Enfrentando cu Goso un Mundu Anshá

MAYORIA HENDE TA ENFRENTÁ E PRESHONNAN DI BIDA, PERO POCO TA ENFRENTÁ NAN CU GOSO. PA LOGRA ESEI BO MESTER DI UN TIPO DI SABIDURIA SPECIAL.

RECONOCIENDO esaki, e buki The 24-Hour Society (E Sociedad di 24 Ora) ta bisa: “Nos tin cu desaroyá e sabiduria pa protehá necesidad i naturalesa humano den e mundu tecnológico cu nos a crea.”

Felismente, sabiduria práctico ta masha fácil pa haña den e buki mas plamá na mundu: Bijbel, e Palabra di Dios. Inspirá dor di Esun cu ta comprendé necesidad i naturalesa humano perfectamente, Bijbel ta contené principionan cu a duna prueba di ta eficas. Aplicando e principionan aki por yuda bo adkerí  mas control riba bo bida, i asina duna bo por lo ménos un grado di goso segun cu bo ta enfrentá e mundu anshá djawendia cu éxito.—Isaías 48:18; 2 Timoteo 3:16.

E principionan aki ta trata tres área principal. Promé, nan ta señalá e cosnan cu bo por eliminá dor di usa sano huicio. Di dos, nan por yuda bo fiha prioridadnan sano. Di tres, nan ta percurá un perspectiva spiritual riba bida cu ta hopi mas superior cu un punto di bista puramente seglar. Laga nos ban considerá e tres áreanan aki.

Mantené Bida Simpel i Sin Potoshi

Imaginá cu bo ta bai kampeer pa un par di dia. Bo kier sinti bo cómodo, pues bo ta bai cu un tent grandi cu tur accesorio imaginabel. Tambe bo ta bai cu un trailer cargá cu mueble, ekipo pa cushiná, un vriezer, un generator portátil, lus, un television i hopi otro artículo mas, incluso cuminda. Sin embargo, ta tuma bo hopi tempu pa pone tur e cosnan aki na lugá! Caba, na final di bo vakansi corticu, bo tin cu tuma mes hopi tempu pa bolbe paketá tur cos—pa no papia mes di warda tur cos bek ora bo yega cas. Mirando bek, bo ta realisá cu bo no tabatin suficiente tempu pa disfrutá dje kampeermentu! Bo ta puntra bo mes si tur e molester ei a bale la pena.

Pa miyones di hende awe, bida mes ta un poco manera e biahe ei pa bai kampeer. Nan ta pasa un cantidad exagerá di tempu na obtené i mantené un sinfin di cosnan material cu e mundu aki kier laga nos kere cu nos tin mester pa nos por ta felis. Na contraste, Jesucristo a bisa: “Asta ora un persona tin na abundancia, su bida no ta resultá dje cosnan cu e ta poseé.” (Lucas 12:15) Sí, e calidad di bida no ta ser midí a base di rikesa material. De echo, rikesa hopi bes ta aumentá e stres i ansiedadnan di bida. Eclesiástes 5:12 ta bisa: “E abundancia cu ta pertenecé na e ricu no ta permitié drumi.”

P’esei analisá seriamente cada un di bo posesionnan, i puntra bo mes: ‘Realmente mi mester di e cos aki, of e ta potoshi? E ta elevá e calidad di mi bida, of e ta horta tempu balioso?’ E introduccion dje buki Why Am I So Tired? (Di Con Mi Ta Asina  Cansá?), skirbí pa Leonie McMahon, ta remarcá: “E invento di vários aparato, cu e intencion di eliminá e monotonia for di trabou di cas, tabatin como resultado cu e ama di cas mester a sali bai busca un trabou pafó di cas, pa por cumpra nan i paga pa mantené nan.”

Ora bo simplificá bo bida, bo ta traha mas tempu pa bo famia, amigunan i pa bo mes. E tempu ei ta vital pa bo felicidad. No sea manera e hendenan cu ta descubrí demasiado lat den bida cu amigu i famia ta hopi mas importante—i interesante—cu placa i cos material. Ta hende so por stima bo. Cuentanan bancario, portafolionan di bono of accion, computer, aparato di television i otro artefactonan—aunke nan por tin nan lugá—ta e casca di bida, no su pipita. Hende cu ta duna e cosnan ei prioridad ta haci nan bida barata, i cu tempu nan ta bira malcontentu of asta amargá.—1 Timoteo 6:6-10.

Manehá Tempu i Fiha Prioridad

Den algun aspecto, manehá tempu ta mescos cu balansá un presupuesto financiero. Si bo ta purba hinca muchu hopi cos den e oranan limitá cu bo tin disponibel, bo ta bibando for di bo forsa pa loke ta tempu. Tal estilo di bida ta hiba inevitablemente na frustracion, stres i cansancio. Pues siña fiha prioridad.

