. Na fin di aña 1946, ONU a establecé e Fondo Internacional di Nacionnan Uní pa Emergencia di Mucha (UNICEF) como un medida temporal pa percurá pa muchanan den áreanan destrosá pa guera.

Na 1953 a haci e fondo di emergencia aki un organisacion permanente. Aunke awor e ta conocí oficialmente como Fondo di Nacionnan Uní pa Mucha, el a keda cu e siglanan original UNICEF. Pues, UNICEF tin mas di mei siglo ta percurá cuminda, paña i cuido médico pa muchanan rond mundu, i ta purba atendé necesidadnan en general di mucha.

E necesidadnan di mucha a haña mayor prominencia na 1959 ora cu Nacionnan Uní a adoptá un Declaracion di Derechonan di Mucha. (Mira e cuadro, página 5.) Nan a spera cu e documento aki lo a generá interes den e problemanan di mucha i cu lo el a yuda solucioná nan dor di stimulá apoyo público, sea financiero of den otro maneranan.

Pero e 1980 Year Book di Collier ta bisa: “Binti aña despues, hopi dje 1,5 mil miyon muchanan na mundu no a logra alcansá gran parti dje ‘derechonan’ aki—foral esnan relacioná cu nutricion, salú i bienestar material.” P’esei pa demostrá cu tabatin e necesidad constante pa solucioná e problemanan di mucha, i na armonia cu su metanan declará, Nacionnan Uní a designá aña 1979 como Aña Internacional di Mucha. Gruponan gubernamental, cívico, religioso i di caridad rond mundu a reaccioná lihé riba e búskeda pa solucion.

Tur Esei Tabata Djis un “Mal Wega”?

Lamentablemente, segun un raport di UNICEF, durante e Aña Internacional di Mucha cos no a bai bon cu muchanan den nacionnan den desaroyo. Na fin dje aña, un 200 miyon di  nan ainda tabata malnutrí, i por a atribuí morto di mitar dje 15 miyon muchanan cu a muri bou di edad di cincu aña, na malnutricion. Dje 100 muchanan cu a nace cada minuut e aña ei den e paisnan aki, 15 lo a muri promé cu nan haci un aña. Ménos cu 40 porciento lo a caba scol básico. Comentando riba e raport di UNICEF, un editorial den e korant Indian Express a keha cu e Aña di Mucha a resultá di ta un “mal wega.”

Tabatin algun persona cu a mira e fracaso aki ta bini. Por ehempel, na comienso dje aña ei, Fabrizio Dentice a skirbi den e revista L’Espresso: “Mester di algu mas cu e Aña di Mucha pa remediá e situacion.” E revista a comentá: “E estilo di bida djawe ta haci nos loke nos ta, i esaki ta loke tin cu cambia.”

Den e búskeda continuo di solucion pa e problemanan di mucha, nan a tene un conferencia cumbre mundial na e sede di ONU na september 1990. Esei tabata un dje reunionnan mas grandi di lidernan mundial den historia. Mas cu 70 lider gubernamental tabata presente. E reunion tabata un continuacion riba e Tratado di Derechonan di Mucha, cu a ser adoptá dia 20 di november 1989, i cu a drenta na vigor dia 2 di september 1990. Pa fin dje luna ei, ya tabatin 39 nacion cu a ratifik’é.

Recientemente UNICEF a comentá: “E Tratado a bira rápidamente e tratado di derechonan humano mas ampliamente aceptá cu nunca, creando asina un empuhe mundial pa mucha.” Sí, te cu november 1999, 191 nacion a adoptá e Tratado. UNICEF a broma: “Den e década despues cu a adoptá e Tratado di Derechonan di Mucha, a haci mas progreso pa realisá i protehá derechonan di mucha cu den cualkier otro periodo comparabel di historia humano.”

Apesar dje progreso aki, presidente aleman Johannes Rau a sintié conmoví pa comentá: “Ta tristu cu den nos tempu ainda nos mester ser recordá cu mucha tin derecho.” Of pa ser recordá cu ainda nan tin problemanan serio! Admitiendo na november 1999 cu “ainda tin hopi cos di haci,” UNICEF a splica: “Mundialmente,  segun cálculo 12 miyon mucha bou di cincu aña ta muri anualmente, mayoria debí na causanan cu por ser prevení fácilmente. Un 130 miyon mucha den paisnan den desaroyo no ta bai scol básico . . . Rond di 160 miyon mucha ta seriamente of moderadamente malnutrí. . . . Hopi mucha indeseá ta pena den orfanato i otro institucionnan, sin educacion i cuido di salú adecuá. Hopi bes hende ta abusá dje muchanan aki físicamente. Segun cálculo, 250 miyon mucha ta participá den un of otro forma di labor.” Tambe a haci mencion dje 600 miyon muchanan cu ta biba den pobresa absoluto i dje 13 miyon cu lo perde por lo ménos un mayor debí na AIDS pa fin di aña 2000.

Ta parce cu lidernan político no por haña un gara riba solucionnan satisfactorio pa e problemanan aki. Sin embargo, problemanan di mucha no ta keda limitá na paisnan den desaroyo. Den nacionnan occidental hopi mucha ta sufri di un otro clase di privacion.

[Komentario na página 4]

“Ta tristu cu den nos tempu ainda nos mester ser recordá cu mucha tin derecho”

[Kuadro/Plachi na página 5]

E Declaracion di ONU di Derechonan di Mucha:

● Derecho di tin un nomber i nacionalidad.

● Derecho di ricibí cariño, amor i comprension, i di siguridad material.

● Derecho di ricibí bon alimentacion, bibienda i servicio médico adecuá.

● Derecho di ricibí cuido special den caso di ta físicamente, mentalmente of socialmente incapacitá.

● Derecho di ta entre e proménan pa ricibí proteccion i auxilio den tur circunstancia.

● Derecho di ser protehá contra tur forma di negligencia, crueldad i explotacion.

● Derecho di pleno oportunidad pa hunga i recreá, i oportunidad igual pa ricibí educacion pornada i obligatorio, pa asina permití e mucha desaroyá su abilidadnan individual i bira un miembro útil di sociedad.

● Derecho di desaroyá su pleno potencial den un ambiente di libertad i dignidad.

● Derecho di ser criá den un spiritu di comprension, tolerancia, amistad entre pueblonan, pas, i hermandad universal.

● Derecho di disfrutá dje derechonan aki sin discriminacion pa motibu di rasa, color, sexo, religion, opinion político of di otro índole, orígen nacional of social, i posicion económico, di nacementu of otro condicionnan.

[Rekonosementu]

Resúmen basá riba Everyman’s United Nations

[Rekonosementu pa Potrèt na página 3]

UN PHOTO 148038/Jean Pierre Laffont

UN photo

[Rekonosementu pa Potrèt na página 4]

Potretnan na página 4 i 5 Giacomo Pirozzi/Panos Pictures