Candela! Cua Aparato di Paga Candela Bo Mester Usa?

CUANTU biaha nos no ta cana pasa dilanti e bewaker chikitu i silencioso ei pegá na muraya, sin pensa mes riba dje! Sin embargo, un dia lo e por scapa nos oficina of fábrica of asta nos cas, di kima por completo. Aparatonan portátil pa paga candela por yuda prevení cu un problema chikitu ta sali for di man, manera por ehempel, un panchi cu a coge candela riba stoof of cortinanan cu a pega candela dor di un aparato di verwarming. Mescos cu armanan di reaccion rápido, nan ta diseñá pa para un enemigu cruel promé cu e coge forsa.

Dor cu e enemigu aki ta bini den hopi forma—candela di palu, candela di zeta i di gas, candela di coriente—aparatonan portátil pa paga candela tambe ta bini den hopi forma. Ta claro cu bo kier conocé tantu bo enemigu como bo arma. Esaki no kier men cu bo mester tin e perspicacia di un pagadó di candela profesional, pero e kier men sí cu bo mester ta na haltura di un par di principio básico. Por ehempel, kico abo lo a haci den e siguiente situacion?

Un panadero preparando pa traha pan, tabata keintando un reki cu 20 plancha nobo, bon zetá den un fornu. Sin embargo, e termostat no tabata traha bon i e temperatura a subi di mas, loke a pone e zeta huma. E panadero, cu handschoen na man, ta core habri e fornu i saca e reki afó. Pero dor di haci esei, el a duna e zeta cu tabata huma un bon baño di aire. Anto, woef! Di su so e zeta a pega candela (combustion spontáneo) i a manda vlam den plafon. Ileso, e panadero ta core bai i ta bini bek den un par di seconde cu un aparato di paga candela cu ta usa koolzuursneeuw (CO2) i rápidamente ta paga e candela. Pero mesora mas huma a forma, i e zeta ta bolbe pega candela. Cuater biaha e mésun cos a pasa! E panadero, teniendo miedu cu djis e aparato di paga candela lo bira bashí, a ranca un deken pa paga candela (blusdeken) cu tabatin eibanda for di su contenedor, i a bent’é riba e reki. Pa su alivio, esei a paga e candela, i a ten’é pagá.

 Claro cu nos kier usa e mihó arma cu nos tin na man pa paga un candela chikitu pero menasante. Pero si e panadero tabata sa tocante combustion spontáneo—loke tin hopi chens di tuma lugá ora tin huma—lo el a simplemente paga e fornu, tene e porta di fornu cerá i laga e contenido dje fornu fria di su mes. Of lo e por a usa e deken pa paga candela promé, anto si ta necesario, e aparato di paga candela cu ta usa koolzuursneeuw. Sea cual sea e caso, e experencia ei ta mustra e balor di tin un conocimentu básico di candela i con ta e mihó manera pa paga nan.

E “Triángulo” Cu Ta Nificá Candela

Loke nan ta yama e triángulo di candela (branddriehoek) ta un fórmula basá riba sentido comun cu ta describí e condicionnan pa un candela cende: combustibel plus oxígeno plus cayente ta forma candela. Si bo djis kita un dje componentenan, no solamente bo ta paga e candela sino tambe ta prevení mas candela. Laga nos wak con esaki ta funcioná.

COMBUSTIBEL: Mescos cu nos, candela ta muri si e no haña cuminda. Pagadónan di candela ta utilisá e principio aki den candelanan di mondi ora nan ta crea un canal pa kibra e caminda dje candela principal. Den cushina, eliminá combustibel por nificá djis paga e stoof. Sin embargo, den otro circunstancianan por ta difícil, asta imposibel pa eliminá e combustibel.

OXÍGENO: Un biaha mas, mescos cu nos, candela mester hala rosea. Tira un skop di tera of un deken pa paga candela riba un candela, i e ta stik paga. Por cierto, e nivel di oxígeno no tin cu baha te na sero pa un candela stik paga. Si bo reducí e nivel di oxígeno for di e nivel normal di 21 porciento (cu tin den aire rond di nos) na 15 porciento, hopi substancia—por ehempel, líkidonan flamabel i asta algun substancia sólido—lo stop di kima.

CAYENTE: E fuente di cayente pa cuminsá un candela por ta un aparato di verwarming, un stoof, waya di coriente cu ta bai pa un stopcontact sobrecargá, un chispa of pida carbon cayente, weerlicht, of asta cayente generá dor di vegetacion putrí, kímiconan instabil of un variedad di otro cos. Corda, si bo mira huma, foral si e ta bini for di vet of zeta dushi cu ta riba un cos cayente, denter di un par di seconde e por pega candela di su so.

