E Promé Tabata Shen Aña Pasá

Dia 15 di december 1884, a registrá oficialmente e statutonan legal di Watch Tower Bible and Tract Society na Pennsylvania, Merca. * Einan a establecé e sede dje sociedad aki. Mas despues, dia 23 di april 1900, nan a obtené propiedad pa e promé oficina di sucursal na Londen, Inglatera. E tabata situá na 131 Gipsy Lane, Forest Gate, Oost Londen, manera por mira aki.

SHEN aña pasá, ora cu a establecé e promé sucursal ei, Inglatera tabatin un total di 138 Studiante di Bijbel, manera Testigonan di Jehova tabata conocí e tempu ei. Dos aña despues, na 1902, a habri un di dos sucursal, na Alemania; i pa 1904 a establecé mas sucursal na Australia i Suisa.

Na 1918, e aña cu Promé Guera Mundial a terminá, tabatin 3.868 Studiante di Bijbel ta raportá actividad di predicá rond mundu. E siguiente aña a establecé e di cincu sucursal di Sociedad Watch Tower, e biaha aki na Cánada. Anto, segun cu proclamacion dje mensahe bíblico a acelerá, a habri sucursalnan nobo den hopi pais, i na 1921 so a habri seis.

Pa 1931, ora cu e Studiantenan di Bijbel a adoptá e nomber basá riba Bijbel, Testigonan di Jehova, tabatin 40 sucursal rond mundu. (Isaías 43:10-12) Durante e siguiente tres añanan, e cantidad a subi te 49! Pa 1938 tabatin un máximo di 59.047 Testigo ta predicá den 52 pais, pero p’e tempu ei oposicion feros a cuminsá menasá nan actividad cristian den hopi lugá.

Segun cu totalitarismo i dictadura a plama di un pais pa otro i Segundo Guera Mundial a estayá na september 1939, oficinanan di sucursal di Testigonan di Jehova tabata cera den un pais tras di otro. Pa 1942, solamente 25 tabata funcioná ainda. Sin embargo, ta remarcabel cu durante e guera mas devastador ei di historia humano, Testigonan di Jehova a keda activo mundialmente i a disfrutá di un di nan mayor porcentahenan di aumento den historia moderno.

Pareu cu Segundo Guera Mundial tabata yegando su fin na 1945—i hopi parti di mundu tabata tur ruiná—oficinanan di  sucursal dje Testigonan a bolbe habri i a establecé sucursalnan nobo. Pa 1946 tabatin 57 rond mundu. I cuantu Testigo activo tabatin? Un máximo di 176.456! Esei ta casi tres biaha mas tantu cu na 1938!

Con e Promé Sucursalnan A Expandé

Na 1911 e promé sucursal di Sociedad Watch Tower, na Londen, Inglatera, a muda pa 34 Craven Terrace, caminda tabatin mas lugá pa oficina i residencia. Anto dia 26 di april 1959, nan a dedicá un edificio di sucursal nobo na Mill Hill, Londen. Mas despues nan a haci e parti di residencia mas grandi, i cu tempu (na 1993) nan a dedicá djis eibanda un drukkerij i compleho administrativo di 18.500 meter cuadrá. Aki ta producí pa aña mas cu 90 miyon ehemplar di E Toren di Vigilancia i Spierta! na 23 idioma.

E expansion di Sociedad su di dos sucursal tabata asta mas dramático. Na 1923 e sucursal di Alemania a muda pa Magdeburg. E Toren di Vigilancia di 15 di juli 1923, tabata e promé revista cu a sali for dje propio mashin di druk di Sociedad einan. Durante e siguiente par di añanan, nan a cumpra propiedad djis pegá, a agregá mas edificio i a obtené ekipo pa encuaderná buki i mas mashin di druk. Na 1933 nazinan a confiscá e sucursal, nan a prohibí e Testigonan i, cu tempu, a manda dos mil di nan camponan di concentracion.

Ora Segundo Guera Mundial a terminá na 1945, nan a debolbé e propiedad na Magdeburg, e tempu ei parti di Oost Alemania, i e Testigonan a reestablecé e sucursal. Pero dia 30 di augustus 1950, polis comunista a invadí e sitio i a arestá e trahadónan, i e Testigonan na Oost Alemania a ser prohibí. Miéntras tantu, na 1947 nan a cumpra propiedad na Wiesbaden, West Alemania. Durante e décadanan cu a sigui, bes tras bes nan a keda expandé e edificionan di sucursal cu nan a construí einan pa por a cumpli cu e demandanan di literatura.

