Di Con Amor Ta Caba na Nada?

“Ta parce cu ta hopi mas fácil pa enamorá di un persona cu pa keda enamorá.”—DR. KAREN KAYSER.

PODISÉ e aumento den matrimonionan sin amor no ta un sorpresa. Matrimonio ta un relacion humano complicá, i hopi hende ta drent’é cu masha poco preparacion. Segun dr. Dean S. Edell: “Pa por obtené un permit pa core auto, nos mester demostrá cierto abilidad, pero pa haña permit pa casa ta un firma so bo mester.”

Pues, maske hopi matrimonio ta bona i ta berdaderamente felis, un cantidad ta den tension. Kisas un of tur dos casá a drenta matrimonio cu masha expectativa, pero sin e abilidadnan cu ta necesario pa mantené un relacion di término largu. Dr. Harry Reis ta splica: “Ora hende cera cu otro na principio, nan ta sinti nan masha sigur di otro.” Nan ta sinti como si fuera nan partner ta “e único persona na mundu cu ta mira cos manera nan ta mir’é. Tin biaha e sintimentu ei ta caba na nada, i ora esei sosodé, e por tin un efecto hopi malu riba e matrimonio.”

Felismente, hopi matrimonio no ta yega te n’e punto ei. Pero laga nos considerá brevemente un par di factor cu a pone amor caba na nada den algun caso.

Desilusion: “Esaki No Ta Loke Mi A Verwagt”

Segun Rose: “Ora mi a casa cu Jim, mi a pensa cu nos lo a bira e version local di Doornroosje cu su Prins Encantador, puru romance i ternura i consideracion pa otro.” Sin embargo, despues di un tempu, Rose su “prins” no a parce asina encantador. “Al final, mi tabata sumamente decepcioná den dje,” Rose ta bisa.

Hopi película, buki i cantica popular ta pinta un cuadro irealístico di amor. Ora nan ta namorá otro, un homber i un muher kisas ta sinti cu nan ta bibando un soño cu a bira realidad; pero despues di un par di aña casá, nan ta concluí cu di berdad ta soña nan mester tabata soña! Tur loke ta ménos cu un romance estilo di sprookje por laga un matrimonio razonabel parce un fracaso total.

Claro cu ta completamente na su lugá pa bo tin cierto expectativa den matrimonio. Por ehempel, ta apropiado pa verwagt amor, atencion i apoyo di bo casá. Sin embargo, podisé asta e deseonan aki ta keda sin ser satisfacé. Meena, un bruid hóben na India, ta bisa: “Casi mi ta sinti cu mi no ta casá. . . . Mi ta sinti mi solitario i neglishá.”

Incompatibilidad: “Nos No Tin Nada en Comun”

Un señora ta bisa: “Ami cu mi casá ta 180 grado contrali di otro den casi tur cos. No ta pasa un dia cu mi no ta lamentá amargamente cu mi a dicidí di casa cuné. Gewoon nos no ta pas cu otro den nada.”

Por lo general no ta dura mashá pa un pareha  casá descubrí cu nan no ta pas cu otro dje tantu ei manera a parce tempu nan tabata namorá. Dr. Nina S. Fields ta skirbi: “Hopi bes matrimonio ta saca na cla e característicanan cu e partnernan mes no tabata conciente di dje durante henter nan bida di soltero.”

Como resultado, despues di matrimonio algun pareha kisas ta yega n’e conclusion cu nan ta completamente incompatibel. “Apesar di algun similaridad den gustu i personalidad, mayoria hende ta drenta matrimonio cu diferencianan grandi den estilo, custumber i actitud,” segun dr. Aaron T. Beck. Hopi pareha no sa con pa reconciliá e diferencianan ei.

 Conflicto: “Semper Nos Ta Pleita”

“Nos tabata sorprendí p’e cantidad di biahanan cu nos tabata pleita, asta grita otro, of pió, cana rond hostiná den silencio pa dianan largu,” Cindy ta bisa ora e pensa bek con tabata na principio di su matrimonio.

Den matrimonio, desacuerdo ta inevitabel. Pero con ta manehá nan? Dr. Daniel Goleman ta skirbi: “Den un matrimonio sano, esposo i esposa ta sinti nan liber pa expresá un keho. Pero demasiado bes den e cayente di rabia, kehonan ta ser expresá den un manera destructivo, como un atake contra e casá su caracter.”