 Promé, determiná kico ta e cosnan mas importante, i asigná suficiente tempu na esakinan. Pa cristiannan, actividad spiritual semper tin promé prioridad. (Mateo 6:31-34) Si bo pura asuntunan importante of trata nan superficialmente, hopi bes problemanan serio lo surgi despues. Pues, podisé bo tin cu eliminá cualkier cos cu ta guli tempu pero cu no ta duna bo mashá a cambio.

Ora di fiha prioridad, tene cuenta cu bo tin mester di un poco soledad tambe: tempu pa meditacion constructivo i pa carga bo propio baterianan. “Pasa tempu significativo bo so,” segun e revista Psychology Today, ta “un tónico necesario den e mundu purá djawe. . . . Pasa tempu bo so, ta combustibel pa bida.” Hende cu ta muchu ocupá pa meditá por bira superficial den nan actitud pa cu bida.

Modestia i Spiritualidad

Modestia i spiritualidad ta dos dje mihó posesionnan cu bo por tin ora ta trata di hiba un bida felis i balansá. Modestia ta importante pasobra e ta yuda bo evitá di aceptá carga i responsabilidadnan irealístico di trabou. Si bo ta modesto, lo bo sa ki ora pa bisa no na overtime di trabou of na otro actividad cu lo por kita tempu di algu mas importante. Hende modesto no ta envidioso di loke otronan tin i ta haci; p’esei nan tin tendencia di ta mas satisfecho. Berdadero modestia, na su turno, ta un faceta di spiritualidad, cu tambe ta un otro clave vital pa adkerí mas control riba nos bida.—Mikéas 6:8; 1 Juan 2:15-17.

Spiritualidad basá riba conocimentu exacto di Bijbel ta haci bo un persona mas perceptivo i cu dicernimentu, un persona cu no ta ser engañá dor di definicionnan barata i seglar di kico ta éxito. Bo ta tuma na pechu e conseho sabí di 1 Corintionan 7:31: “[Laga] esnan cu ta haci uso di mundu [ta] manera esnan cu no ta us’é plenamente; pasobra e esena dje mundu aki ta cambiando.” Cristiannan ta “haci uso di mundu” ora nan ta percurá materialmente pa nan mes i pa nan famia, pero nan no ta laga e mundu aki guli nan. Nan sa cu mundu no ta ofrecé berdadero siguridad, cu pronto lo e ser destruí completamente, i cu berdadero éxito—esta, siguridad i bida eterno riba un tera paradísico—ta dependé di un persona su posicion cerca Dios. (Salmo 1:1-3; 37:11, 29) P’esei haci caso di Jesus su spiertamentu, i invertí sabí dor di “acumulá tesoronan . . . den shelu, unda ni mòt ni frus ta destruí, i unda ladron no ta kibra drenta i horta.”—Mateo 6:20.

Evitá Ansiedad i Haña Berdadero Pas

Segun cu fin di e sistema actual ta acercá, stres i demandanan riba bo tempu lo aumentá sin duda. Ki importante ta anto, pa bo haci esfuerso pa aplicá e conseho bíblico: “No sea ansioso riba nada, sino den tur cos mediante oracion i súplica huntu cu gradicimentu, laga bo peticionnan bira conocí na Dios; i e pas di Dios cu ta surpasá tur pensamentu lo warda bo curason i bo facultad mental pa medio di Cristo Jesus.” E pas ei ta fuera di alcanse di ken cu tin un inclinacion puramente seglar i cu no ta mira niun balor den oracion.—Filipensenan 4:6, 7.

Sin embargo, Jehova lo haci asta mas cu duna bo pas mental. Lo e yuda bo hiba bo carga di responsabilidad tur dia si bo ‘tira tur bo ansiedad riba dje.’ (1 Pedro 5:7; Salmo 68:19) P’esei ta sabí pa bo scucha Dios tur dia dor di lesa un porcion di su Palabra. Ken lo por duna bo mihó conseho cu bo Creador? (Salmo 119:99, 100, 105) Sí, experencia a mustra cu esnan cu ta pone Dios central den nan bida ta haña gran yudansa pa enfrentá cu goso e mundu anshá aki.—Proverbionan 1:33; 3:5, 6.

[Komentario na página 11]

Fiha bo prioridadnan, entre otro, dor di satisfacé bo necesidad pa soledad i spiritualidad

[Plachi na página 9]

Bo por haci bo bida mas simpel i liber di potoshi?

[Plachi na página 10]

Bo ta duna prioridad na cos material of na hende?