Trahá Special pa Tur Clase di Candela Chikitu

Aunke hopi cas no tin aparato pa paga candela, ley ta exigí hopi bes pa fábrica, oficina i edificionan público sí ta ekipá cu nan. E tiponan básico ta aparatonan cu ta usa awa, kímico muhá, scuma, puiru secu i koolzuursneeuw. Gradualmente ta sacando aparatonan di paga candela cu ta usa halon for di circulacion, dor cu expertonan ta kere cu nan ta destruí e capa di ozon den e atmósfera di tera. Pa yuda usuarionan scoge e aparato corecto den un emergencia, mayoria model tin símbolo pintá riba nan cu ta indicá unda por i no por usa nan, of ta  indicá esei cu color. I mayoria tin un letter, manera A, B of C, cu ta indicá un clasificacion specífico di candela. Ora bo primi e man dje aparato, e agente propulsor (cu ta gas bou di preshon) ta forsa e ingrediente activo pa sali for di boca dje slang na un velocidad haltu. Dor cu aparatonan di paga candela ta contené gas bou di preshon, mester test nan tempu-tempu. I semper mester pega nan na muraya banda di salida i mester por tin acceso fácil na nan. Laga nos repasá awor brevemente cada tipo di aparato di paga candela.

Aparato di paga candela cu ta usa puiru secu ta stroba algu di kima usando kímico, i casi por yama nan e medio universal pa frena candela di plama. Puiru secu no solamente ta eficas contra tantu candela clase A como clase B, sino tambe e ta útil pa combatí candela clase C (di ekiponan eléctrico). Ta di comprendé cu e aparato aki di multi-uso ta ofrecé un excelente proteccion pa bo cas. Puiru secu sa susha hopi sí, pero cos sushi kisas ta nada na comparacion cu e daño di un candela descontrolá.

Aparato di paga candela cu ta usa awa bou di preshon ta ideal pa candela cu tin di haber cu papel, palu, plestik, basura of tela. Hopi bes ta yama esakinan candela clase A. Awa su potencial como un substancia pa paga candela ta bini dor di su gran capacidad pa absorbá cayente. Si tin suficiente awa, e ta simplemente eliminá e cayente mas lihé cu e candela por regener’é, i asina e candela ta paga. Pero no usa awa riba líkidonan flamabel. Simplemente bo ta plama e candela, anto rápidamente tambe! Tambe, como cu awa ta transportá electricidad, bo no mag us’é ni usa ningun aparato di paga candela cu tin awa aden, caminda tin wayanan eléctrico cu coriente.

Aparato di paga candela cu ta usa kímico muhá ta utilisá un mescla bou di preshon cu ta consistí di salunan alkalí den awa i ta eficas foral contra vet i zeta dushi, pero no contra productonan di petroli. Tambe nan ta eficas contra candela clase A.

Aparato di paga candela cu ta usa scuma (fomait) ta funcioná bon, no solamente contra candela clase A, sino tambe foral contra candela cu ta encerá líkidonan flamabel (zeta of grease industrial, fuel, verf), conocí generalmente como candela clase B. Tin dos sorto di aparato di paga candela cu ta usa scuma, pues chek cua ta mihó pa bo. Ora bo spuit e riba un líkido na candela, e scuma ta cubri e candela cu un capa impenetrabel cu ta desactivá e vapor flamabel i tambe ta kita e oxígeno. Pues, mester spuit e scuma di un manera mas suave pa e no penetrá e líkido, sino mas bien, pa e plama unbes riba dje. Tene cuidou pa no usa scuma banda di coriente.

Aparato di paga candela cu ta usa koolzuursneeuw por ser usá contra casi tur candela cu excepcion di candela di gas. Nan ta funcioná riba e principio di cu koolzuur ta tuma lugá di oxígeno. Pero manera nos a mira ariba den e caso dje panadero, si e combustibel keda cu su cayente, ta posibel p’e bolbe pega candela di su so. Koolzuur ta un gas, pues un área habrí i cu hopi bientu, ta limitá su efectividad. Sin embargo,  dor cu e no ta susha, e ta e aparato di paga candela preferí pa usa riba mashinnan delicado i ekipo electrónico. Pero den lugánan cerá, koolzuur por stik un hende, p’esei si bo ta us’é den un circunstancia asina, haci sigur di sali ora e candela paga i cera e porta bo tras.

E deken pa paga candela * ta un pagadó di candela útil i e ta ideal pa candelanan chikitu i limitá, manera esnan cu bo por tin riba stoof of riba un pida chikitu di tapijt. Djis ranca e deken saca for dje contenedor chikitu pegá na muraya, span e bo dilanti pa protehá bo mes dje vlamnan i pone e deken riba e candela. Claro cu si bo no a paga e fuente di cayente ainda, haci esei mesora si ta posibel.

