Hóbennan Sa Puntra . . .

Kico si Mi Mayornan Ta Haña Cu Mi Ta Muchu Yong pa Traha Cita?

“Mama ta chapo. Nos no ta den añanan ’50. Tur hende ta traha cita pa sali! Mi no ta Mama su yu chikitu mas.”—Janie di 16 aña. *

POR ta frustrante ora bo mayornan ta bisa bo cu bo no ta cla pa traha cita pa sali. Un hóben a bisa: “Mi kier haci manera Bijbel ta bisa i onra mi tata cu mi mama, pero mi no ta kere cu nan tin rason. Mi no sa mes con pa papia di esaki cu nan.” Mescos cu e yoncuman aki, kisas bo tambe ta sinti cu bo mayornan ta irazonabel i sin comprension. Podisé bo a topa un persona cu bo ta ègt gusta i bo kier siña conoc’é mihó. Of por ta bo ta haña cu si bo tambe cuminsá traha cita pa sali cu hende dje sexo opuesto, esei lo yuda bo pas mihó den e círculo di bo pareunan. Michelle ta bisa: “Tin hopi preshon. Si bo no ta sali cu mucha homber, e muchanan na scol ta pensa cu bo ta straño.”

Un consehero di famia a comentá tocante trahamentu di cita pa sali: “Riba niun otro tereno mayornan ta parce mas irazonabel.” Pero djis pasobra bo mayornan kisas ta parce irazonabel, kier men cu realmente nan ta irazonabel? Corda cu Dios ta tene bo mayornan responsabel pa siña bo, entrená bo, protehá bo i guia bo. (Deuteronomio 6:6, 7) Acaso bo mayornan por tin algun motibu válido pa ta preocupá cu bo bienestar? Un mayor a bisa: “Mi ta mira e peliger na horizonte, i esei ta masha spantoso.” Di con trahamentu di cita pa sali ora bo ta yong, ta alarmá asina hopi mayor?

Sintimentunan Peligroso

“Mi mayornan ta haci manera cos cu ta algu malu pa gusta un persona,” Beth di 14 aña ta keha. Sin embargo, si bo mayornan ta cristian, nan sa bon cu Dios a diseñá hende homber i hende muher pa ser atraí na otro. (Génesis 2:18-23) Nan sa cu e atraccion aki ta natural, cu e ta na armonia cu e propósito di nos Creador pa humanidad “yena e tera.”—Génesis 1:28.

Ta bini acerca cu bo mayornan ta comprendé con fuerte deseonan sexual por ta ora bo ta den “e flor di hubentud.” (1 Corintionan 7:36) Tambe nan sa cu bo no tin hopi experencia con pa controlá e deseonan ei. Si bo cuminsá pasa hopi tempu cu un persona dje sexo opuesto sea en persona, na telefon of asta via carta of E-mail, e atraccion probablemente lo aumentá. ‘Kico tin di malu den esei?’ lo bo por puntra. Wel, ki salida legítimo bo tin pa e deseonan  ei cu ta acumulá? Bo ta realmente prepará pa hiba e sintimentunan ei na nan conclusion lógico: matrimonio? Probablemente no.

Pues trahamentu di cita pa sali ora bo ta yong ta trece peligernan serio cuné. Bijbel ta spierta: “Un homber por montoná candela riba su pechu i tog no kima su paña mes?” (Proverbionan 6:27) Demasiado bes, salimentu prematuro cu hende di otro sexo ta hiba na sex promé cu matrimonio, exponiendo hóbennan na e posibilidad di embaraso fuera di matrimonio i malesa transmití sexualmente. (1 Tesalonicensenan 4:4-6) Por ehempel, e hobencita Tammy a pensa cu su mayornan tabata inhustu ora nan no kier a lagu’é sali cu mucha homber. P’esei el a cuminsá sali den secreto cu un mucha homber na scol. Sin embargo, no a tarda hopi cu Tammy a sali na estado, i su bida a cambia. Awor e ta confesá: “Sali cu mucha homber no ta dje maraviyoso ei manera nan ta pint’é.”

Pero kico si un pareha yong tene cuidou pa evitá contacto inapropiado? Asina mes tin e peliger di lanta of excitá sintimentunan di amor prematuramente. (Cantica di Sálomon 2:7) Stimulá deseonan cu solamente por ser satisfacé legítimamente añanan despues, por resultá den frustracion i sufrimentu.

Algun otro punto pa pensa ariba: Realmente bo tin suficiente experencia den bida pa sa kico bo mester busca den un futuro casá? (Proverbionan 1:4) Di otro banda, bo tin e cualidadnan i abilidadnan necesario caba pa ta un esposo of un esposa cu lo ser berdaderamente stimá i respetá? Realmente bo tin e pacenshi i determinacion necesario pa mantené un relacion duradero? No ta un sorpresa cu mayoria relacion romántico entre tienernan ta dolorosamente corticu. Masha tiki ta resultá den matrimonio duradero.

