Mi A Ricibí un Speransa Cu Ta Sostené Mi

SEGUN E RELATO DI TATJANA VILEYSKA

Nos famia felis a ser destruí ora cu un hende a bati Mama mata den nos flet. Cuater luna despues, Tata a cometé suicidio. Despues di esei mi no kier a biba mas. Pues con bini mi ta na bida ainda pa conta e historia? Laga mi splica.

DONETSK, den parti oost di Ucrania, ta un stad di industria di metal i minanan di carbon. E poblacion di mas cu un miyon hende ta papia ruso i ta hendenan trahadó i amigabel. Tin di nan ta kere den astrologia of spiritismo, i hopi ta usa horoscop pa sa tocante futuro. Otronan ta acudí na hacidónan di bruha, cu na ruso ta conocí como koldun. Tin dje hendenan aki ta busca contacto cu e mortonan den speransa di haña alivio for di malesa of djis pa pret.

Tata tabata un sapaté. Aunke supuestamente e tabata ateo, el a pensa cu un persona a pone nos riba tera. E sa bisa: “Nos ta solamente huésped riba e planeta aki.” Mama a bai misa tur Pascu di Resureccion pasobra, manera e sa bisa: “Si tin un Dios, si e ta existí, e ora ei nos tin cu bai.” Mi a nace na mei 1963. Mi ruman muher mayó, Lubov, i mi ruman homber chikitu, Alexandr, a completá nos famia felis.

“Magia Blanca Ta Bon”

Trahando den un mina di carbon, Pjotr, * un famia djaleu, a haña un accidente i a sufri lesion na su cabes cu a rekerí tratamentu den un clínica special. Preocupá pa su salú, el a consultá un koldun. E hacidó di bruha a pone Pjotr den contacto cu mundu di spiritu. Aunke su esposa i mi mayornan a bis’é cu bruheria ta co’i kens, el a pensa cu e tabata sa mihó. El a enfatisá: “Loke mi ta practicá ta magia blanca. Magia negra ta malbado, pero magia blanca ta bon.”

Pjotr a pretendé cu e tabatin podernan cu a capacit’é pa pronosticá futuro i protehá hende di daño. No obstante, Pjotr su esposa a bai lagu’é. Pues, Pjotr sa bin keda cerca nos, tin biaha pa simannan largu. Su influencia riba nos famia tabata teribel. En todo caso, Mama cu Tata a cuminsá pleita pisá. Cu tempu, nan a separá i divorciá. Nos,  e yunan, a muda pa un otro flet cu Mama, i Pjotr—Mama su famia carnal—a muda huntu cu nos.

Lubov a casa i a muda bai Uganda, África, cu su casá. Na october 1984, Alexandr a bai vakansi i ami a biaha bai e stad Gorlovka pa un siman. Ora mi tabata sali cas, ami cu Mama a djis yama otro ayó sin masha cos. Cuantu mi ta deseá di a bis’é mas cos of di a keda cas mes! Pasobra nunca mas mi no a mira Mama na bida atrobe.

“Bo Mama Stimá Ta Morto”

Ora mi a regresá di Gorlovka, e flet tabata na lok, i tabatin un aviso di polis pegá na porta cu a prohibí pa drenta. Un ril a pasa den mi lomba. Mi a bai cerca nos bisiñanan. Olga tabata demasiado perturbá pa papia. Su casá Vladimir a bisa bondadosamente: “Tanja, algu horibel a sosodé. Bo mama stimá ta morto. Pjotr a mat’é. Despues, el a bini na nos flet, bel polis i a entregá su mes.”

Polis a confirmá e noticia teribel i a duna mi e yabinan di nos flet. Mi a haña un odio contra Pjotr. Den mi rabia mi a pasa man coge mayoria di su pertenencianan—incluso su bukinan tocante magia—benta nan den un klechi, i hiba nan na un veld pegá eibanda, caminda mi a kima nan.