Debí cu no tabatin mas lugá pa expandé na Wiesbaden, nan a cumpra un tereno di  30 hectar pegá cu Selters na 1979. Despues di mas o ménos cincu aña di construccion, nan a dedicá un sucursal grandi dia 21 di april 1984. Mester a expand’é despues, di manera cu awor e por acomodá mas cu mil trahadó di sucursal. Tur luna mas cu 16 miyon revista den mas cu 30 idioma ta sali for dje inmenso mashinnan di druk offset na Selters; i den un aña recien, e departamento di encuaderná a producí mas cu 18 miyon buki, incluso Bijbel.

Otro Sucursalnan Grandi Cu Tin Drukkerij

Na 1927 a establecé pa promé bes un sucursal na Kobe, Hapon, pero persecucion severo dje Testigonan durante Segundo Guera Mundial, a limitá nan actividad. Sin embargo, djis despues di guera nan a bolbe establecé e sucursal, pero na Tokio. Ora no tabatin mas lugá pa expandé einan, nan a construí un sucursal nobo na Numazu. E tabata dedicá na 1973. Ora cu rápidamente e lugá aki a bira muchu chikitu, nan a traha unu grandi na Ebina, i a dedicá esaki na 1982. Recientemente a completá expansion na e sitio aki, cu awor por acomodá 900 trahadó. Na e idioma hapones so nan a druk mas cu 94 miyon ehemplar di E Toren di Vigilancia i Spierta! na 1999, i tambe miyones di buki.

E expansion di lugánan di sucursal tabata mescos den pais tras di pais. Na 1929, a establecé un sucursal na Ciudad di México, México. Anto ora e cantidad di Testigo a yega 60.000, nan a construí un lugá nobo espacioso pafó di stad. A dedik’é na 1974, i na 1985 i 1989 a completá e partinan cu a agregá na dje. Awor akí nan ta cerca di terminá un lugá nobo grandi pa drukkerij i mas residencia. Como resultado, pronto e sucursal di México lo por acomodá 1.200 trahadó. Ya caba e sucursal ta percurá revista cu buki pa mas cu 500.000 Testigo i miyones di otro hende na México i tambe pa hende den paisnan bisiña.

Na 1923 a establecé un oficina di sucursal na Rio de Janeiro, Brazil, i despues a construí un bunita lugá einan. Pero como cu São Paulo ta e centro comercial i di transporte di Brazil, nan a construí un sucursal nobo den e stad ei na 1968. Pa meimei di añanan ’70, tabatin rond di 100.000 Testigo na Brazil. Sin embargo, no tabatin mas lugá pa expandé na São Paulo, p’esei a cumpra un sitio di 115 hectar na Cesário Lange, mas o ménos 150 kilometer pafó di São Paulo. Dia 21 di mart 1981, a dedicá e edificionan di sucursal na e sitio nobo. Como cu a expandé e lugá aki, e sucursal por acomodá un 1.200 hende. Na Brazil ta producí revista cu buki pa gran parti di Sur América i tambe pa otro partinan di mundu.

Un otro sucursal grandi cu drukkerij a keda completá na principio di añanan ’90 cerca di Bogotá, Colombia. Einan ta producí E Toren di Vigilancia i Spierta! pa distribuí den henter e área nortwest di Sur América.

Otro sucursalnan cu ta imprimí miyones di revista anualmente ta situá na Argentina, Australia, Cánada, Filipínas, Finlandia, Italia, Korea, Nigeria, Spaña i Sur África. Tur aña e sucursal na Italia tambe ta producí miyones di buki, incluso Bijbel, den hopi idioma. Claro cu gran parti dje produccion anual, cu ta suma na mas cu 40 miyon buki i mas cu un mil miyon revista, ainda ta tuma lugá na e sede di Watch Tower Bible and Tract Society na Brooklyn, New York, i tambe na su drukkerij den nort di estado di New York.

Di berdad, ta remarcabel cu e cantidad di oficinanan di sucursal a aumentá for di unu, shen aña pasá, te na 109 awe cu ta sirbi e necesidadnan di Testigonan di Jehova den 234 pais. I djis pensa cu na e sucursalnan aki ta traha un 13.000 cristian dedicá como trahadó boluntario! Ta sigur cu nan trabou huntu cu e trabou di un 5.500 boluntario cu ta traha na e sede di Sociedad tabata vital pa cumpli cu e profecia di Jesucristo cu ‘e bon nobo aki dje Reino di Dios lo a ser predicá den tur e tera habitá promé cu e fin yega.’—Mateo 24:14.

[Nota]

[Plachi na página 17]

Tom Hart, aparentemente e promé Studiante di Bijbel na Inglatera

[Plachi na página 18]

Sucursal di Londen na 34 Craven Terrace (riba potret na man drechi)

[Plachi na página 18]

Sucursal actual di Londen