Tin Motibu pa Speransa?

“Un problema den matrimonionan cu dificultad, ta e pensamentu firme cu cos no por drecha. E pensamentu ei ta stroba cambio pasobra e ta horta bo dje motivacion pa purba cualkier cos constructivo.”—DR. AARON T. BECK.

IMAGINÁ cu bo tin dolor i ta bai dokter pa un chekeo. Bo ta nervioso, i ta di comprendé. Al fin i al cabo, kisas bo salú—sí, bo bida mes—por ta den wega. Pero suponé cu despues dje chekeo dokter ta duna bo e bon noticia cu aunke bo problema di ningun manera no ta algu insignificante, por trat’é. De echo, dokter ta bisa bo cu si bo tene bo cuidadosamente na un programa razonabel di dieta i ehercicio, bo por spera di recobrá completamente. Sin duda lo bo sinti bo sumamente aliviá, i gustosamente lo bo sigui su conseho!

Compará e senario aki cu e tema cu nos ta tratando. Bo ta sufriendo dolor den bo matrimonio? Claro cu tur matrimonio tin su parti di problema i desacuerdonan. Pues e solo echo cu tin algun momento difícil den bo relacion no ta nificá cu bo tin un matrimonio sin amor. Pero kico si e situacion doloroso ta persistí pa siman, luna of asta añanan largu? Si ta asina, bo tin motibu pa ta preocupá, pasobra esaki no ta un asuntu insignificante. Sí, e calidad di bo matrimonio por influenciá casi tur aspecto di bo bida, i asta bida di bo yunan. Por ehempel, expertonan ta kere cu angustia matrimonial por ta un factor principal den problemanan manera depresion, productividad abou na trabou, i muchanan cu ta bai malu na scol. Pero esei no ta tur. Cristiannan ta reconocé cu e relacion cu nan tin cu nan casá, por tin un efecto riba asta nan relacion cu Dios.—1 Pedro 3:7.

E echo cu tin problema entre abo cu bo casá no kier men cu e situacion ta iremediabel. Si un pareha reconocé e realidad di matrimonio—esta, cu lo tin dificultad—esei por yuda nan pone nan problemanan den perspectiva i traha pa solucioná nan. Un esposo yamá Isaac ta bisa: “Mi no tabatin idea cu tabata normal cu un pareha su nivel di felicidad ta subi i baha den transcurso di un matrimonio. Ami a pensa cu tabatin algu robes cu nos!”

Asta si bo matrimonio a deteriorá yega un condicion sin amor, por salb’é. Ta cierto sí cu e heridanan cu un relacion cu problema ta causa por ta hundu, foral si e problemanan a persistí pa añanan largu. Tog, tin motibu fuerte pa  speransa. Motivacion ta un factor crucial. Asta dos hende cu problema matrimonial serio por drecha nan relacion si nan tur dos ta haña esei suficiente importante. *

P’esei puntra bo mes: ‘Con fuerte mi deseo ta pa logra un relacion satisfactorio?’ Abo cu bo casá ta dispuesto pa haci esfuerso pa mehorá boso matrimonio? Dr. Beck, citá anteriormente, ta bisa: “Hopi bes mi a keda sorprendí pa mira con un relacion aparentemente malu, por ser yudá ora partnernan cooperá pa corigí e factornan negativo i reforsá e puntonan positivo di nan matrimonio.” Pero kico si bo casá no ta dispuesto pa cooperá? Of kico si ta parce cu e no sa mes cu tin un problema? Ta en bano pa abo so traha riba e matrimonio? Absolutamente cu no! Dr. Beck ta bisa: “Si abo haci algun cambio, esaki riba su mes por impulsá cambio den bo partner, i hopi bes esei ta sosodé.”

No core concluí cu esaki no por sosodé den bo caso. Tal moda di pensa negativo riba su mes ta e menasa mas grandi pa bo matrimonio! Un di boso tin cu dal e promé stap. Por ta abo? Una bes tin un empuhe, bo casá kisas ta mira e beneficio di traha huntu cu bo pa edificá un matrimonio mas felis.

P’esei, kico bo por haci—sea individualmente of como pareha—pa salba bo matrimonio? Bijbel ta un yudansa poderoso pa contestá e pregunta aki. Laga nos wak con.

[Nota]