Alexandr a tende e noticia, i tabatin mésun odio cu mi pa Pjotr. Despues Alexandr mester a drenta servicio militar i a muda bai. Tata a bin biba den e flet cerca mi, i Lubov a bini di Uganda i a keda cu nos pa un tempu corticu. Tin biaha, nos tabatin motibu pa kere cu forsanan spiritual malbado tabata molestiá nos. Ademas, Tata tabata haña nachtmerrie. E tabata sinti su mes culpabel p’e morto di Mama. “Si mi a djis keda cerca dje, awe lo e tabata na bida ainda,” e tabata bisa. No a tarda hopi cu Tata a cai den un depresion pisá. Denter di cuater luna despues cu Mama a muri, el a cometé suicidio.

Despues di Tata su entiero, Alexandr a bai bek den servicio militar i Lubov a bai Uganda. Mi a purba cuminsá un bida nobo dor di studia na e Instituto di Ingenieria di Construccion di Makeyevka, cu tabata mei ora so for di cas. Mi a decorá i muebla e flet di nobo, cu speransa di eliminá algun recuerdo. Pero ainda tabatin motibu pa sospechá cu demoño tabata causa molester.

“O Dios, si Realmente Bo Ta Existí”

Alexandr a completá su servicio militar i a bin biba bek na cas. Pero ami cuné a cuminsá ta pleita. El a casa, i pa algun luna mi a bai biba na Rostov, un stad ruso na costa di laman Azov, un 170 kilometer for di nos cas. Cu tempu mi a dicidí di deshací di delaster un cos cu a pertenecé na Pjotr.

Mi mes a bira asina deprimí cu mi tambe a planea pa cometé suicidio. Pero e palabranan di Mama a keda zona den mi orea: “Si tin un Dios, si e ta existí.” Un anochi, mi a haci oracion pa promé biaha. Mi a roga: “O Dios, si realmente bo ta existí, por fabor, mustra mi e propósito di bida.” Un par di dia despues, mi a haña un carta di Lubov cu tabata invitá mi pa bin bishit’é na Uganda. Pues mi a posponé mi plannan di mata mi mes.

Sorpresanan na Uganda

Tin poco lugá na mundu asina distinto for di otro manera Ucrania i Uganda. Mi avion a baha na Entebbe na mart 1989. Ora cu mi a sali for dje avion, mi a drenta den un fornu. Nunca mi no a conocé un weer asina un cayente! Esaki no ta un sorpresa, ya cu esaki tabata mi promé biahe pafó di Union Soviético. Hende tabata papia ingles, un idioma cu mi no tabata comprendé.

Mi a coge un taxi pa un biahe di 45 minuut bai Kampala. E paisahe tabata asina distinto for di loke mi a custumbrá cuné cu casi a parce como si fuera mi tabata riba un otro planeta! Pero mi shofer di taxi sonriente tabata masha bondadoso, i finalmente el a localisá e cas di Lubov i su casá, Joseph. Esta un alivio!

 Lubov tabata studiando Bijbel cu Testigonan di Jehova. Nunca mi no a tende di nan, pero Lubov tabata ansioso pa conta mi. E tabata cana mi tras den cas contando mi tur cos cu el a siña, cuminsando for di Génesis te cu Revelacion. Kere mi, esei tabata iritante!

Riba un dia e Testigonan cu tabata studia cu Lubov a bin di bishita. Un di nan tabata yama Marianne. E no a purba predicá mi mesora, ya cu e tempu ei di tur manera mi no tabata comprendé masha ingles. Pero su wowonan caluroso i amigabel a bisa mi cu e tabata un persona sincero i felis. El a mustra mi un plachi di Paradijs den e foyeto “Mira! mi ta traha tur cos nobo.” “Wak e muher aki,” el a urgi mi. “Esaki ta bo, i e otro muher aki ta mi. Nos ta huntu den Paradijs huntu cu tur e otro hendenan aki. Esei no ta maraviyoso?”

A parce manera cu e otro Testigonan na Kampala tabata bishitá Lubov i Joseph beurt pa beurt. Nan tabata asina amigabel cu mi tabata sospechá cu nan tabata djis purba impresioná mi. Un par di siman despues, mi a asistí na mi promé reunion, cu tabata e celebracion dje Cena di Señor. (Lucas 22:19) Aunke mi no a comprendé loke nan a bisa, atrobe mi a keda impresioná dje manera asina amigabel cu nan tabata.

