E Punto di Bista Bíblico

Ta Importá Ki Tratamentu Médico Bo Ta Scoge?

ENFERMEDAD, malesa i lesion ta masha comun pa humanidad. Hopi hende, ora nan haña nan confrontá cu e enemigunan aki di bienestar, ta busca alivio via tratamentu médico. Jesucristo a reconocé e posibel beneficio di tal intento, dor di admití cu “esnan cu ta salú no tin mester di dokter, pero esnan cu ta malu sí.”—Lucas 5:31.

Lucas, e escritor bíblico cu a skirbi e palabranan ei, mes tabata dokter. (Colosensenan 4:14) Podisé apostel Pablo a beneficiá di Lucas su experencia médico tempu cu nan a biaha huntu. Pero e Scritura ta percurá principionan cu por guia nos relacioná cu ki tipo di cuido médico ta aceptabel pa cristiannan? Ta importá ki tratamentu médico bo ta scoge?

Principionan Bíblico Cu Por Guia Nos

Bijbel por guia un persona pa tuma decisionnan sabí relacioná cu tratamentu médico. Por ehempel, Deuteronomio 18:10-12 ta mustra bon cla cu prácticanan manera wakmentu di destino i magia ta “detestabel” pa Jehova. E “práctica di spiritismo” cu Pablo a spierta contra dje, lo a incluí e actonan prohibí aki. (Galationan 5:19-21) Pues, cristiannan berdadero ta evitá cualkier procedura di diagnosticá of di terapia cu claramente tin di haber cu spiritismo.

Tambe Bijbel ta revelá e balor haltu cu e Creador ta duna na e santidad di bida i sanger. (Génesis 9:3, 4) Decididu pa obedecé e ordu pa ‘sigui abstené di sanger,’ Testigonan di Jehova ta rechasá proceduranan médico cu ta violá Bijbel su mandamentu pa abstené di sanger. (Echonan 15:28, 29) Esaki no kier men cu nan ta rechasá tur tratamentu médico. Mas bien, nan ta busca e mihó cuido médico posibel pa nan mes i pa nan yunan. Pero nan ta apelá na profesionalnan den e ramo di cuido  médico pa duna nan tratamentu cu ta na armonia cu nan conviccionnan religioso.

Considerá Bo Pasonan

Rey Sálomon a spierta cu “cualkier persona sin experencia ta pone fe den tur palabra, pero esun spiertu ta considerá su pasonan.” (Proverbionan 14:15) Asta ora un decision médico no ta na conflicto directo cu principionan bíblico, tog un persona mester “considerá su pasonan.” No ta tur forma di tratamentu médico ta útil. Ora Jesus a bisa cu ta ‘esnan cu ta malu tin mester di dokter,’ no ta duna el a duna su aprobacion na tur tratamentu médico cu tabata disponibel den su tempu. E tabata sa cu algun forma di tratamentu médico tabatin bon base i otronan tabata basá riba ideanan eróneo. *

Mescos awe, tin tratamentu cu tal bes no ta sirbi pa nada, i ta asta fraudulento. Falta di bon huicio lo por exponé un persona na riesgonan innecesario. Tambe mester reconocé cu un tratamentu cu ta útil pa un persona lo por ta ineficas—asta perhudicial—pa un otro persona. Ora un persona prudente hañ’é confrontá cu un decision médico, lo e evaluá su opcionnan cuidadosamente, en bes di djis ‘pone fe den tur palabra,’ asta si e conseho ta bini di amigunan cu bon intencion. Lo e desplegá “sano huicio” dor di busca informacion confiabel pa asina e por ta den e posicion pa tuma un decision informá.—Tito 2:12.

Sea Realístico i Razonabel

Ta na su lugá cu un hende ta preocupá cu su estado di salú. Ora un persona ta duna atencion balansá na su bienestar físico, e ta demostrá aprecio pa e don di bida i pa e Fuente divino di bida. (Salmo 36:9) Aunke cristiannan ta busca pa haña tratamentu médico apropiado, nan lo kier ta balansá den asuntunan di salú. Por ehempel, si un persona razonablemente salú bira obsesivamente preocupá cu salú i bon condicion di curpa, esaki lo por pon’é perde for di bista “e cosnan mas importante.”—Filipensenan 1:10; 2:3, 4.

Un muher desesperadamente malu den tempu di Jesus “a gasta tur su recurso” buscando yudansa di dokter pa trata su malesa crónico. Kico tabata e resultado? En bes di cura, su condicion a bira pió, loke lo mester a frustr’é mashá. (Marco 5:25, 26) El a haci tur loke tabata na su alcanse pa haña alivio, pero nada no a funcioná. Su experencia ta resaltá e límitenan cu ciencia médico tabatin den su tempu. Asta awe, apesar di avancenan den investigacion i tecnologia médico, hopi hende ta haña nan mes den un situacion similar. Pues ta importante pa nos tin un punto di bista realístico di loke ciencia médico por logra. Salú perfecto ta inalcansabel actualmente. Cristiannan ta reconocé cu Dios su tempu pa ‘cura e nacionnan’ ta den futuro ainda. (Revelacion 22:1, 2) P’esei, nos tin cu desaroyá un punto di bista balansá di tratamentu médico.—Filipensenan 4:5.

Ta bisto anto, cu loke nos ta scoge ta importá. P’e motibu ei, ora nos haña nos cu decisionnan relacioná cu tratamentu médico, loke nos scoge mester reflehá tantu nos deseo pa bon salú como nos deseo di mantené un relacion sano cu Dios. Ora nos ta haci esei, nos por sigui anticipá cu confiansa e cumplimentu di Jehova su promesa cu den e glorioso mundu nobo binidero, “ningun residente lo bisa: ‘Mi ta malu.’”—Isaías 33:24.

[Nota]

[Plachi na página 30]

“E Dokter,” 1891, pintá pa Sir Luke Fildes

[Rekonosementu]

Tate Gallery, London/Art Resource, NY