For di Nos Lectornan

Luchando Contra Desesperacion Como cu mi ta sufri di depresion, mi a lesa e artículo “E Punto di Bista Bíblico: Con pa Trata cu Desesperacion” (8 di mei 2000) asina cu mi a hañ’é. Manera boso a bisa, papia cu un hende cu lo scucha bo cu comprension ta hopi animante. Lo mi kier expresá mi gratitud pa boso artículonan excelente.

A. D., Lituania

Intolerancia pa Lactose Mi esposa a bai su dokter dor cu e tabata sinti síntomanan severo. E dokter a bisa cu kisas e tin intolerancia pa lactose. Nunca promé mi no a tende di esei, pues nos ta gradicidu pa e artículo “Bo Tin Intolerancia pa Lactose?” (8 di mei 2000) E informacion excelente aki no por a bini na un mihó momento.

E. P., Merca

Brazil E artículo “Pantanal—Un Santuario Fasinante” (na spañó, 8 di september 1999) a lanta mi deseo pa mira e parti aki di Jehova su creacion personalmente. P’esei ami cu mi ruman muher a traha plan pa bishitá Brazil, i e artículo “E Historia Dramático di un ‘Pais di Contraste’” (8 di mei 2000) a yega dos siman promé cu nos a bai einan. E tabata un excelente guia pa sa cua ta e mihó lugánan pa bishitá.

E. V., Inglatera

Para i Prezu Mi tabatin e goso di cria vários para i despues laga nan bai bek den naturalesa. E artículo “Kico un Para Por Siña un Prezu?” (8 di mei 2000) a recordá nos con asta un creacion chikitu di Jehova por siña nos asina hopi cos.

E. D., Merca

Anaconda Mi ta biba den un region cu tin anaconda. Hopi bes hende ta conta historia tocante e colebranan aki, pero ta difícil pa sa si bo mester kere nan of no. Boso artículo “Anaconda—Ta Lagando Algun Secreto Los?” (8 di juni 2000) a yuda mi distinguí realidad for di fantasia, i el a contestá tur mi preguntanan tocante e maraviya aki di creacion.

J.S.P., Brazil

Tatanan Cu Ta Core pa Nan Responsabilidad Mi tin 25 aña ta lesa Spierta!, i mi ta kere cu nunca e no a trata e tema aki. (“Hóbennan Sa Puntra . . . Tatanan Realmente Por Core pa Nan Responsabilidad?” 8 di juni 2000) Tocante mamanan soltero, sí, pero no e responsabilidad dje yoncuman. Ami no por a comprendé di con si dos hende cometé fornicacion, ta e mama cu e yu so ta carga e consecuencianan. Mi a sali na estado ora mi tabatin 19 aña. E mucha homber no kier tabatin nada di haci cu mi. Por fabor, sigui bisa hóbennan pa “hui di fornicacion.”—1 Corintionan 6:18.

C. C., Spaña