‘Les’é di Kaft pa Kaft’

Marianne a duna mi un Bijbel ruso, e promé cu hamas mi tabatin. El a roga mi: “Lesa e Bijbel di kaft pa kaft. Maske bo no ta comprendé tur cos, djis les’é!”

Mi a keda profundamente conmoví cu e regalo di Marianne, i mi a dicidí di sigui su conseho. Mi a pensa: ‘Al fin i al cabo, ki bal bo tin un Bijbel i bo no ta wori les’é?’

Ora mi a bai Ucrania bek, mi a bai cu mi Bijbel. Pa e siguiente par di lunanan, mi a traha na Moscú, Rusia, i a usa mi tempu liber pa cuminsá lesa e Bijbel completo. Pa ora mi a bolbe bek Uganda nuebe luna despues, mi a lesa mitar dje Bijbel. Ora mi a regresá Kampala, Marianne a mustra for di Bijbel un maraviyoso speransa pa futuro. Un paradijs! Un resureccion! Mira Mama cu Tata atrobe! Mi a realisá cu loke mi tabata siñando tabata e contesta riba mi oracion tempu mi tabata na Donetsk.—Echonan 24:15; Revelacion 21:3-5.

Ora nos a studia e tema di mal spiritu, mi a scucha ansiosamente. Bijbel a confirmá loke mi a sospechá pa hopi tempu. No ta existí magia bon of inofensivo. Tur ta yen di peliger. Mi no tabatin mester di niun prueba mas grandi cu loke a pasa den nos propio famia. Ora mi a kima Pjotr su pertenencianan, sin sa mi a haci e cos corecto. Cristiannan di promé tambe a kima nan artículonan di magia ora nan a cuminsá sirbi Jehova.—Deuteronomio 18:9-12; Echonan 19:19.

Mas mi a comprendé Bijbel, mas sigur mi a bira cu mi a haña e berdad. Mi a stop di huma, i na december 1990, mi a bautisá como símbolo di mi dedicacion na Jehova. Lubov a bautisá solamente tres luna promé cu mi; i Joseph, na 1993.

Bek na Donetsk

Na 1991, mi a regresá Donetsk. E mésun aña ei Testigonan di Jehova na Ucrania a ricibí reconocimentu legal, loke a nificá cu nos por a reuní libremente i predicá abiertamente. Nos a cuminsá combersacionnan riba caya cu ken cu tabatin poco tempu. Den corto tempu nos a descubrí cu asta den un pais caminda hopi hende tabata bisa cu nan ta ateo, hopi tabata curioso pa sa tocante e Reino di Dios.

Na principio di añanan ’90, tabatin scarcedad di literatura bíblico, pues nos tabatin un biblioteca den cayanan di Donetsk caminda hende por a fia buki. Nos a pone un stènd riba e plenchi principal dje stad pa exhibí ehemplarnan di nos buki i foyetonan. No a tarda hopi cu hende amigabel i curioso tabata  para pa haci nos pregunta. Esnan cu tabata kier literatura a fi’é, i nos a ofrecé nan un studio di Bijbel na cas.

Na 1992, mi a bira pionero, un minister di tempu completo di Testigonan di Jehova, i na september 1993, mi a haña invitacion pa djoin un tim di traductor na e oficina di Sociedad Watch Tower na Selters, Alemania. Na september 1998 nos a ser transferí pa Polonia, wardando pa nan caba di construí nos sucursal nobo na Lviv, Ucrania.

E crecementu den e pueblo di Jehova na Ucrania tabata sorprendente. Miéntras cu na 1991 Donetsk tabatin un solo congregacion cu 110 Testigo, awor e tin 24 congregacion cu mas di 3.000 Testigo! Durante un bishita na Donetsk na 1997 mi tabatin no solamente encuentronan agradabel, sino tambe un episodio cu a angustiá mi.

“Pjotr Ta Busca Bo”

Durante mi estadia na Donetsk, Juliya, un Testigo cu tabata conocé nos famia, a shok mi ora el a bisa mi: “Pjotr ta busca bo. E kier papia cu bo.”

