Lesnan Cu Hende A Siña For dje Relato di Loida

E ARTÍCULO “Loida Su Salida for di Silencio” (8 di mei 2000) a ocasioná masha hopi reaccion for di nos lectornan. Hopi curason a keda profundamente conmoví cu e historia di bida real aki di un mucha muher cu ta sufri di parálisis celebral i cu no por a comunicá sino te ora e tabatin 18 aña. Aki ta sigui un par dje comentarionan cu nos a ricibí.

“Mi no por a stop di yora ora mi a lesa e mensahenan di Loida pa su famia ora cu por fin e por a comunicá. Su curashi i fortalesa apesar di su circunstancia difícil, ta cosnan cu ami ta bai haci esfuerso pa imitá.”—K. G.

“Mi salú ta excelente, pero tog tin biaha mi ta ripará cu mi ta keha tocante vários cos. Despues di a lesa tocante Loida, mi a haci oracion na Jehova, pidiend’e despensa cu mi no ta apreciá loke mi tin.”—R. H.

“Na 1980 mi ruman homber chikitu a nace cu un cantidad di problema di salú, entre nan parálisis celebral, i e no por papia. E experencia aki a animá mi famia pa nunca entregá, sin importá con difícil e situacion por ta.”—L. W.

“Mi ta un mucha muher di 14 aña, i semper mi a pensa cu ta mi ta e único hende cu problema. Lo mi tin gana di mira Loida salú i papia cuné den Paradijs. E ta un dje hendenan riba mi lista pa topa i pa ta amiga cuné pa semper.”—R. K.

“E artículo aki a conmové mi curason. Ami a haña mi ta soportá tur clase di malesa mental i emocional. Ora mi a lesa cuantu Loida ta anticipá Dios su mundu nobo, esei a aumentá mi deseo mas tantu ainda pa ta einan.”—P. B.

“Mi tambe tin parálisis celebral, pero mi no tin problema pa papia. E artículo aki a mustra mi cu Jehova ta mira tur loke nos ta experenciá i ta apreciá cada un di nos pa loke nos individualmente por contribuí cuné ora di sirbié.”—D. J.

“Loke mas a conmové mi ta ora mi a lesa con Loida a dedicá su bida na Jehova na un edad yong i tambe con e ta participá den e trabou di predicá. Nos cu ta físicamente mas salú, den hopi manera por siña un les for di Loida.”—A. R.

“E experencia di Loida a pone mi haci esfuerso pa pensa mas riba otro hende i kico mi por haci pa nan. Mi ta nenga di considerá mi privilegio di por papia cu otro hende tocante Jehova Dios, como algu insignificante.”—B. M.

“Esta un artículo excepcional! Nos conocé un pareha den un congregacion bisiña cu tin un yu muher cu parálisis celebral. Awe mes mi ta bai manda un karchi pa nan pa laga nan sa cu di berdad mi ta apreciá nan i tur loke nan ta haci pa nan yu.”—T. G.

“Ora mi ta sinti mi deprimí, tin biaha mi ta bira egoista, pero Loida ta mustra interes special den otro hende. Esei ta loke mi ta purba duru pa haci. Tambe mi tin cu purba mas duru pa ta manera Loida i haci oracion na Jehova ora mi ta sinti mi cargá.”—N. D.

“Mi tin 14 aña, i mi ta sufri di asma. Tin biaha mi ta pensa cu mi malesa ta esun di mas pió cu tin, pero ora mi a lesa e experencia aki, mi a haña sa cu no ta asina. Danki pa e experencia aki cu ta tristu pero na mésun tempu felis i cu ta duna nos speransa.”—M. C.