P’esei Monica di 18 aña a resumié bon ora el a comentá: “Tur mi amiganan na scol tabata conta mi nan historianan tocante nan mucha homber. Pero sea nan a casa yong of al final nan a kibra di un forma mahos cu otro, pasobra nan no tabata cla pa bai n’e siguiente paso.” Un hóben cu yama Brandon tambe a comentá: “Ora bo realisá cu bo no ta cla pa comprometé bo na un persona pero bo ta sinti cu ya caba bo a hacié pasobra bo ta saliendo cuné, esei ta hopi frustrante. Con bo por sali for di e situacion ei sin hùrt e otro persona?”

Sin duda bo mayornan ta purba spar bo e dolor i frustracion ei dor di insistí cu bo no mag traha cita pa sali sino te ora cu bo ta suficiente bieu pa haci un compromiso matrimonial. Realmente, nan ta actuando di acuerdo cu e conseho inspirá na Eclesiástes 11:10: “Kita shangrinamentu for di bo curason, i evitá calamidad pa bo carni.”

‘Hancha Bo Mes’

Pero, esaki no kier men cu bo no por disfrutá dje compania dje sexo opuesto. Pero pakico limitá bo asociacion na un solo persona?  Bijbel, den un otro contexto, ta animá nos pa “hancha” nos asociacionnan. (2 Corintionan 6:12, 13) Esei ta bon conseho pa hóbennan. Un manera pa haci esei ta dor di asociá den grupo mixto di mucha homber cu mucha muher. Tammy ta comentá: “Segun mi esei ta mas dushi.” Monica ta bisa: “Ta mas mihó ora bo tin hopi amigu. E idea di grupo ta ègt un bon idea pasobra bo ta topa hende cu diferente personalidad i esei ta laga bo realisá cu tin hopi hende cu bo no a topa ainda.”

Podisé bo mayornan ta asta dispuesto pa yuda bo organisá encuentronan sano i placentero cu otro hóbennan. Anne, un mama di dos yu, ta splica: “Semper nos ta haci sigur cu nos cas ta un lugá dushi caminda e muchanan kier ta. Nos ta invitá nan amigunan, duna nan pasaboca, i laga nan hunga wega. Dje manera aki nan no ta sinti cu nan tin cu sali for di cas pa pasa bon.”

Claro cu asta den un grupo bo tin cu tene cuidou ainda pa bo no mustra demasiado atencion na un solo persona. Tin hóben ta razoná cu tanten tin otro personanan rond di nan, esei no ta ègt un cita. Evitá di gaña bo mes asina. (Salmo 36:2) Si bo ta forma pareha cu e mésun persona tur biaha cu boso ta huntu cu boso amigunan, esei ta mescos cu ta un cita bo tin cuné. * Haci esfuerso pa usa sano huicio den bo amistad cu personanan dje sexo opuesto.—1 Timoteo 5:2.

E Balor di Warda

No ta fácil ora nan bisa bo cu bo ta muchu yong pa cuminsá traha cita pa sali. Pero bo mayornan no ta purba hùrt bo. Al contrario, nan ta haciendo tur nan posibel pa yuda bo i protehá bo. Pues, en bes di confia bo propio curason i rechasá nan conseho, pakico no haci uso di nan experencia? Por ehempel, pakico no busca nan conseho e siguiente biaha cu bo tin un problema cu ta trata dje sexo opuesto? Proverbionan 28:26 ta recordá nos: “Esun cu ta confia den su mes curason ta bobo.” E hóben Connie ta bisa: “Ora un mucha homber gusta mi, loke ta yuda mi resistí e preshon pa sali cuné ta dor di papia tocante esei cu mi mama. E ta conta mi experencianan di loke a pasa cu su amiganan i famia den pasado. Esei ta ègt yuda mi.”

Warda un poco promé cu bo cuminsá traha cita pa sali lo no stroba bo desaroyo emocional ni limitá bo libertad. Dor cu ainda bo no a tuma e responsabilidadnan adulto di enamoracion i matrimonio, bo tin e libertad di ‘alegrá den bo hubentud.’ (Eclesiástes 11:9) Tambe warda lo permití bo desaroyá bo personalidad, madures i, mas importante ainda, bo spiritualidad. (Lamentacionnan 3:26, 27) Manera un hóben cristian a expres’é: “Bo mester ta comprometé cu Jehova promé cu bo comprometé cu cualkier otro hende.”

Segun bo ta bira mas bieu i bo progreso ta bira bisto na tur hende, bo mayornan lo cuminsá mira bo diferente. (1 Timoteo 4:15) I ora bo ta realmente cla pa traha cita pa sali, sin duda lo bo por hacié cu nan aprobacion.

[Nota]

[Plachinan na página 20]

Dunando un solo persona dje sexo opuesto atencion special . . .

[Plachi na página 20]

. . . por lo general lo excitá sintimentunan romántico

[Plachi na página 21]

En bes di limitá bo interes na un solo persona, amplia bo amistadnan