Tambe deken pa paga candela ta un salbabida si bo paña mester coge candela. Den tal caso, corda e regla vital aki: “Stop, cai i lora.” Nunca no core; net esei ta waya e candela. Si abo of un otro persona por lora un deken pa paga candela rond di bo segun cu bo ta lora abou, lo bo paga e candela asta mas lihé.

Mihó Cu Aparato pa Paga Candela

Claro cu e mihó proteccion contra candela ta di prevení candela; pues usa sano huicio. Tene lusafè i lighter for di alcanse di mucha. Kita tur material riba stoof of pegá cu stoof cu lo por coge candela. Nunca cushiná bistí cu paña cu tin manga hanchu ta cologá cu por coge candela. Instalá detector di huma den bo cas.

Aki ta sigui algun tip mas. Nunca usa demasiado aparato pa un solo stopcontact of verlengsnoer. Nunca laga vet of zeta di hasa su so riba stoof cayente. Tene cuidou unda bo ta pone aparato di verwarming. Si bo tin botter di gas pegá cu cas, no laga e valve di siguridad ta mik riba e cas; e por supla gas riba e candela. Usa fius dje tamaño corecto. Remplasá waya di coriente dañá.

Bo a pensa pa ensayá na cas kico pa haci den caso di candela? Esaki realmente por salba bida. Haci areglo pa e famia topa na un lugá specífico: cualkier lugá safe, bon definí cu ta fácil pa haña den dia of anochi. I delegá responsabilidad: Ken lo yuda yunan chikitu of personanan desabilitá yega na un lugá sigur? Ken lo yama brandweer? Sí, tal ensayo ta salba bida pasobra nan ta pone hende train kico ta e reaccion corecto, i e ta bira algu automático i rápido.

Den Caso Cu Lo Peor Sosodé

Corda cu bo por remplasá material pero bida sí no. No risca bo bida pa combatí un candela. Sin embargo, si ta safe pa bo combatí e candela, hacié un caminda cu ta cerca di un salida. Pero si bo ta duda cu e aparato di paga candela cu bo tin ta esun corecto of si bo tin miedu cu e candela ta muchu grandi p’e, sali pafó lihé i yama brandweer.

Tuma nota tambe cu huma, foral huma venenoso di material sintético, ta mata mas hende cu e vlamnan mes, e por mata den ménos cu dos minuut! P’esei ora bo ta scapa for di un edificio na candela, tene bo curpa abou. Tin ménos huma cerca dje flur, i e aire ta mas frescu. Si ta posibel, tapa bo boca cu un paña muhá. Promé cu bo usa un porta, mishi cuné cu e lomba di bo man. Si e ta cayente, tin candela tras dje porta; busca un otro salida. I cera tur porta bo tras segun cu bo ta bai. Esaki ta stroba e candela di haña mas oxígeno. Claro cu ta absolutamente prohibí pa usa lift durante un candela: bo por keda atrapá den dje i e ta bira un fornu!

Pues, si bo tin intencion di cumpra proteccion contra candela pa bo cas, auto of negoshi, lo mihó por ta di considerá e asuntu cu bo autoridadnan local di brandweer. Detayenan mas specífico kisas ta varia di pais pa pais i p’esei ta fuera di alcanse dje artículo aki.

En todo caso, e siguiente biaha cu bo mira un dje bewakernan chikitu i silencioso ei, para i siña conoc’é mihó. Podisé un dia lo bo ta sumamente gradicidu na dje.

[Nota]

[Diagram/Plachinan na página 25]

(Pa e teksto den su formato kompleto, wak e publikashon)

CANDELA

combustibel

cayente

oxígeno

[Plachinan]

CLASE A

CLASE B

[Rekonosementu]

Chubb Fire Safety

[Diagram na página 26]

(Pa e teksto den su formato kompleto, wak e publikashon)

Si bo paña coge candela, no core

1. STOP

2. CAI

3. LORA

[Rekonosementu]

© Coastal Training Technologies Corp. Reproducí cu Permit

[Plachi na página 24]

Tin hopi aparato di paga candela di multi-uso pa cas

[Rekonosementu]

E plachi ariba: Reproducí cu permit di NFPA 10 - 1998, Portable Fire Extinguishers, Copyright © 1998, National Fire Protection Association, Quincy, Massachusetts 02269. E material reproducí aki no ta e posicion completo i oficial di NFPA relacioná cu e tópico na cua ta ser referí. E tópico ta ser representá solamente dor dje standard den su totalidad.