Ora esaki sosodé, combersacion ta bira un campo di bataya caminda ta defendé puntonan di bista cu un determinacion implacabel, i palabranan ta bira arma en bes di un medio pa comunicá. Un tim di experto ta bisa: “Un dje cosnan mas perhudicial di pleitamentu cu ta escalá bai for di man ta cu partnernan tin tendencia di bisa cosnan cu ta menasá e bida di nan matrimonio.”

Apatia: “Nos A Legumai”

“Mi a legumai di sigui purba pone nos matrimonio funcioná,” un señora a confesá despues di cincu aña casá. “Awor sí mi sa cu lo e no funcioná nunca. Pues ta cu nos yunan so mi ta preocupá.”

Hende a yega di bisa cu loke realmente ta contrali di amor no ta odio sino apatia. Sí, indiferencia por ta mésun destructivo pa un matrimonio cu conflicto.

Pero lamentablemente, algun casá ta custumbrá asina tantu cu un matrimonio sin amor, cu nan ta stop di carga speransa cu lo bini cualkier cambio. Por ehempel, un esposo a bisa cu keda casá pa 23 aña tabata mescos cu “keda cu un empleo cu bo no gusta.” El a agregá: “Bo ta haci lo mihó cu bo por den e situacion.” Di igual manera, un esposa cu yama Wendy a perde speransa di drecha e relacion cu su esposo cu ken e tin shete aña casá. E di: “Mi a purba asina tantu biaha, i semper e tabata decepcioná mi. Mi a haña asta un depresion. Mi no kier pasa den e cos ei mas. Si mi cuminsá carga speransa, e único cos cu lo pasa ta cu lo mi keda di hùrt. Ta mihó mi no verwagt nada; lo mi no tin masha goso, pero a lo ménos lo mi no bira deprimí.”

Desilusion, incompatibilidad, conflicto i apatia ta djis algun factor cu por contribuí na un matrimonio sin amor. Obviamente tin mas factor, i e cuadro na página 5 ta mencioná un par di nan. Sin importá e causa, tin speransa pa casánan cu ta parce di ta atrapá den un matrimonio sin amor?

[Kuadro/Plachi na página 5]

ALGUN OTRO FACTOR CU TA HIBA NA MATRIMONIONAN SIN AMOR

• Placa: “Un hende kisas lo a pensa cu traha un presupuesto lo a yuda uni un pareha dor cu ta necesario pa nan cooperá, combiná nan recursonan pa e cosnan básico di bida, i disfrutá dje fruta di nan labor. Pero aki tambe, loke lo por uni un pareha den un ‘joint venture,’ hopi bes ta contribuí na separá nan.” —Dr. Aaron T. Beck.

• Bira Mayor: “Nos a descubrí cu contentamentu matrimonial ta baha drásticamente cerca 67 porciento di pareha despues cu nan promé yu nace, i nan tin ocho biaha mas tantu conflicto. Esaki ta debí en parti pasobra mayornan ta cansá i no tin hopi tempu pa nan mes.”—Dr. John Gottman.

• Engaño: “Infidelidad por lo general ta enbolbé ­engaño, i engaño ta básicamente un traicion di confiansa. Siendo cu a identificá confiansa como e componente crucial den tur matrimonio exitoso di término largu, ta straño anto cu engaño por destrosá un relacion matrimonial?”—Dr. Nina S. Fields.

• Sex: “Pa ora hende a yena papel pa divorcio, ta spantosamente comun cu nan tin hopi aña sin haci sex. Den algun caso nunca nan no a establecé un relacion sexual, i den otro casonan, sex tabata algu mecánico, djis un manera pa satisfacé un partner su necesidad físico.”—Judith S. Waller­stein, sicólogo clínico.

[Kuadro/Plachi na página 6]

CON YUNAN TA SER AFECTÁ?

E calidad di bo matrimonio por afectá bo yunan? Segun dr. John Gottman, cu a investigá parehanan casá pa un 20 aña, e contesta ta sí. Gottman ta bisa: “Den dos investigacion di 10 aña, nos a descubrí cu curason di babynan cu tin mayornan infelis ta bati mas duru ora ta hunga cu nan i nan no por calma nan mes dje bon ei. Cu transcurso di tempu, conflicto matrimonial ta hiba na puntonan abou na scol, sin importá e grado di inteligencia dje yunan.” Segun dr. Gottman, na contraste, yunan di parehanan casá bon balansá, “ta bai mas mihó ­tantu na scol como socialmente, pasobra nan mayornan a mustra nan con pa trata otro hende cu respet i manehá problemanan emocional.”