E anochi ei na cas mi a yora i haci oracion na Jehova. Kico Pjotr tabata kier di mi? Mi tabata sa cu el a sinta vários aña den prizon pa su crímen. Mi tabata odi’é pa loke el a haci, i mi a sinti cu e no a merecé di siña tocante Jehova su mundu nobo. Pa vários dia mi a haci oracion tocante e asuntu, anto mi a realisá cu no tabata keda na ami pa dicidí ken ta merecé di ricibí bida eterno. Mi a corda riba e promesa cu Jesucristo a haci na e criminal cologá na staca banda di dje: e criminal ei lo ta cuné den Paradijs.—Lucas 23:42, 43.

Cu esaki na mente, mi a dicidí di bishitá Pjotr i dun’é un testimonio tocante e Reino Mesiánico i Dios su sistema nobo di cosnan. Compañá pa dos ruman homber cristian, mi a bai na e adres cu Juliya a duna mi. Ei, pa promé bes for di dia di Mama su morto, mi a topa Pjotr cara-cara.

E ambiente tabata tenso. Mi a splica Pjotr cu mi a bira un Testigo di Jehova i cu Bijbel a yuda mi comprendé di con den e sistema aki nos tur tin cu experenciá problema,  tin biaha asta tragedia personal. Tambe mi a bisa Pjotr con teribel tabata pa nos perde nos mama i despues nos tata.

Pjotr a splica cu ta un stem a bis’é mata mi mama, anto el a bai describí en detaye loke a sosodé riba e dia ei. Segun cu mi tabata scucha su relato horibel, mi repugnancia a mescla cu duele, pasobra e tabata parce nervioso, manera un animal cu nan ta yag riba dje. Una bes Pjotr a caba di papia, mi a purba mustr’é algun dje promesanan maraviyoso den Bijbel. El a pretendé di ta kere den Jesus, p’esei mi a puntr’é:

“Bo tin un Bijbel?”

“Ainda no. Pero mi a bestèl unu,” el a contestá.

“Podisé bo sa caba cu segun Bijbel, e nomber personal dje Dios berdadero ta Jehova.”—Salmo 83:18.

Ora Pjotr a tende e nomber Jehova, el a bira agitá. E di: “No mencioná mi e nomber ei. Mi no por wanta e nomber ei.” Nos no a logra absolutamente nada den nos intento di conta Pjotr tocante e maraviyoso promesanan di Dios.

Mi a bai lagu’é cu un pensamentu bon cla den mi mente: Si mi no a siña conocé Jehova, kisas lo mi a ser asesiná mescos cu Mama, kisas lo mi a cometé suicidio mescos cu Tata, of kisas lo mi a ser manipulá pa haci cosnan horibel mescos cu a pasa cu Pjotr. Esta gradicidu mi ta cu mi a siña conocé e Dios berdadero, Jehova!

Wak Dilanti na Futuro, No Atras den Pasado

E experencianan spantoso aki a laga nan marca riba mi emocionnan. Te ainda e recuerdonan tin biaha ta causa mi dolor i angustia. Pero ora mi a siña conocé Jehova i su propósitonan, e proceso di cura a cuminsá. Berdad bíblico a siña mi enfocá, no riba pasado, sino riba futuro. I esta un futuro Jehova tin wardá pa su sirbidónan!

E futuro ei ta incluí resureccion dje mortonan den un paradijs terenal. Ki un goso lo mi sinti ora mi yama mi mayornan bon biní bek na bida! De echo, Tata tabatin rason ora e tabata bisa: “Nos ta solamente huésped riba e planeta aki.” I Mama su inclinacion pa kere cu Dios realmente ta existí sigur tabata corecto. Mi mas profundo anhelo ta di por siña Mama cu Tata berdadnan bíblico ora nan resucitá den Dios su sistema nobo di cosnan.

[Nota]

[Komentario na página 24]

Pa promé bes for di dia di Mama su morto, mi a topa cara-cara cu su asesino

[Plachi na página 23]

Marianne cu Heinz Wertholz, misioneronan cu a studia cu mi na Uganda, ta brasa mi

[Plachi na página 23]

Mi bautismo na Kampala

[Plachi na página 24]

Trahando na Polonia como parti dje tim di traduccion ucraniano